سۋرەت: kaz.zakon.kz
مەملەكەت باسشىسى قاسىم-جومارت توقاەۆ «وقيتىن ۇلت» باستاماسىن العا وزدىرعانى بەلگىلى. كىتاپقا دەگەن جۇرتتىڭ ىنتاسى وياندى. الايدا باسپاسوزگە جازىلۋ ماسەلەگە اينالىپ وتىر. جاندانىپ كەلە جاتقان بيلىك پەن حالىقتىڭ ورتاسىنداعى التىن كوپىر, پرەزيدەنتتىڭ ەلدىك ساياساتىن جۇرتقا جەتكىزەتىن باسىلىمدار تاعدىرشەشتى جاعدايعا تاپ بولعانداي. جازىلۋ باعاسىنىڭ شارىقتاۋى وقىرماندى شاراسىز كۇيگە قالدىردى. مەرزىمدى باسىلىم تاسقا تاڭبالانعان سوڭ, تاريح ايناسى ەكەنىن ەستەن شىعارماعانىمىز ءجون. تولقىن-تولقىن ۇرپاق سارعايعان باسىلىم بەتتەرىن پاراقتاعاندا قازاقتىڭ وتكەنىن, بۇگىنىن, كەلەشەگىن, بولاشاققا جاساعان باتىل قادامدارىن سارالاي وقىپ, تاعىلىم الادى, جاقسىدان ساباق ۇيرەنەدى, اتتەگەنايدى قايتالاماۋ كەرەگىن ۇعادى, ءبىلىمدارلار تاپسىرلەگەن بابالار تاريحىنا بويلايدى, جاقسى مەن جايساڭدى تانىپ-بىلەدى. مۇنىڭ ءبارى مارجانداي ءتىزىلىپ كوز الدىڭنان وتەدى.
ءورىسى كەڭ وركەنيەت جولى اۋاداي قاجەت ەكەنىن ەسى كىرەسىلى-شىعاسىلى بىرەۋ بولماسا, كىم جوققا شىعارادى. دامىعان دەلىنەتىن ەلدەردەن ۇيرەنەتىن, بارەكەلدى دەگىزەتىن ءبىر ۇلگى بار. ول – مەرزىمدىك باسىلىمعا دەگەن ءىلتيپات. ونداي مەملەكەتتەرگە بارىپ, قوناقۇيىنە قونساڭ, تاڭعى «ورازاڭدى» تابالدىرىقتى «اتتاعان» باسىلىمدارمەن اشاسىڭ. ون بەت بىلاي تۇرسىن, ءجۇز بەتتىگى بار. ءيا, ءبارى جەتكىلىكتى. ساياسات تا, جارناما دا, الۋان ءتۇستى سۋرەتتەر دە مول. قارجىلاندىرۋدىڭ دا جولى سان ءتۇرلى. باي-باعلاندار دا دەمەپ وتىرادى ەكەن. ءبىر جىلى قىتاي ەلىنە بارعانىمىزدا وي بولىسكەن ازاماتتار تەحنيكا مەن تەحنولوگيانىڭ جاقسى ەكەنىن ايتىپ, ساۋاتتى جازۋ ءىسىن ءسوز ەتىپ, ونى مەكتەپتەن جۇيەلى قولعا الىپ, ءداستۇرلى وقۋ ءۇردىسىن جاڭعىرتىپ وتىرماسا, كەيىنگى ۇرپاق دايىننىڭ جەتەگىنە ەرىپ, تار شەڭبەردە قالىپ قوياتىنىن, ۇلتتىق جازۋدان اجىراپ قالماۋ جايىن تىلگە تيەك ەتىپ, ونىڭ باسى كىتاپتا, باسىلىمداردا جاتقانىن العا تارتىپ ەدى. جاپونيا ەلىندەگى گازەت-جۋرنالدىڭ ميلليونداعان تارالىمى اڭىز بولارلىق. كەشكى گازەتتەردىڭ ءوزى ءبىر الەم دەرلىك. ەگەر قاجەت بولماسا, ولار مۇنداي جاقسى ىسكە جاناشىر بولماس ەدى عوي.
پرەزيدەنتتىڭ جاڭا باستامالارى ورتالىق, وڭىرلىك مەرزىمدىك باسىلىمدار ارقىلى جۇرتقا جەتىپ جاتسا, قانە! اقيقاتىنا كەلسەك, بۇل جاعىنان ولقىلىق بارىن مويىنداعان ءجون سەكىلدى. اۋىلدى قويىپ, قالا تۇرعىندارىنا گازەتتىڭ كەشىگىپ باراتىنىن, ءتىپتى بىرنەشە ءنومىرىن جيناپ ءبىر-اق اكەلەتىنىن قايتەرسىڭ.
