سۋرەتتى تۇسىرگەن – ەرلان ومار, «EQ»
مەملەكەتتىك قولداۋدىڭ بۇل ءتۇرى ەلىمىزدە 1999 جىلى ەنگىزىلگەن. بۇگىندە حالىقتى الەۋمەتتىك قورعاۋ جۇيەسىنىڭ ماڭىزدى بولىگى سانالادى. ارناۋلى مەملەكەتتىك جاردەماقى الۋعا قۇقىلى ازاماتتاردىڭ 17 ساناتى زاڭنامادا بەلگىلەنگەن. تارقاتىپ ايتساق, ولاردىڭ قاتارىندا ەكىنشى دۇنيەجۇزىلىك سوعىس ارداگەرلەرى مەن باسقا مەملەكەتتەردىڭ اۋماعىندا وتكەن اسكەري ءىس-قيمىلدارعا قاتىسقان ارداگەرلەر, سوعىس ارداگەرلەرىنە تەڭەستىرىلگەن ازاماتتار, ەكىنشى دۇنيەجۇزىلىك سوعىس كەزىندە قازا تاپقان جاۋىنگەرلەردىڭ ايەلدەرى مەن قازا تاپقان اسكەري قىزمەتكەرلەردىڭ وتباسى مۇشەلەرى, «حالىق قاھارمانى», «قازاقستاننىڭ ەڭبەك ەرى» اتاقتارىنا يە بولعاندار, تىل ەڭبەككەرلەرى, چەرنوبىل اتوم ەلەكتر ستانساسىنداعى اپاتتىڭ سالدارىن جويۋعا قاتىسقاندار, ساياسي قۋعىن-سۇرگىن قۇرباندارى, مۇگەدەكتىگى بار ادامدار, ەل الدىنداعى ەرەكشە ەڭبەگى ءۇشىن زەينەتاقى تاعايىندالعان ازاماتتار بار.
اي سايىن تۇسەتىن تولەمدەردىڭ مولشەرى جاردەماقى الاتىنداردىڭ ساناتىنا بايلانىستى 2,13-تەن 138,63 ايلىق ەسەپتىك كورسەتكىشكە دەيىن وزگەرىپ وتىرادى. ارناۋلى مەملەكەتتىك جاردەماقى مولشەرى جىل سايىن اەك مولشەرىنىڭ ارتۋىنا بايلانىستى, رەسپۋبليكالىق بيۋدجەت تۋرالى زاڭدا بەلگىلەنگەن تارتىپپەن كوتەرىلەدى. ەسكەرەتىن جايت, ەگەر ازامات بىرنەشە نەگىزبەن ارناۋلى مەملەكەتتىك جاردەماقى الۋعا قۇقىلى بولسا, وندا جاردەماقى تەك ولاردىڭ بىرەۋى بويىنشا عانا تولەنەدى. بۇل رەتتە تولەم الاتىن تۇلعانىڭ ءوز تاڭداۋى باسشىلىققا الىنادى. تاڭقالارلىعى, ەلىمىزدە تۇراقتى تۇراتىن شەتەلدىكتەر مەن ازاماتتىعى جوق تۇلعالار دا ەل ازاماتتارىمەن تەڭ دارەجەدە ارناۋلى مەملەكەتتىك جاردەماقى الۋعا قۇقىلى. قۇلاققاعىس رەتىندە ايتساق, ارناۋلى مەملەكەتتىك جاردەماقى تاعايىنداۋ ءۇشىن ءوتىنىشتى eGov.kz پورتالى ارقىلى نەمەسە حالىققا قىزمەت كورسەتۋ ورتالىقتارىنا بارىپ تولتىرۋعا بولادى.
