قوعامنىڭ كەمەلدەنۋى, ىزگىلىكتىڭ سالتانات قۇرۋى ەڭ الدىمەن ازاماتتاردىڭ الەۋمەتتىك جاۋاپكەرشىلىگىنە بايلانىستى عوي. وسى جاۋاپكەرشىلىكتى جاستايىنان سەزىنىپ, ەرىكتىلىك قىزمەتتى قاعيداتىنا اينالدىرعان جاستاردىڭ قاتارى كۇن وتكەن سايىن كوبەيىپ كەلەدى. ءبىز تانىستىرعالى وتىرعان بەلسەندى جانەل امانجولقىزى – قاراعاندى وبلىستىق «VolteQ» ۆولونتەرلىك كورپۋسىنداعى جەتەكشى جاستاردىڭ ءبىرى.
جانەل 18 جاستا. قازىرگى تاڭدا ول «شەت تىلدەر كوللەدجى» پەداگوگيكالىق فاكۋلتەتىنىڭ 4-كۋرس ستۋدەنتى. جاس بولسا دا, ۆولونتەرلىك قىزمەتپەن ءۇش جىلدان بەرى تۇراقتى اينالىسىپ ءجۇر.
ەرىكتىلىككە ناقتى قادامى 2023 جىلى قاراعاندى وبلىستىق «VolteQ» ۆولونتەرلىك كورپۋسىنا قوسىلعان ساتتەن باستالادى. ءدال وسى ورتادا ول ۆولونتەرلىكتىڭ جۇيەلى, جوسپارلى ءارى ناتيجەگە باعىتتالعان قىزمەت ەكەنىن تۇسىنەدى. زووۆولونتەرلىكپەن قاتار الەۋمەتتىك, ەكولوگيالىق, مادەني جانە يۆەنتتىك باعىتتارداعى جوبالارعا ارالاسا ءجۇرىپ, ەرىكتى بولۋدىڭ قوعامدى وزگەرتۋدەگى ناقتى قۇرال ەكەنىن ۇعىندى.
2017 جىلدان بەرى جۇمىس ىستەپ كەلە جاتقان «VolteQ» كورپۋسى بۇگىندە وبلىستاعى ۆولونتەرلىك قوزعالىستىڭ ماڭىزدى تىرەگىنە اينالعان. كورپۋس وبلىستىق جاستار رەسۋرستىق ورتالىعىنىڭ قولداۋىمەن جۇمىس ىستەپ, ەرىكتىلەرگە ۇيىمداستىرۋشىلىق, موتيۆاتسيالىق جانە ىنتالاندىرۋ باعىتىندا جان-جاقتى كومەك كورسەتەدى. مۇندا ءار ۆولونتەردىڭ ەڭبەگى ەسكەرىلىپ, باستامالارى قولداۋ تابادى.
جانەل قاتىسىپ جۇرگەن نەگىزگى جوبالاردىڭ قاتارىندا قارتتارعا قامقورلىق كورسەتۋگە باعىتتالعان «Jas Qaria», جانۋارلار پاناجايلارىنا كومەك بەرەتىن «Tirshilik Ieleri», سونداي-اق ەمدەلۋگە مۇقتاج جاندارعا قارجى جيناۋدى كوزدەيتىن «JarmenQ» قايىرىمدىلىق جوباسى بار. بۇل باستامالاردىڭ بارلىعى قوعامداعى ناقتى الەۋمەتتىك ماسەلەلەرگە باعىتتالعانىمەن قۇندى.
ەرەكشە اتاپ وتەرلىگى – كورپۋس ۆولونتەرلەرىنىڭ اۆتورلىق جوبالارى دا گرانتتىق قولداۋعا يە بولىپ وتىر. تابيعاتتى قورعاۋعا باعىتتالعان «Sayahattime» جوباسى ەكولوگيالىق مادەنيەتتى قالىپتاستىرۋعا ۇلەس قوسسا, «Bilim Bus» جوباسى شالعاي ەلدى مەكەندەردەگى بالالاردىڭ ءبىلىم الۋ مۇمكىندىگىن كەڭەيتۋدە. بۇل جوبالار اياسىندا قارجىلىق ساۋاتتىلىق, جاساندى ينتەللەكتىنى پايدالانۋ جانە بازالىق ءبىلىم بەرۋ باعىتتارى قامتىلعان.
