دەسانت بارلاۋشى بولۋ كەز كەلگەن اسكەري قىزمەتشىنىڭ قولىنان كەلە بەرمەيدى. الدىمەن قاتاڭ ىرىكتەۋ جۇرگىزىلەدى. ۇمىتكەردىڭ دەنساۋلىعى, فيزيكالىق دايىندىعى عانا ەمەس, پسيحولوگيالىق ساۋلىعى دا باستى نازارعا الىنادى. سەبەبى بارلاۋشى كوبىنە قاۋىپتى ورتادا سترەسسكە ءتوزىمدى, وقشاۋ جاعدايدا جەدەل ارەكەت ەتۋگە ءتيىس. جاۋىنگەردىڭ دەربەس شەشىم قابىلداي ءبىلۋى دە ەسكەرىلەدى.
دايارلىقتىڭ نەگىزگى بولىگى فيزيكالىق جاتتىعۋلارعا ارنالعان. ۇزاق مارشتار, اۋىر جابدىقپەن قوزعالۋ, كەدەرگىلەر جولاعىنان ءوتۋ – كۇندەلىكتى ماشىق. بۇل بارلاۋشىنىڭ توزىمدىلىگىن شىڭداپ قانا قويماي, كەز كەلگەن جاعدايدا كەدەرگىلەردى ەڭسەرىپ, تاپسىرمانى ورىنداۋعا بەيىمدەيدى.
سونىمەن قاتار تاكتيكالىق ساباقتاردا جاسىرىن قوزعالۋ, قارسىلاس اۋماعىندا باقىلاۋ جۇرگىزۋ, بارلاۋ دەرەكتەرىن جيناۋ مەن جەتكىزۋ تاسىلدەرى ۇيرەتىلەدى. ويتكەنى بەتالدى شابۋىل جاساماس بۇرىن ستراتەگيالىق تۇرعىدا جاۋدىڭ كۇشىن انىقتاپ, تەحنيكالىق الەۋەتىن باعالاۋ كەرەك. سوندىقتان جاتتىعۋلار كۇندىز-ءتۇنى, ءارتۇرلى اۋا رايىندا وتەدى.
قازىر قوناەۆ قالاسى ماڭىنداعى دەسانتتىق-شابۋىلداۋ اسكەرلەرىنىڭ وقۋ-جاتتىعۋ ورتالىعىندا الماتى, قوناەۆ, جەتىسۋ گارنيزوندارىنىڭ بارلاۋ بولىمشەلەرىنە جوسپارلى دالالىق جيىن ءوتىپ جاتىر. بۇل وقۋ-جاتتىعۋ ورتالىعى مەرزىمدى قىزمەتتەگى جانە كەلىسىمشارت بويىنشا اسكەري قىزمەتشىلەردى كەشەندى دايارلاۋعا ارنالعان زاماناۋي ينفراقۇرىلىممەن تولىق جابدىقتالعان. ساباقتار قاۋىپسىزدىك تالاپتارىنا ساي, ۇرىس جاعدايىنا بارىنشا بەيىمدەلىپ ۇيىمداستىرىلعان.
«قالقان» لاقاپ اتىن يەلەنگەن مايوردىڭ ايتۋىنشا, دالالىق جورىقتار جاۋىنگەرلىك ءارى تاكتيكالىق-ارنايى دايىندىق داعدىلارىن پىسىقتاۋعا, بولىمشە قۇرامىندا ارەكەت ەتۋگە, ەڭ ماڭىزدىسى – جاتتىعۋلاردا ولاردىڭ توزىمدىلىگى, ەپتىلىگى مەن رەاكتسيا جىلدامدىعى دامىتۋعا ارنالعان.
