بىلتىر وقۋ كابينەتتەرى مەن شەبەرحانالارى, سۋ, كارىز, جىلىتۋ جەلىلەرى تۇگەل جاڭارتىلىپ, ماتەريالدىق-تەحنيكالىق بازاسى كۇشەيتىلدى. كوللەدج ديرەكتورى گۇلدەن ەسەنعاليەۆانىڭ ايتۋىنشا, ستۋدەنتتەر ەلەكترمەحانيكالىق جابدىقتارعا تەحنيكالىق قىزمەت كورسەتۋ, دانەكەرلەۋ ءىسى, عيماراتتار قۇرىلىسى, تۇرعىن ءۇي-كوممۋنالدىق شارۋاشىلىق نىساندارىنىڭ ينجەنەرىك جۇيەلەرىن مونتاجداۋ جانە پايدالانۋ ماماندىقتارى بويىنشا ءبىلىم الادى.
وقۋ ورنىندا 680 ستۋدەنت وقىسا, ولاردىڭ تەڭ جارتىسى دۋالدى وقىتۋ جۇيەسىنە كوشىرىلگەن. تۇلەكتەرىنىڭ جۇمىسقا ورنالاسۋ كورسەتكىشى – 88 %-عا تەڭ.
ءوڭىر باسشىسى اسحات شاحاروۆ كۇردەلى جوندەۋدەن وتكەن قۇرىلىس-تەحنيكالىق كوللەدجىنىڭ وقۋ كابينەتتەرىن, شەبەرحانالارى مەن زەرتحانالارىن ارالاپ, ساتىپ الىنعان قۇرال-جابدىقتاردى قالاي پايدالانىپ وتىرعانىن باقىلاپ, تۇلەكتەردىڭ كاسىبي دايارلىق دەڭگەيىن سۇرادى. بۇل جەردە 34 جىل ءۇزىلىسسىز ەڭبەك ەتىپ كەلە جاتقان كۇلحان ەشمانوۆا كەيىنگى جىلدارى ورتا جانە كاسىپتىك-تەحنيكالىق وقۋ ورىندارىنىڭ ماتەريالدىق-تەحنيكالىق بازاسىن كۇشەيتۋدە قىرۋار ءىس اتقارىلىپ جاتقانىنا ريزاشىلىعىن ءبىلدىردى. تاجىريبەلى پەداگوگ ستۋدەنتتەردىڭ بولاشاق ماماندىعىنىڭ قىر-سىرىن مەڭگەرۋىنە قۇرال-جابدىقتارمەن جۇمىس ىستەي ءبىلۋ ماڭىزدى ەكەنىن ايتتى. ويتكەنى تۇلەك وندىرىسكە بارار الدىندا قۇرىلىس قوسپالارىنىڭ قۇرامىن, ولاردى قالاي جاساي ءبىلۋ سىرىن شەبەرحانادا ۇيرەنىپ, ەلەكتر جانە گازبەن دانەكەرلەۋ جابدىقتارىمەن جۇمىس ىستەي ءبىلۋى شارت. «شاكىرت ءوز ماماندىعىنىڭ نەگىزگى باعىتتارىن جاقسى مەڭگەرسە, جۇمىسقا توسەلۋى دە تەز», دەيدى تاجىريبەلى ۇستاز. سول ءۇشىن كوللەدجدەرگە وندىرىستەن كەلگەن شەبەرلەردى كوپتەپ تارتۋ كەرەك.
وبلىس ورتالىعىندا 90 جىلعا جۋىق ۋاقىت ۇزدىكسىز ءبىلىم بەرىپ كەلە جاتقان مەكتەپتەر بار. سولاردىڭ ءبىرى – قالانىڭ ەسكى بولىگىندە ورنالاسقان ءى.ەسەنبەرلين اتىنداعى №15 مەكتەپ. 1939 جىلى سالىنعان عيماراتتا بۇگىندە 574 بالا وقيدى. بىلتىر قايتا جاڭارتۋ جۇمىستارى جۇرگىزىلىپ, عيماراتتىڭ قاسبەتى مەن شاتىرى تۇگەلدەي جاڭارتىلىپ, ەدەنى مەن جىلۋ جانە كارىز جۇيەلەرى تۇگەل الماستىرىلدى. سونداي-اق وقۋ كابينەتتەرى, كىتاپحاناسى مەن سپورتزالى, اسحاناسى جاڭارتىلىپ, زاماناۋي جابدىقتار ساتىپ الىندى. كىرپىشتەن سالىنعان مەكتەپ ءالى دە ۇزاق جىلعا شىداس بەرەتىن ءتۇرى بار. اقتوبە قالاسىندا 70–80 جىلدىڭ تاريحى بار ەسكى ءبىلىم بەرۋ ۇيىمدارىن جاڭارتۋ بيىل دا جالعاسادى. وقۋ جىلى اياقتالىسىمەن قالاداعى №5, №17, №22,№37 مەكتەپتەرىن كۇردەلى جوندەۋ باستالادى. سونداي-اق بيىل ايتەكە بي, بايعانين, تەمىر, شالقار اۋداندارىنىڭ بىرقاتار ەسكى مەكتەپتەرى عيماراتتارىنا دا قايتا جاڭارتۋ جۇمىستارى جۇرگىزىلمەكشى.
اقتوبە وبلىسى