بىلتىرعى جىل جانەل ءۇشىن كاسىبي ءارى تۇلعالىق تۇرعىدان ماڭىزدى كەزەڭ بولدى. ول ۆولونتەرلىك قىزمەت بويىنشا ترەنەر اتانىپ, ازاماتتىق باستامالاردى قولداۋ ورتالىعىنىڭ ءبىر ميلليون تەڭگە كولەمىندەگى گرانتىن جەڭىپ الدى. سونىمەن قوسا, جانۋارلارعا جاناشىرلىق كوزقاراس قالىپتاستىراتىن اڭگىمەلەرىن كىتاپ ەتىپ شىعاردى.
ەڭبەگى ەسكەرۋسىز ەمەس. جانەل «جىل ۆولونتەرى – 2025» حالىقارالىق سىيلىعىنىڭ «جانۋارلاردى قورعاۋ ماسەلەلەرىن شەشۋگە قوسقان ۇلەسى ءۇشىن» اتالىمى بويىنشا لاۋرەاتى اتاندى.
قازىر «JarmenQ» جوباسى اياسىندا قاراعاندى قالاسىندا قايىرىمدىلىق كەرۋەن-جارمەڭكەسى ۇيىمداستىرىلىپ جاتىر. جانى ىزگى جانەل سول شارۋانىڭ باسى-قاسىندا ءجۇر. يگى ءىس-شارا س.ساپيەۆ اتىنداعى بوكس ورتالىعىندا ءوتىپ, جينالعان قاراجات ارلان تۇركەنوۆ ەسىمدى پاتسيەنتتىڭ ەمىنە جۇمسالادى.
«جانەل ارىپتەسىمىز «VolteQ» ۆولونتەرلىك كورپۋسىنا كەلگەن كۇننەن باستاپ-اق بەلسەندىلىگىمەن جانە جاۋاپكەرشىلىگىمەن كوزگە ءتۇستى. ءتۇرلى ءىس-شارادا ءوزىن كاسىبي قىرىنان تانىتىپ, قۇندى تاجىريبە جيناقتادى. رەسپۋبليكالىق بايقاۋ شەڭبەرىندە ۇيىمداستىرىلعان زەرەندى ۆولونتەرلەردى وقىتۋ لاگەرىنەن ءوتىپ, ۇلتتىق ۆولونتەرلىك جەلى وتكىزگەن ترەنەرلىك وقۋدى ءساتتى اياقتادى. بۇگىندە سپيكەرلىك قابىلەتتەرىن ودان ءارى دامىتىپ, جاڭا بەلەستەردى باعىندىرىپ ءجۇر. جان-جانۋارلارعا ارنالعان كىتابى جارىق كورىپ, كەز كەلگەن جوبانى جوعارى دەڭگەيدە جۇزەگە اسىرا الاتىن, ەرىكتىلەردى ءبىر ماقساتقا بىرىكتىرە بىلەتىن كوشباسشى رەتىندە وبلىسىمىزدىڭ ۆولونتەرلىك قوزعالىسىنا سۇبەلى ۇلەس قوسىپ كەلەدى. وسى ەڭبەگى ەلەنىپ, «VolteQ» ۆولونتەرلىك كورپۋسىنىڭ جەتەكشىسى قىزمەتىنە تاعايىندالدى», دەيدى قاراعاندى وبلىسىنىڭ ۆولونتەرلەر فرونت-ءوفيسىنىڭ باسشىسى اردانا مىرزانوۆا.
جانەلدىڭ پايىم-پاراساتى «جاۋاپكەرشىلىك پەن جاناشىرلىق ادامدى دا, قوعامدى دا وزگەرتەدى», دەيدى. ولاي بولسا, جاقسى ىسكە جۇمىلا كەتەتىن جۇدىرىقتاي قىزدىڭ ءار باستاماسىنا ساتتىلىك تىلەيمىز.
قاراعاندى وبلىسى
