ول كوميسسيانىڭ جۇمىسى اشىق جانە مازمۇندى تۇردە ءجۇرىپ جاتقانىن اتاپ ءوتتى.
ەلۆيرا ازيموۆانىڭ ايتۋىنشا, كوميسسيا جۇمىسىنا بيلىكتىڭ زاڭ شىعارۋشى, اتقارۋشى جانە سوت تارماعىنىڭ, سونداي-اق عىلىمي قاۋىمداستىق, ازاماتتىق سەكتور جانە مەديا وكىلدەرىنەن تۇراتىن 130 ادام جۇمىلدىرىلعان. بارلىق وتىرىستار كونستيتۋتسيالىق سوتتىڭ الەۋمەتتىك جەلىلەرىندە جانە «كونستيتۋتسيالىق رەفورما 2026» ارنايى Telegram-ارناسىندا تىكەلەي ەفيردە كورسەتىلۋدە.
كونستيتۋتسيالىق سوتتىڭ توراعاسى جوبانى تالقىلاۋ كەزىندە قۇقىقتىق تۇزەتۋلەر سانىنا ەمەس, جاڭارتىلعان مازمۇنى مەن مانىنە نازار اۋدارۋ ماڭىزدى ەكەنىن اتاپ ءوتتى.
«جاڭا كونستيتۋتسيانىڭ نەگىزىندە ادامعا باعىتتالعان مەملەكەتتىك مودەل كوزدەلگەن. وندا ادام, ونىڭ قۇقىقتارى, بوستاندىقتارى مەن قادىر-قاسيەتى ەڭ جوعارى قۇندىلىق جانە مەملەكەتتىك ساياساتتىڭ باستى باعدارى رەتىندە تانىلعان. حالىقتىڭ ءداستۇرلى قۇندىلىقتارمەن, تاريحي تاجىريبەسىمەن ادىلەتتىلىك, جاۋاپكەرشىلىك جانە قوعامدىق بىرلىك تۋرالى تۇسىنىكتەرمەن تىعىز بايلانىستى قاعيدالار كورىنىس تاپقان», دەدى ول.
ۇسىنىلعان جاڭارتۋلاردىڭ اۋقىمىن ەسكەرە وتىرىپ, كوميسسيا مۇشەلەرىنىڭ كوپشىلىگى قۇجاتتى ەندى تەك تۇزەتۋلەر پاكەتى رەتىندە قاراستىرۋعا بولمايدى دەپ سانايدى. قازاقستان پرەزيدەنتى بۇل ۇستانىمدى قولداپ, بۇكىلحالىقتىق تالقىلاۋ ءۇشىن جوبانى جاريالاۋدى جاقتادى.
«جاڭا كونستيتۋتسيا جوباسىنىڭ ءماتىنى «ەگەمەن قازاقستان» جانە «كازاحستانسكايا پراۆدا» باسىلىمدارىندا, سونداي-اق كونستيتۋتسيالىق سوتتىڭ رەسمي سايتىندا جاريالانادى», دەدى ەلۆيرا ازيموۆا.
