سالتاناتتى جيىندا ءبىرىنشى بولىپ ءسوز العان ليتسەي ديرەكتورى گۇلشات قالتاەۆا «بولاشاق پروكۋرورلار كلۋبىنىڭ» اشىلۋىن مەكتەپتەگى ماڭىزدى كەزەڭ رەتىندە اتاپ ءوتتى. ونىڭ ايتۋىنشا, وقۋ وشاعى ءبىلىم بەرۋمەن عانا شەكتەلمەي, وقۋشىلاردى زاڭدى قۇرمەتتەيتىن, قوعام الدىنداعى جاۋاپكەرشىلىكتى سەزىنەتىن بەلسەندى ازامات ەتىپ تاربيەلەۋگە باسىمدىق بەرىپ كەلەدى.
«اتالعان كلۋبتىڭ نەگىزگى ماقساتى – وقۋشىلاردىڭ قۇقىقتىق ساۋاتتىلىعىن ارتتىرۋ, تارتىپكە باۋلۋ جانە كاسىبي باعدار بەرۋ. وسى يگى باستامانى جۇزەگە اسىرۋ ماقساتىندا استانا قالاسى سارايشىق اۋدانىنىڭ اۋداندىق پروكۋراتۋراسى قالاداعى 17 مەكتەپتەن ەڭ ۇزدىك 17 وقۋشىنى ىرىكتەپ, كلۋب مۇشەلىگىنە قابىلداپ, سالتاناتتى تۇردە سەرتيفيكاتتارمەن ماراپاتتاعان ەدى. بۇگىن, مىنە, وسى باستامانىڭ جالعاسى رەتىندە مەكتەبىمىزدىڭ وقۋشىلارىن وتەگەن سەيىتوۆ اتىنداعى «جاس پروكۋرورلار» كلۋبىنىڭ قاتارىنا قابىلداۋ ءراسىمىن وتكىزىپ وتىرمىز. ۇلتتىق قۇرىلتايدا مەملەكەت باسشىسى قاسىم-جومارت توقاەۆ بالالاردىڭ قۇقىقتىق ساۋاتتىلىعىن ارتتىرۋعا, ولاردىڭ ءومىر قاۋىپسىزدىگىن قامتاماسىز ەتۋگە قاتىستى ناقتى تاپسىرمالار بەرگەنى بەلگىلى. بۇگىن اشىلىپ وتىرعان مەكتەپىشىلىك كلۋب وسى ماڭىزدى باستامالاردى ءوز جوسپارىنا ەنگىزىپ, جۇيەلى ءارى ناتيجەلى جۇمىس اتقارادى دەپ سەنەمىز», دەدى مەكتەپ ديرەكتورى.
ءىس-شارا بارىسىندا ءسوز العان سارايشىق اۋدانى پروكۋرورىنىڭ ورىنباسارى باۋىرجان اسقاروۆ بۇل باستامانىڭ تاربيەلىك مانىنە توقتالدى.
«اتالعان جوبا مەكتەپتىڭ تەك ساپالى ءبىلىم بەرۋمەن عانا شەكتەلمەي, زاڭعا قۇرمەتپەن قاراۋدى قالىپتاستىرۋعا, جاستاردى جاۋاپتى ءارى بەلسەندى ازامات رەتىندە تاربيەلەۋگە ايرىقشا ءمان بەرەتىنىن ايقىن كورسەتەدى. مۇنداي يگى ىستەر ارقىلى بولاشاقتا ەل مۇددەسىن قورعايتىن, ادىلدىككە قىزمەت ەتەتىن سانالى ۇرپاق قالىپتاساتىنىنا سەنىم مول. ۇيىمداستىرۋشىلارعا تابىس ال وقۋشىلارعا بيىك ماقسات, ايقىن باعدار جانە جارقىن بولاشاق تىلەيمىن», دەدى ول.
ءىس-شاراعا ارنايى قاتىسقان استانا قالاسىنىڭ بالا قۇقىقتارى جونىندەگى ۋاكىلى ءاسيما بيمەندينا دا باستامانىڭ ماڭىزىن ەرەكشە اتاپ ءوتتى.
«زاڭ مەن ءتارتىپ – بۇگىنگى قوعام ءۇشىن ەڭ وزەكتى تاقىرىپتاردىڭ ءبىرى. پروكۋراتۋرا قىزمەتكەرلەرىنىڭ بالالارمەن تىكەلەي كەزدەسىپ, ولاردىڭ سۇراقتارىنا جاۋاپ بەرۋى, اشىق ديالوگ ورناتۋى جاسوسپىرىمدەردىڭ قۇقىقتىق ساناسىن قالىپتاستىرۋعا, بولاشاق ومىرىنە دۇرىس باعىت بەرۋگە ۇلكەن ىقپال ەتەدى دەپ سەنەمىن. كەيىنگى ەكى-ءۇش جىلدا پروكۋراتۋرا ورگاندارىمەن بىرلەسىپ, بالالاردىڭ قاۋىپسىزدىگىنە باعىتتالعان كوپتەگەن جوبا جۇزەگە اسىرىلدى. بۇل جۇمىستاردىڭ بارلىعى جاس ۇرپاقتىڭ بولاشاعىن قورعاۋعا ارنالعان», دەدى ۋاكىل.
ال وتەگەن سەيىتوۆ اتىنداعى «بولاشاق پروكۋرورلار كلۋبىنىڭ» جەتەكشىسى جانسەرى سەنعازى كلۋبتىڭ جۇمىس باعىتتارىنا توقتالدى. ونىڭ ايتۋىنشا, جوبا باس پروكۋراتۋرانىڭ باستاماسىمەن قولعا الىنىپ, استانا قالاسىنىڭ سارايشىق اۋدانى پروكۋراتۋراسى ارقىلى جۇزەگە اسىرىلىپ كەلەدى. قازىرگى تاڭدا باستاما 17 مەكتەپتى قامتىپ وتىر.
«بۇل كلۋب زاڭ مەن ءتارتىپ قۇندىلىقتارىن جاس ۇرپاقتىڭ ساناسىنا سىڭىرۋگە باعىتتالعان ماڭىزدى ورتا. الداعى ۋاقىتتا قۇقىقتىق كەزدەسۋلەر, تانىمدىق ساباقتار, تاجىريبەلىك جۇمىستار مەن تاربيەلىك ءىس-شارالار جۇيەلى تۇردە وتكىزىلمەك. ءبىز العان ءبىلىمىمىزدى ەل يگىلىگىنە جۇمسايتىن, ادىلدىككە قىزمەت ەتەتىن ادال ازامات بولۋعا ۇمتىلامىز», دەدى كلۋب جەتەكشىسى.
