اۋرۋحانانىڭ باس دارىگەرى دينارا ءجۇمادىلوۆانىڭ ايتۋىنشا, شەبەرلىك ساعاتىنىڭ نەگىزگى ماقساتى – دارىگەرلەر اراسىندا ءوزارا تاجىريبە الماسۋ. سونىمەن قاتار ەمدەۋ مەكەمەسىن بولاشاقتا زاماناۋي تەحنولوگيالارمەن جابدىقتاۋ جوسپارلانعان. بۇل جۇرەك اقاۋى بار بالالارعا وسىنداي كۇردەلى وپەراتسيالاردى كەدەرگىسىز جاساۋعا مۇمكىندىك بەرەدى. تاجىريبە الماسۋ بارىسىندا كارديوحيرۋرگتەر جاساندى قان اينالىمى جاعدايىندا قارىنشاارالىق پەردە اقاۋىن پلاستيكالاۋ, اشىق ارتەريالىق وزەكتى بايلاۋ, اشىق سوپاقشا تەسىكتى تىگۋ, تريكۋسپيدالدى قاقپاشانى قالپىنا كەلتىرۋ سەكىلدى كۇردەلى پروتسەدۋرالاردى جۇزەگە اسىردى. شەتەلدىك قوناقتار – بەلارۋس رەسپۋبليكالىق بالالار حيرۋرگياسى عىلىمي-پراكتيكالىق ورتالىعىنىڭ جەتەكشى ماماندارى.
«وپەراتسيا جاساۋ ارقىلى ءبىز بالانى قالىپتى ومىرگە قايتارامىز. قازىر مەديتسينانىڭ دامىعان كەزى. ەگەر قۇرساقتاعى ءسابيدىڭ اسقازان نەمەسە ىشەك جولدارىنان اقاۋ انىقتالسا, ول ومىرگە كەلمەي جاتىپ تا وپەراتسيا جاسالا بەرەدى. بىراق مۇنداي وپەراتسيالار كوبىنە استانا, الماتى قالالارىندا جۇرگىزىلەتىن. بۇگىندە قالالىق دەنساۋلىق ساقتاۋ باسقارماسىنىڭ قولداۋىمەن شىمكەنتتىڭ پەريناتالدىق ورتالىعىندا دا وسىنداي كۇردەلى ەمشارالار قولعا الىنىپ جاتىر», دەدى د.ءجۇمادىلوۆا.
باس دارىگەردىڭ سوزىنە سۇيەنسەك, قالالىق كلينيكالىق بالالار اۋرۋحاناسى جانىنان بىلتىر اقپاندا اشىلعان كارديوحيرۋرگيا بولىمشەسىندە وسى ۋاقىتقا دەيىن 16 بالانىڭ جۇرەگىنە اشىق وپەراتسيا جاسالعان. بۇرىن مۇنداي ناۋقاستار رەسپۋبليكالىق ورتالىقتارعا نەمەسە تۇركىستان وبلىستىق اۋرۋحاناسىنا جولداناتىن. ال جەڭىل تۇرلەرىنە انگيوگراف اپپاراتى ارقىلى سان تامىرىنان وپەراتسيا جاسالادى.
مامانداردىڭ پىكىرىنشە, كەيىنگى جىلدارى جۇرەك اقاۋىمەن تۋاتىن سابيلەر سانى ازايىپ كەلەدى. بۇل – جۇكتى ايەلدەردىڭ ۋاقتىلى سكرينينگتەن ءوتۋى مەن الدىن الۋ شارالارىنىڭ ناتيجەسى. دەگەنمەن قانى ازدىق, جوعارى قان قىسىمى, جۇكتىلىك كەزىندەگى ۆيرۋستىق ينفەكتسيالار ءالى دە قاۋىپ فاكتورى بولىپ قالا بەرەدى.
ايتا كەتەيىك, يگى ىسكە «BI Group» قۇرىلىس حولدينگى مۇرىندىق بولدى. شەتەلدىك مامانداردى شاقىرۋ, ولاردىڭ جاتىن ورنى مەن قالاماقىسىن تولەۋ سەكىلدى شىعىنداردى كومپانيا تولىقتاي ءوز موينىنا العان. حولدينگكە قاراستى «BI جۇلدىزاي» قورىنىڭ مەديتسينا جونىندەگى ديرەكتورى, «مۇمكىندىك» جوباسىنىڭ جەتەكشىسى ۇلجالعاس مۇحامبەتوۆانىڭ ايتۋىنشا, 2013 جىلى باستاۋ العان بۇل قايىرىمدىلىق جوباسى قازىر ەلىمىزدىڭ 9 قالاسىندا جۇمىس ىستەيدى. جوبانىڭ باستى مىندەتى – ناۋقاس بالالارعا قىمبات وپەراتسيالاردى تەگىن جاساتۋ, وتاندىق دارىگەرلەردىڭ بىلىكتىلىگىن ارتتىرۋ. ماسەلەن, بىلتىر كومپانيانىڭ 30 جىلدىعىنا وراي جوسپارلانعان 300 وپەراتسيانىڭ ورنىنا 325 كۇردەلى وپەراتسيا جاسالىپ, مەجە اسىرا ورىندالعان. وسى ماقساتتا تۇركيا, جاپونيا, رەسەي, وزگە دە ەلدەردەن بىلىكتى ماماندار شاقىرتىلعان.
بەلارۋستىك انەستەزيولوگ-رەانيماتولوگ الەكسەي تسيلكو بىلتىر اقپان ايىندا شىمكەنتتە بولعانىن ەسكە الدى. ونىڭ باعالاۋىنشا, ءبىر جىل ىشىندە جەرگىلىكتى كارديوحيرۋرگيا بولىمشەسىنىڭ جابدىقتالۋى مەن مامانداردىڭ كاسىبي دەڭگەيى ەداۋىر وسكەن.
«جالپى, ستاتيستيكا بويىنشا, ومىرگە كەلەتىن سابيلەردىڭ شامامەن 1,5%-ى جۇرەك اقاۋىمەن تۋادى. بۇل كورسەتكىش دەموگرافيالىق وسىمگە بايلانىستى وزگەرۋى مۇمكىن. اقاۋدىڭ ناقتى سەبەبى بەلگىسىز بولعانىمەن, ەكولوگيا, دۇرىس تاماقتانباۋ, كۇيزەلىس نەگىزگى فاكتورلار رەتىندە قاراستىرىلادى. ءبىز وتكىزگەن ءۇش وپەراتسيانىڭ ەكەۋىن جەرگىلىكتى حيرۋرگتەردىڭ وزدەرى جاسادى, بۇل ولاردىڭ تاجىريبەسى مەن شەبەرلىگى ارتقانىن كورسەتەدى», دەدى ا.تسيلكو.
بەلارۋس ماماندارى ءۇش كۇنگە سوزىلعان ساپار بارىسىندا بارلىعى 6 بالاعا كۇردەلى وپەراتسيا جاسادى.
شىمكەنت