جيىن اياسىندا دەسانتشىلار بازالىق لاگەرلەردى ورنالاستىرۋ ەرەجەسىن مەڭگەرىپ, بايلانىس قۇرالدارىنىڭ ءار ءتۇرىن, مينالاۋ-جارۋ ءىسىنىڭ ەلەمەنتتەرىن, تاكتيكالىق مەديتسينا مەن ۇشقىشسىز ۇشاتىن قۇرىلعىلاردى باسقارۋدى ۇيرەنىپ جاتىر. ودان بولەك, اۆتومات, تاپانشا, پۋلەمەت پەن دراگۋنوۆ مەرگەندىك ۆينتوۆكاسىنان وق اتۋ جاتتىعۋلارى وتكىزىلەدى.
اسكەري قىزمەتشىلەر قاراۋىلداردى جاسىرىن تۇردە جويۋ تاسىلدەرىن, پىشاق پەن ساپەر كۇرەگىن لاقتىرۋ ادىستەرىن دە پىسىقتايدى. بارلاۋ بولىمشەلەرى بۇركەمەلەنگەن باقىلاۋ ورىندارىنان قاداعالاۋ جۇرگىزۋگە, توپ قۇرامىندا ارەكەت ەتۋگە, شارتتى قارسىلاستى كۇشپەن ۇستاۋعا, جەرگىلىكتى جەردى باعدارلاۋعا, ترانشەيا مەن ويلى-قىرلى جەردە ۇرىس جۇرگىزۋگە جاتتىعادى.
بۇگىندە جەكە قۇرامنىڭ تاعىلىمداماسى مەن كاسىبي وسۋىنە ەرەكشە نازار اۋدارىلىپ كەلەدى. كۇزدە اسكەرگە الىنعان ساربازدار اراسىندا ۇزدىك ناتيجەلەر كورسەتكەن اسكەري قىزمەتشىلەر دە بار. سولاردىڭ ءبىرى – نوگەربەك تاتىمبەك.
ول نەبارى ءۇش اي قىزمەت ەتكەننەن كەيىن كىشى سەرجانت اتاعىن الىپ, بولىمشە كومانديرى بولىپ تاعايىندالدى. ساربازدىڭ سوزىنشە, دالالىق جاعدايداعى ساباقتار بارلاۋشى قىزمەتىنىڭ ءمانىن تەرەڭ تۇسىنۋگە مۇمكىندىك بەرىپ, جاۋاپكەرشىلىك پەن جاۋىنگەرلىك رۋحتى قالىپتاستىرادى.
«اڭدىپ باسىپ, كەز كەلگەن باعىتتا ارەكەت ەتۋگە ءازىر بولۋ بارلاۋشىلاردىڭ ماقساتى. ال ونى ىسكە اسىرۋ ءۇشىن ءبىز ءتۇرلى سىناقتان وتەمىز. كەدەرگىلەردەن وتپەس بۇرىن پسيحولوگيالىق تۇرعىدا دايىن بولۋىمىز مىندەتتى. جەرگىلىكتى اۋماقتىڭ جاعدايىنا قاراي ارەكەت ەتۋ, سانا-سەزىمنىڭ اشىقتىعىن تالاپ ەتەدى. دالالىق جيىندار بولىمشەلەردىڭ جاۋىنگەرلىك ازىرلىگىن ارتتىرۋعا, جەكە قۇرامنىڭ مورالدىق-پسيحولوگيالىق احۋالىن نىعايتۋ مەن بارلاۋشىلاردىڭ كاسىبي قۇزىرەتىن شىڭداي تۇسەدى», دەيدى ول.
كىشى سەرجانت تاتىمبەك جوعارى وقۋ ورنىن «كەدەن ءىسى» ماماندىعى بويىنشا تامامداعان. اعاسىنىڭ كەڭەسىمەن جاۋىنگەر دەسانتتىق-شابۋىلداۋ اسكەرلەرىندە قىزمەت ەتۋدى تاڭداعان. اسكەري قىزمەتشى كيوكۋشينكاي كاراتەدەن قارا بەلبەۋ يەگەرى ءارى 2024 جىلعى الەم چەمپيونى. بولاشاقتا كەلىسىمشارت نەگىزىندە قىزمەتىن جالعاستىرۋدى جوسپارلاپ وتىر.
