كيزەۆەتتەر رەسەيدە ەكى رەت بولدى. العاشقى ساپارىن 1838 جىلى باستاپ, شۆەتسيا, فينليانديا ارقىلى رەسەيگە تابان تىرەدى. بۇل كەزدە پەتەربور, ماسكەۋ, ريازان, نيجني نوۆگورود قالالارىندا عانا ايالدادى. ال 1842 جىلى قايتا كەلىپ, ساپارىن قازان, ساراتوۆ, ۆورونەج, استراحان قالالارىن ارالاۋعا ارنادى. وسى كەزدە كاسپي تەڭىزى جاعالاۋىنداعى قازاقتاردىڭ تىنىس-تىرشىلىگىمەن تانىستى.
كيزەۆەتتەر بوكەي ورداسىندا ءۇش ايداي ايالدادى. وسى كەزدە «قازاق حانىنىڭ بالاسى», «حاننىڭ ايەلى», ت.ب. كارتينالارىن سالدى. نەمىس سۋرەتشىسى بوكەي ورداسىندا بولسا, دەمەك اتالعان كارتينالارداعى – حاننىڭ تۋىستارى. سوندا «قازاق حانىنىڭ بالاسى» جاڭگىر حاننىڭ قاي ۇلى بولۋى مۇمكىن؟ وسى سۇراقتى حان ۇرپاقتارى تۋرالى زەرتتەپ جۇرگەن تاريحشى عالىم نۇرجان تولەپوۆكە قويعان ەدىك. ونىڭ ايتۋىنشا, «قازاق حانىنىڭ بالاسى» كارتيناسىندا بەينەلەنگەن جاڭگىر حاننىڭ تۇڭعىشى ساقىپكەرەي سۇلتان ەكەن.
«مەن بۇل تاقىرىپتى 2003 جىلدان بەرى زەرتتەپ كەلەمىن. پورترەت سالىنعانىن بىلگەنمەن, قايدا ەكەنىن تابا الماي ءجۇر ەدىم. ءارتۇرلى مۋزەيلەر ايتىلاتىن. بىرەسە درەزدەن, بىرەسە بەرلين قالاسىنداعى مۋزەي دەلىنەتىن, – دەپ باستادى اڭگىمەسىن نۇرجان تولەپوۆ. – حاننىڭ مۇراگەر ۇلى بولعان سوڭ, پورترەتى جازىلعان. 1844 جىلى ساقىپكەرەي 15 جاستا بولادى. ساقىپكەرەيدىڭ تۋعان جىلى تاريxي دەرەكتەردە 1830/1831 دەپ جازىلعان. ولاي بولسا 12-13 جاستاعى بالاعا ۇقسايدى. سونىمەن قاتار سۋرەت بىرنەشە اي سالىنۋى مۇمكىن».
جاڭگىر حان 1845 جىلى قازا تاپسا, 4 جىلدان كەيىن, ياعني 1849 جىلى پەتەربورداعى پاج كورپۋسىن ۇزدىك بىتىرگەن ۇلى ساقىپكەرەي دە كوز جۇمدى. بۇل كەزدە ونىڭ جاسى 20-عا دا جەتپەگەن بولاتىن. ساقىپكەرەي حان تاعىنىڭ زاندى مۇراگەرى ەدى. بوكەي ورداسىنىڭ جاڭگىردەن كەيىنگى حانى دا وسى ساقىپكەرەي بولۋعا ءتيىستى. الايدا حاندىق بيلىكتى جۇرگىزۋ وعان بۇيىرمادى.