ونىڭ ۇستىنە, كىم ويلاپ تاپقانىن قايدام, ەرىكتى جازىلۋ دەگەن جەلەۋ دە ويعا قالدىرا بەرەدى. ەركىندىك جاقسى, بىراق ازات ەلدىڭ مۇددەسى ەسكەرىلۋى كەرەك ەمەس پە ەدى؟ ول جەلىگۋ بىزگە ءدال قازىر كەرەك پە دەگەندى جان-جاقتى ەسكەرمەدىك, وتكەلسىز وزەنگە قويدىق تا كەتتىك.
اۋىلدىڭ قازىرگى زيالىسى – مۇعالىمدەر, دارىگەرلەر. مۇعالىمدەر وقۋلىقپەن شەكتەلسە, ءبىلىم ىلگەرى باسا ما, ساباق ساپاسى ارتا ما؟ ادىستەمەلىك دەلىنەتىن جۋرنالداردىڭ كوبى سىن كوتەرە بەرمەيدى. ءداستۇرلى باسىلىمدار اپتاسىنا ءبىر رەت ۇستازدار بەتىن ۇيمداستىرىپ, ولاردىڭ ءىس-تاجىريبەسىن ۇسىنىپ, تانىمدىق ماقالالارىن بەرىپ وتىرسا, وعان اتا-انالار دا اتسالىسىپ جاتسا, قۇبا-قۇپ بولار ما ەدى؟
ەندەشە, جاقسىلار نەگىزىن قالاعان ءداستۇرلى باسىلىمداردىڭ ءباسىن ارتتىراتىن كەز كەلىپ تۇر. بۇل دا مەملەكەت ءىسى, سونىڭ باعىتىن جۇرتقا جەتكىزۋشى دەپ وركەنيەتتى ەلدەردىڭ باعى جانعان باسىلىمدارىنىڭ جولىن ساراپتاسا, الاش بالاسىنىڭ ءسوزى شەشىمىن تابار ەدى.
تاۋەلسىز ەلمىز دەپ وتىرعاندا ۇلت ءباسپاسوزىن سان سىلتاۋلى جەلەۋمەن مارتەبەسىن كوتەرۋدىڭ ورنىنا قۇلدىراتۋ كىمگە ءتيىمدى دەيسىز. الدە تىزگىن ۇستاعاندار جەلىدە جەلپىنىپ سويلەپ جۇرە بەرەلىك, جالپى بۇقارانىڭ ساۋاتتانۋى كۇندەردىڭ كۇنىندە قاۋىپتى دەي مە ەكەن؟ بۇل – قاتە ۇعىم. شىن ءبىلىمدىنىڭ تالعامى بيىك, كەز كەلگەن ايقايعا ات قوسپايدى, توڭىرەگىن تۇگەندەپ جۇرەدى, ەلدىك ۇعىم زەردەسىنەن شىقپايدى.
تۇڭعىش قازاق جۋرنالى «ايقاپتىڭ» مۇحامەدجان سەرالين: «قازاقتىڭ نەشە جەردە «قاپ!» دەپ قاپى قالعان ىستەرى كوپ. قاپ دەگىزگەن قاپيادا وتكەن ىستەرىمىز كوپ بولعان سوڭ, جۋرنالىمىز دا وكىنىشىمىزگە لايىق «ايقاپ» بولدى», دەپ «قاپتان» قۇتىلۋ ارقىلى وڭالۋعا بولاتىنىن حح عاسىردىڭ باسىندا ەسكە سالادى. ال قازىر الەمدىك دامۋدى قاپەردەن شىعارماي, ونى ۇلتتىق سالت-سانامەن ۇشتاستىرماي, وركەندەگەن ەلدەر ۇلگىسىنەن ساباق الماي, قىزىل-جاسىلدى قۋالاپ, ارىستارىمىز سالعان سارا جولدان جاڭىلساق, ۇلىلار ءداستۇرىنىڭ التىن ارقاۋىن ءۇزىپ الساق, ءتىپتى تارك ەتە بەرسەك, ء«اي, قاپتىڭ» كوكەسى الدا ايتىلىپ جۇرمەس پە ەكەن؟
سۇلەيمەن مامەت,
«Egemen Qazaqstan» گازەتىنىڭ ارداگەرى
