استانا. 25 ناۋرىز. جوعارى حوككەي ليگاسىندا ەل نامىسىن قورعايتىن قاراعاندىنىڭ «سارىارقاسى» جارىستىڭ جارتىلاي فينالىنا شىقتى. شيرەك فينالدىڭ جەتىنشى ويىنىندا ءبىزدىڭ كوماندا انگارسكىنىڭ «ەرماگىن» 4:0 ەسەبىمەن جەڭدى. بۇل تۋرالى egemen.kz حابارلادى.
قوس كوماندا اراسىنداعى شەشۋشى ويىن قاراعاندىدا ءوتتى. ماتچتىڭ 2-مينۋتىندا ايدىن يەلەرى ساپىنان ءبىر ويىنشى كىشى ايىپپەن جازالاندى. دەسەك تە, «ەرماك» حوككەيشىلەرى بۇل مۇمكىندىكتى پايدالانا المادى. قايتا, ايدىندا ءتورت ويىنشىمەن ءجۇرىپ-اق «سارىارقا» ەسەپ اشاتىن مۇمكىندىك تاپتى. شايبانىڭ اۆتورى – ەۆگەني رىمارەۆ. العاشقى ۇزىلىسكە دەيىن تاعى ءبىر شايبا سوققان قاراعاندىلىقتار ەسەپتى 2:0-گە جەتكىزدى. بۇل جولى ميحايل پانشين مەرگەندىگىمەن كوزگە ءتۇستى.
ەكىنشى كەزەڭدە جانكۇيەرلەر گول كورە المادى. ال سوڭعى كەزەڭدە «سارىارقا» تاعى ەكى مارتە قارسىلاستارىن قاپى قالدىردى. كەزدەسۋدىڭ 52 جانە 54-مينۋتتارىندا گول سوققان دەنيس ستاسيۋك بولاتىن.
ويىننىڭ قالعان بولىگىندە ەسەپ وزگەرمەي, قاراعاندىنىڭ كومانداسى ءىرى ەسەپپەن جەڭىسكە جەتتى. ناتيجەسىندە, قوس كوماندا اراسىنداعى جالپى ەسەپ ءبىزدىڭ پايدامىزعا 4:3 بولدى.
ەندى «سارىارقا» جارتىلاي فينالدا نەفتەكامسكىنىڭ «توروسىمەن» كۇش سىناسادى. ءتورت جەڭىسكە دەيىن جالعاساتىن سەريانىڭ العاشقى ەكى ويىنى 28-29 ناۋرىزدا قاراعاندىدا وتەدى. ەگەر كەزدەسۋ تاعدىرى جەتىنشى ويىندا شەشىلەر بولسا, اتالعان ماتچتى «سارىارقا» ءوز الاڭىندا وتكىزەدى. مۇنداي باسىمدىققا لەونيد تامبيەۆتىڭ شاكىرتتەرى ماۋسىم بارىسىندا كورسەتكەن ناتيجەسىنىڭ ەسەبىنەن يە بولىپ وتىر. جارتىلاي فينالدىڭ كەلەسى جۇبىن يجەۆسكىنىڭ «ءيجستالى» مەن تۆەردىڭ تحك كوماندالارى قۇرادى.
ايتا كەتەيىك, ەگەر «سارىارقا» بيىلعى ماۋسىمدا دا فينالعا شىعار بولسا, «براتينا» كۋبوگى ءۇشىن وتكەن سايىستىڭ شەشۋشى باسەكەسىندە قاتارىنان ءۇش رەت ويناۋعا مۇمكىندىك الادى. اتالعان كۋبوكتىڭ قازىرگى يەگەرلەرى قاراعاندىنىڭ كومانداسى ەكەنى بەلگىلى.
ەلامان قوڭىر.
دەرەك: egemen.kz.
سۋرەت: hc-saryarka.com.
