«قازاقستان پرەزيدەنتى مەملەكەت باسشىلارىنا جولداعان ۇندەۋىندە ەاەو اياسىنداعى ورتاق جۇمىسىمىزدىڭ باسىم باعىتتارىن ايقىندادى. 2026 جىلى ەكونوميكانىڭ ءتۇرلى سالاسىندا جاساندى ينتەللەكت قۇرالدارىن ەنگىزۋگە, وداقتىڭ لوگيستيكالىق الەۋەتىن ءتيىمدى پايدالانۋعا, ونەركاسىپ پەن اگروونەركاسىپ كەشەنىن تسيفرلاندىرۋعا, ءوزارا ساۋداداعى كەدەرگىلەردى جويۋعا, سونداي-اق ءۇشىنشى ەلدەرمەن ساۋدا-ەكونوميكالىق ىنتىماقتاستىقتى دامىتۋعا باسا نازار اۋدارۋ ۇسىنىلادى», دەدى ول.
سونىمەن قاتار ورتاق ۇدەرىستەردى تولىق كولەمدە جۇزەگە اسىرۋدىڭ ماڭىزدىلىعى اتاپ ءوتىلدى. قازىر بەكىتىلگەن 77 ورتاق ۇدەرىستىڭ تەك 42-ءسى عانا ناقتى جۇزەگە اسىرىلعان. ۋاكىلەتتى ورگانداردىڭ اقپاراتتىق جۇيەلەرى ءوزارا ينتەگراتسيالانباي, وداق ىشىندە تاۋارلاردىڭ ەركىن قوزعالىسىن قامتاماسىز ەتۋ قيىن.
باسىم باعىتتاردىڭ ءبىرى رەتىندە «كەدەرگىسىز» ترانزيت ايقىندالدى. بۇل ناۆيگاتسيالىق پلومبالاردى كەڭىنەن قولدانۋدى, بىرىڭعاي ترانزيتتىك دەكلاراتسيانى ەنگىزۋدى جانە كەدەندىك باجداردى تولەۋدى قامتاماسىز ەتۋدىڭ بىرىزدەندىرىلگەن تەتىكتەرىن پايدالانۋدى كوزدەيدى. مۇنداي شارالار تاسىمال ۇدەرىسىن جەدەلدەتىپ, ونىڭ قۇنىن تومەندەتۋگە تىكەلەي ىقپال ەتەدى.
سونداي-اق كووپەراتسيالىق جوبالاردى دامىتۋعا ايرىقشا كوڭىل بولىنەدى. قازىر قازاقستان, قىرعىزستان, بەلارۋس جانە رەسەي كومپانيالارىنىڭ قاتىسۋىمەن بەس كووپەراتسيالىق جوبا ماقۇلدانعان. نەگىزگى مىندەت – كووپەراتسيا قورجىنىن كەڭەيتۋ, بىرلەسكەن ءوندىرىستى ۇلعايتۋ, جاڭا جۇمىس ورىندارىن اشۋ جانە لوكاليزاتسيالاۋ دەڭگەيىن ارتتىرۋ.
وتكىزۋ نارىقتارىن كەڭەيتۋ ماقساتىندا ءۇشىنشى ەلدەرمەن ساۋدا كەلىسىمدەرىن كەزەڭ-كەزەڭىمەن ىلگەرىلەتۋ ۇسىنىلدى. بۇل كەلىسىمدەر ەاەو-عا مۇشە مەملەكەتتەردىڭ بيزنەسى ءۇشىن تۇراقتى ءوسۋدىڭ نەگىزگى كوزدەرىنىڭ ءبىرى رەتىندە قاراستىرىلادى.
