استانا. 25 ماۋسىم. قازاقستان رەسپۋبليكاسى پرەمەر-ءمينيسترىنىڭ ورىنباسارى بەردىبەك ساپارباەۆ اقمولا وبلىسىنداعى «ۇيقى اۋرۋىمەن» جۇرتشىلىققا كەڭىنەن تانىس كالاچي اۋىلىندا بولدى. بۇل تۋرالى «قازاقپارات» حابارلادى.
ساپار بارىسىندا ۆيتسە-پرەمەر ەسىل اۋدانىنداعى كالاچي ەلدى مەكەنىنىڭ تۇرعىندارىمەن كەزدەستى. كەزدەسۋدە الەۋەتى تومەن, كەلەشەگى جوق ەلدى مەكەننىڭ حالقىن وبلىستىڭ وزگە وڭىرلەرىنە كوشىرۋ ماسەلەسىن تالقىلادى.
«بۇگىن مەن ارنايى ەلباسىنىڭ تاپسىرماسىمەن حالىقتىڭ جاعدايىن بىلۋگە كالاچي اۋىلىنا كەلدىم. قازىرگى تاڭدا عالىمدار ءۇشىن كالاچي حالقىن دۇرلىكتىرىپ وتىرعان دەرتتىڭ ناقتى سەبەبىن اشىپ ايتۋ مۇمكىن ەمەس. سوندىقتان, مۇندا چەحيا ەلىنەن, ماسكەۋ جانە ورتا ازيادان كەلگەن عالىمدار جۇمىس ىستەپ جاتىر. جاقىندا ەلباسىنىڭ توراعالىعىمەن قاۋىپسىزدىك كەڭەسى ءوتىپ, وندا وسى كالاچيدەگى «ۇيقى اۋرۋى» ءسوز بولدى. سونداي-اق, ۇكىمەتكە ناقتى تاپسىرمالار بەرىلدى. قازىرگى كەزدە حالىقتى قاۋىپسىز جەرلەرگە كوشىرۋ ماڭىزدى بولىپ وتىر», – دەدى بەردىبەك ساپارباەۆ.
حالىق اراسىندا «ۇيقىلى اۋىل» اتانىپ كەتكەن كالاچي مەن كراسنوگورسك ەلدى مەكەندەرىنەن بارلىعى 65 وتباسى كوشىرىلگەن ەكەن. ولاردىڭ دەنى بالالى وتباسىلار. وسى ورايدا, وبلىس اكىمى ەڭ الدىمەن بالالار مەن كراسنوگورسك تۇرعىندارىنا باسىمدىق بەرىلىپ وتىرعاندىعىن العا تارتتى. سونداي-اق, ەشكىمنىڭ دە كۇشتەپ كوشىرىلمەيتىنىن ەسكەرتتى.
ءوز سوزىندە وبلىس اكىمى سەرگەي كۋلاگين: «قازىرگى كەزدە باستى مىندەتىم مۇنداعى بالالاردىڭ الاڭداماي ءبىلىم الىپ, جاقسى ءومىر سۇرۋىنە جاعداي جاساۋ. سوندىقتان ءبىرىنشى كەزەكتە بالالى وتباسىلاردى كوشىرەمىز. سونداي-اق, وزگە دە كوشۋگە نيەتتى تۇرعىندار بولسا, ولارعا ەسىل مەن كورشى دەرجاۆينسك قالالارىنان پاتەر بەرەتىن بولامىز. ال, كوشپەي وسىندا قالعىسى كەلەتىندەردىڭ ەركى بىلەدى. ەشكىمدى دە كۇشتەپ كوشىرمەيمىز. تەك مۇمكىندىكتى جىبەرىپ الماڭىزدار دەگىم كەلەدى. ويتكەنى, كراسنوگورسكى مەن كالاچي اۋىلدارىنىڭ كەلەشەگى جوق», – دەدى.
ءوز كەزەگىندە تۇرعىندار كوشىرىلگەن كەزدە, جۇمىسقا ورنالاسۋ جانە جاڭا پاتەرلەرىن جەكەشەلەندىرۋ ماسەلەسىن ايتىپ شاعىمداندى. وسى ورايدا, ۆيتسە-پرەمەر كوشىرىلگەن ادامداردىڭ بارلىعى جۇمىسپەن قامتىلاتىنىن جانە ولاردىڭ جاعدايى ودان ءارى اكىمدىك باقىلاۋىندا بولاتىنىن ءتۇسىندىرىپ بەردى. ءتىپتى, مۇنداعى جاعدايدىڭ تىكەلەي ەلباسىنىڭ باقىلاۋىندا ەكەن اتاپ ءوتتى. ال, جەكەشەلەندىرۋ ماسەلەسى زاڭ اياسىندا شەشىلەتىنىن جەتكىزدى.
بۇدان كەيىن بەردىبەك ساپارباەۆ كراسنوگورسك جانە كالاچي تۇرعىندارى ءۇشىن ەسىل قالاسىندا سالىنىپ جاتقان 73 جانە 45 پاتەرلى تۇرعىن ءۇيدىڭ قۇرىلىسىمەن تانىستى. سونداي-اق, ەسىل اگروتەحنيكالىق كوللەدجىندە بولىپ, وقۋ زەرتحانالارى, شەبەرحانالارىمەن تانىسىپ, ستۋدەنتتەردىڭ عىلىمي-تەحنيكالىق جوبالارىنىڭ كورمەسىن تاماشالادى.
تالعات رايىمبەك.
دەرەك, سۋرەت: «قازاقپارات».
