ءوڭىردىڭ ون ەكى اۋدانىندا شاعىن ورمان تالىمباقتارىن ۇيىمداستىرۋ, وسى جەردە وسكەن كوشەتتەردى ەلدىمەكەندەردىڭ اينالاسىنا جەرسىندىرۋ جۇمىستارى ەرتە كوكتەمنەن باستاپ قولعا الىنباقشى. سونداي-اق «قازاۆتوجول» اق مەن «قازاقستان تەمىرجولى» ۇلتتىق كومپانياسى وڭىرلىك فيليالدارىنىڭ قىزمەتكەرلەرى اۆتوكولىك جانە تەمىرجول بويىنداعى ورمان بەلدەرۋلەرىن قالپىنا كەلتىرۋدى باستايدى, دەپ حابارلايدى.
تابيعي رەسۋرستار جانە تابيعاتتى پايدالانۋدى رەتتەۋ باسقارماسىنىڭ باسشىسى يساتاي ەسپاعانبەتوۆتىڭ حابارلاۋىنشا, 2021-2025 جىلدار ارالىعىندا وبلىس اۋماعىندا 500 مىڭ كوشەت وتىرعىزىلعان. وڭىردەگى ورمان شارۋاشىلىعى مەكەمەلەرى ماماندارى تالىمباقتا كوبەيگەن كوشەتتەردى كوكتەمدە جانە كۇزدە جەرسىندىرۋمەن اينالىسادى.
«بىلتىر تابيعات قورعاۋشىلارمەن بىرلەسە جاسىل جەلەكتەردى تۇگەندەۋ جۇمىستارى جۇرگىزىلدى. قولدان ەگىلگەن تال-تەرەكتەردىڭ جەرسىنۋ دەڭگەيى شامامەن 60-70 %-دى قۇرايدى. وسىعان بايلانىستى تامشىلاتىپ سۋارۋ جۇيەسىن كەڭىنەن قولدانۋ جانە اپتاپ ىستىقتا شولگە ءتوزىمدى تۇرلەرىن وتىرعىزۋ ماڭىزدى. وتىرعىزىلعان جاسىل جەلەكتىڭ كۇتىمى ءۇشىن وسى ەكى ماسەلەگە نازار اۋدارامىز», دەيدى يساتاي ەسپاعانبەتوۆ.
بيىل اقتوبە قالاسىندا 15 گەكتار, ال ءار اۋدان ورتالعىندا 1 گەكتاردان جاسىل ايماق بەلدەۋىن قۇرۋ جوسپارعا ەنگىزىلدى. جاز بويى جاسىل جەلەكتەردى كۇتىپ-باپتاۋ جۇمىستارىنا ۆولونتەرلىك توپتار, «تازا قازاقستان» اكتسياسىنىڭ قاتىسۋشىلارى, ورمان شارۋاشىلىعى مەكەمەلەرىنە وندىرىستىك تاجىريبەدەن وتۋگە كەلگەن ستۋدەنتتەر جۇمىلدىرىلادى.
