قازىر نىساندا قۇرىلىس جۇمىستارى توقتاپ تۇر, بۇعان قارجىنىڭ جەتىسپەۋى سەبەپ. سونىڭ سالدارىنان قالاداعى سۋ جۇيەسىنە تۇسەتىن جۇكتەمە جىل سايىن ارتىپ, اسىرەسە جاز مەزگىلىندە سۋ تاپشىلىعىن ايقىن سەزىنەمىز دەيدى ءوڭىر تۇرعىندارى.
«جازدا جاعداي ءتىپتى قيىندايدى. اسىرەسە 9 قاباتتى ۇيلەردىڭ جوعارعى قاباتتارىنا سۋ مۇلدە كوتەرىلمەيدى, قىسىم جوق. كەي كەزدەرى كراندى اشىپ قويامىز, سۋ اقپايدى, ءسويتىپ سۋعا جارىماي, تاڭداي كەبەرسيتىن كۇندەر بولادى. كەڭدالا مەن اقدالا اۋىلىنداعى ساياجايلاردىڭ جاعدايى ودان دا قيىن. قالا كۇن سايىن ءوسىپ جاتىر, ال سۋ جۇيەسى باياعى قاز-قالپىندا. شىنىمىزدى ايتساق, جىل سايىن ايتىلعانمەن, شەشىم تاپپايتىن بۇل ماسەلەدەن ابدەن شارشادىق. ەندى وسى سۋ تاراتقىشتىڭ تەزىرەك ءبىتىپ, ىسكە قوسىلۋىن اسىعا كۇتەمىز. باسقا ءۇمىت قالمادى», دەيدى قالا تۇرعىنى احات سولتانقۇلوۆ
ماگيسترالدىق سۋ تاراتقىش – تالعار قالاسىنا سۋ جەتكىزەتىن نەگىزگى جۇيە. بۇل جوبا ىسكە قوسىلعان جاعدايدا, ەسكى قۇبىرلار مەن توزعان ينفراقۇرىلىمعا تۇسەتىن جۇكتەمە ازايىپ, قالا تۇراقتى ءارى جەتكىلىكتى كولەمدە اۋىزسۋمەن قامتىلۋعا ءتيىس. الايدا قۇرىلىس تولىق اياقتالماعاندىقتان قالا ءالى دە بۇرىنعى جۇيەگە تاۋەلدى بولىپ وتىر.
الماتى وبلىسىنا ىسساپارمەن كەلگەن ءماجىلىس دەپۋتاتتارى ماكسيم روجين مەن دانيار قاسقاراۋوۆ تالعار قالاسىنا ارنايى ات باسىن بۇرىپ, ماسەلەنىڭ مانىسىمەن تانىستى.
«قازىر تالعار قالاسىندا بار بولعانى 4 300 تەكشە مەترلىك رەزەرۆۋارلىق قۋات جۇمىس ىستەپ تۇر. بۇل, اسىرەسە جاز مەزگىلىندە قالا ءۇشىن جەتكىلىكسىز. ال جاڭا جۇيە تولىق ىسكە قوسىلعان جاعدايدا قوسىمشا 7 600 تەكشە مەترگە دەيىن سۋ جەتكىزۋگە مۇمكىندىك بولادى. جوبا اياسىندا ءتورت رەزەرۆۋار سالىنعانىمەن, سۋ ساپاسىن باقىلاۋعا ارنالعان زەرتحانا جارتى جولدا توقتاپ قالعان. ونىڭ ىشىندەگى نەگىزگى جابدىقتار ءالى ورناتىلماعان. سەبەبى وعان قارجى بولىنگەن جوق», م.روجين.
اتالعان جوبانىڭ جالپى قۇنى 4,6 ملرد تەڭگەنى قۇرايدى. الايدا قۇرىلىستى تولىق اياقتاۋعا قاجەت شامامەن 1,7 ملرد تەڭگە ءالى بيۋدجەتتەن بولىنبەگەن. بۇل قاراجاتقا سۋدى حلورلايتىن جابدىقتار, زەرتحانالىق قۇرالدار جانە نەگىزگى تەحنولوگيالىق قۇرىلعىلار ساتىپ الىنۋعا ءتيىس. قارجى تۇسپەگەندىكتەن, وسى جابدىقتار الىنباي, قۇرىلىس جۇمىستارى توقتاپ تۇر.
ءماجىلىس دەپۋتاتتارى تالعارداعى ماگيسترالدىق سۋ تاراتقىشتى باقىلاۋعا الاتىندارىن مالىمدەدى. ولار جەتپەي تۇرعان قارجىنى بيۋدجەتتەن تولىق ءارى ۋاقىتىندا ءبولدىرۋ ءۇشىن جاۋاپتى مەملەكەتتىك ورگاندارمەن ناقتى جۇمىس جۇرگىزىلەتىنىن ايتتى. سونداي-اق بۇل نىساندى الەۋمەتتىك ماڭىزى بار ستراتەگيالىق جوبا رەتىندە بەلگىلەنگەن مەرزىمدە اياقتاۋدى باستى ماقسات ەتىپ وتىر. اتالعان جوبا تولىق ىسكە اسقان جاعدايدا, شامامەن 50 مىڭعا جۋىق تۇرعىن ورتالىقتاندىرىلعان, تۇراقتى ءارى ساپالى اۋىزسۋمەن قامتىلاتىن بولادى.
الماتى وبلىسى,
تالعار اۋدانى
