پرەزيدەنت مەملەكەتىمىزدىڭ بۇۇ-نىڭ ەرىكتىلەر باعدارلاماسىنا اتسالىسىپ كەلە جاتقانىن جەتكىزدى. بۇل ەل ازاماتتارىنا جاھاندىق ۆولونتەرلىك قۇرىلىمداردا بىرەگەي تاجىريبە جيناقتاۋعا مۇمكىندىك بەرەدى. ەل ەرىكتىلەرى بۇعان الداعى ۋاقىتتا دا قاتىسا بەرەتىنىن ايتتى.
مەملەكەت باسشىسى بيزنەس وكىلدەرىن ۆولونتەرلىك قىزمەتكە قولداۋ كورسەتۋگە شاقىردى
«تاجىريبە الماسۋعا جانە حالىقارالىق دەڭگەيدەگى ۆولونتەرلىك باستامالاردى ۇيلەستىرۋگە ارنالعان جاڭا پلاتفورمالار قۇرۋ قاجەت دەپ سانايمىن. قازاقستان بۇۇ-مەن قاتار شىۇ, اوسشك, تمد سەكىلدى ماڭىزدى ۇيىمدار اياسىندا ەرىكتىلەر قوزعالىسىن دامىتىپ جاتىر. ماسەلەن, بيىل ءبىزدىڭ باستامامىزبەن قازاقستاندا تاۋەلسىز مەملەكەتتەر دوستاستىعىنا مۇشە ەلدەر ەرىكتىلەرىنىڭ العاشقى فورۋمى وتەدى», دەدى پرەزيدەنت.
ايتا كەتەيىك ەلىمىزدەگى حالىقارالىق ەرىكتىلەر جىلى «ورنىقتى كەلەشەك ءۇشىن بىرگە!» ۇرانىمەن ءوتىپ جاتىر.
«بۇۇ قولداۋىمەن استانادا بيىل ءساۋىر ايىندا وتەتىن وڭىرلىك ەكولوگيالىق ءسامميتى اياسىندا ۆولونتەرلەر ءۇشىن ارنايى سەسسيا ۇيىمداستىرۋ جوسپارلانىپ وتىر. بۇل ءىس-شارا ەكولوگيا سالاسىنداعى ۇزدىك ۆولونتەرلىك جوبالاردى جۇزەگە اسىرۋعا ىقپال ەتپەك. بۇدان بولەك, كاسپي تەڭىزىندەگى ءىس-قيمىل اپتالىعى مەن ارال ماڭىنداعى تابيعاتتى قالپىنا كەلتىرۋ جونىندەگى حالىقارالىق ۆولونتەرلىك اپتالىق وتكىزۋ كوزدەلگەن. اتالعان جيىندارعا ءتۇرلى مەملەكەتتەردەن ەرىكتىلەر شاقىرىلادى. كەڭ بايتاق ءوڭىرىمىزدىڭ قايتالانباس ەكوجۇيەسىن ساقتاۋعا باعىتتالعان بۇل باستامالاردى قولدايمىن», دەدى قاسىم-جومارت توقاەۆ.
پرەزيدەنت ۇكىمەتكە ەرىكتىلەر ءىسىن دامىتۋ بويىنشا جاڭا قۇجات ازىرلەۋدى تاپسىردى
