وبلىستىق قۇرىلىس, ساۋلەت جانە قالا قۇرىلىسى باسقارماسىنىڭ باسشىسى نۇربەرگەن قۇسايىنوۆتىڭ دەرەگىنە قاراعاندا, «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا 15 نىساننىڭ قۇرىلىسى باستالىپتى. بىلتىر 13 نىسان پايدالانۋعا بەرىلگەن. دەنساۋلىق ساقتاۋ نىساندارىن سالۋداعى باستى ماقسات – اۋىل تۇرعىندارىنا مەديتسينالىق كومەكتىڭ قولجەتىمدىلىگىن ارتتىرۋ. سول سەبەپتەن قازىر بىرنەشە اۋرۋحانا, ەمحانا مەن دارىگەرلىك امبۋلاتوريانىڭ جوبالىق-سمەتالىق قۇجاتتاماسىن ازىرلەۋ قولعا الىنىپ جاتىر.
جاقىندا اتىراۋ قالاسىنىڭ اكىمشىلىك بولىنىسىندەگى المالى, بەرەكە اۋىلدارىندا ارقايسىسى 25 ورىندىق جاڭا دارىگەرلىك امبۋلاتوريا ىسكە قوسىلدى. اۋىل تۇرعىندارىنا العاشقى مەديتسينالىق-سانيتارلىق كومەك كورسەتۋگە ارنالعان امبۋلاتورياعا ستاندارتقا ساي 170 ادامعا ءبىر ۋچاسكەلىك دارىگەر بەكىتىلدى. مۇندا تەراپيالىق قابىلداۋ, جالپى پراكتيكا دارىگەرىنىڭ قىزمەتى, پروفيلاكتيكالىق تەكسەرۋلەر, جۇكتى ايەلدەر مەن بالالاردى باقىلاۋ, ۆاكتسيناتسيا, جەدەل جاعدايلاردا العاشقى كومەك كورسەتۋ ءىسى ۇيىمداستىرىلادى.
سونداي-اق قۇرمانعازى اۋدانىنداعى افاناسەۆ تەمىرجول بەكەتىندە جاڭا فەلدشەرلىك-اكۋشەرلىك پۋنكت جۇمىسىن باستادى. اۋدان ورتالىعىنان 25 شاقىرىم قاشىقتىقتا ورنالاسقان بەكەتتە 208 تۇرعىن بار. جاڭا مەديتسينالىق نىساندا ەلدى مەكەن تۇرعىندارى دارىگەرگە دەيىنگى العاشقى مەديتسينالىق كومەكپەن تولىق قامتىلادى.
بۇعان قوسا اتىراۋ وبلىستىق جەدەل مەديتسينالىق جاردەم ستانساسىنىڭ سانيتارلىق كولىك پاركى جاڭا تەحنيكامەن تولىقتى. جاڭا كولىكتەر «تەڭىزشەۆرويل» كومپانياسىنىڭ الەۋمەتتىك جاۋاپكەرشىلىگى اياسىندا ساتىپ الىنعان.
«ۇجىمدىق الەۋمەتتىك جاۋاپكەرشىلىك شەڭبەرىندە وڭىردەگى ءىرى كەن ورنىن يگەرىپ جاتقان كومپانيا جەدەل جاردەم قىزمەتىنە اۆتوكولىكتەر الىپ بەردى. بۇل ءوڭىر تۇرعىندارىنا كورسەتىلەتىن شۇعىل مەديتسينالىق كومەكتىڭ تيىمدىلىگى مەن ساپاسىن ارتتىرۋعا مۇمكىندىك تۋدىرادى. بيىل ءۇش قوسالقى بەكەتى بار زاماناۋي جەدەل مەديتسينالىق جاردەم ستانساسىنىڭ قۇرىلىسىن اياقتاۋ جوسپارلانىپ وتىر. بۇل دا مەديتسينالىق قىزمەت ساپاسىن جەتىلدىرۋ جولىنداعى كەزەكتى قادام بولماقشى», دەدى وبلىس اكىمى سەرىك شاپكەنوۆ.
جەدەل جاردەم قىزمەتىنىڭ اۆتوپاركىنە بەرىلگەن تەحنيكانىڭ اراسىندا JAC ماركالى 10, GAZelle Next بازاسىنداعى 15 اۆتوكولىك سانيتارلىق كولىك بار. ءبارى العاشقى مەديتسينالىق كومەك كورسەتۋگە قاجەتتى زاماناۋي جابدىقتارمەن تولىق جاراقتالعان.
قازىر وبلىستا 48 جەدەل جاردەم بريگاداسى تاۋلىك بويى جۇمىس ىستەيدى. ونىڭ ىشىندە ءبىر رەانيماتسيالىق-ينتەنسيۆتى, ءبىر پەدياتريالىق, 46 فەلدشەرلىك بريگادا بار. بىلتىر اتىراۋلىقتاردان 103 قىزمەتىنە 329 مىڭ 610 شاقىرتۋ تۇسكەن. جەدەل جاردەم قىزمەتكەرلەرى 17 مىڭنان استام تۇرعىنعا تەلەفون ارقىلى كەڭەس بەرگەن. 299 مىڭ 906 ناۋقاسقا جەدەل مەديتسينالىق كومەك كورسەتكەن.
اتىراۋ وبلىسى
