قىسقى وليمپيادا تاريحى
قىسقى وليمپيادا ويىندارىنىڭ باستاۋ الۋىنا «سولتۇستىك ويىندارى» تۇرتكى بولدى. شۆەتسيا استاناسى ستوكگولم قالاسىندا 1901-1926 جىلدار ارالىعىندا ەۋروپا مەملەكەتتەرىنىڭ باسىن قوسقان شاعىن سايىستار ءوتىپ تۇرعان. كەيىننەن اۋقىمى كەڭەيگەن سايىس 1924 جىلى اق وليمپاياداعا ۇلاستى. وسى جىلى فرانتسيانىڭ شاموني قالاسىندا قىسقى سپورت تۇرلەرى بويىنشا وليمپيادالىق تۋرنير ۇيىمداستىرىلدى. ءدۇبىرلى دودانىڭ جارىس جولىنا سپورتتىڭ سەگىز ءتۇرى بويىنشا 16 مەملەكەت وكىلدەرى قوسىلدى.
بۇل ەلدەر قاتارىندا يۋگوسلاۆيا كورولدىگى, يتاليا, ۆەنگريا, لاتۆيا جانە ەستونيا بار ەدى. ال كسرو سپورتشىلارى اق ويىنداردىڭ جۇلدەسىنە 1946 جىلدان باستاپ تالاستى.
باستاپقىدا قىسقى ويىندار جازعى ويىنداردىڭ جالعاسى رەتىندە ءبىر جىلى وتكىزىلىپ وتىرعان. تەك 1994 جىلدان باستاپ قىسقى وليمپيادا ويىندارى جازعى ويىنداردان سوڭ, ەكى جىلدان كەيىن ۇيىمداستىرىلىپ ءجۇر.
پرەزيدەنت قىسقى وليمپياداعا قاتىساتىن ۇلتتىق قۇراما مۇشەلەرىنە مەملەكەتتىك تۋدى تاپسىردى
اق وليمپيادا: قازاقستان قۇراماسىنىڭ تابىسى مەن توقىراۋى
بيىل وتانداستارىمىز ەل تاريحىنداعى توعىزىنشى قىسقى وليمپيادادا ونەر كورسەتەدى.
جەرلەستەرىمىز 1994 جىلى نورۆەگيانىڭ ليللەحامەر قالاسىندا وتكەن قىسقى وليمپياداعا تۇڭعىش رەت قاتىسىپ, ءبىر التىن جانە ەكى كۇمىس مەدالدى قانجىعالادى. وسىلايشا, ەلىمىز جالپىكوماندالىق ەسەپتە 12-ورىنعا تابان تىرەدى. ءۇش جۇلدەنى دە ەل قورجىنىنا شاڭعىشى ۆلاديمير سميرنوۆ سالدى. اتالعان وليمپيادادا ەل اتىنان 29 سپورتشى سپورتتىڭ سەگىز تۇرىنەن باق سىناعان ەدى.
اراعا ءتورت جىل سالىپ سپورتشىلارىمىز جاپونيانىڭ ناگانو قالاسىندا وتكەن اق وليمپياداعا اتتاندى. بايراقتى باسەكەدە 60 سپورتشىنىڭ ىشىندە تاعى دا شاڭعىشى ۆلاديمير سميرنوۆ دارالانىپ, ەل قورجىنىنا قولا جۇلدە سالدى. سول سايىستا بۇيىرعان ەكىنشى قولانى كونكيمەن جۇگىرۋ سپورتىنىڭ وكىلى ليۋدميلا پروكاشەۆا يەلەندى. قولانى قاناعات تۇتقان قۇراما بۇل جولى تۋرنيرلىك كەستەنىڭ 20-شى ساتىسىنا جايعاستى.
2002 جانە 2006 جىلعى قىسقى وليمپيادا اقش-تىڭ سولت-لەيك-سيتي جانە يتاليانىڭ تۋرين قالاسىندا ءوتتى. مۇحيتتىڭ ارعى بەتىندەگى ويىندارعا قازاقستان قۇراماسىنان 52 سپورتشى, تۋريندەگى باسەكەگە 43 سپورتشى قاتىستى. وكىنىشكە قاراي, ەكى وليمپيادادا دا ەل سپورشىلارى جەڭىس تۇعىرىنان كورىنە المادى.
2010 جىلى كانادانىڭ ۆانكۋۆەر قالاسىندا جالاۋى جەلبىرەگەن اق وليمپيادادا 37 سپورتشىمىز باق سىناپ, ءبىر كۇمىس جۇلدە عانا بۇيىردى. جالعىز جۇلدەنى بياتلون باسەكەسىندە ونەر كورسەتكەن ەلەنا حرۋستالەۆا جەكەلەي سايىستا ەنشىلەدى.
قازاقستان تەلەارنالارى قىسقى وليمپيادا ويىندارىن تىكەلەي ەفيردە كورسەتەدى
2014 جىلى رەسەيدىڭ سوچي قالاسىندا وتكەن جاھاندىق جارىستا دا جالعىز مەدال قولعا ءتۇستى. وليمپيادانىڭ سوڭعى كۇندەرىندە مۇز ايدىنعا شىققان مانەرلەپ سىرعاناۋشى دەنيس تەن ءۇشىنشى تۇعىردان كورىنىپ, ەلىمىزگە قولا مەدال سىيلاپ قۋانتتى. بۇل وليمپياداعا جالپى سانى 51 سپورتشى اتتانعان ەدى
2018 جىلعى وليمپيادا كورەيا رەسپۋبليكاسىنىڭ پحيونچحان قالاسىندا ۇيىمداستىرىلىپ, جارىسقا قازاقستان قۇراماسى ساپىنان 44 سپورتشى قاتىستى. بۇل وليمپيادادا قازاقستان قۇراماسىنىڭ قورجىنى بوس قايتقان جوق. فريستايل-موگۋل وكىلى يۋليا گالىشەۆا 77,40 ۇپاي جيناپ, پحيونچحان وليمپياداسىنىڭ قولا جۇلدەگەرى اتاندى.
ال 2022 جىلى اق وليمپيادا الاۋى قىتايدىڭ بەيجىڭ قالاسىندا تۇتاندى. بۇل دوداعا قازاقستان قۇراماسىنان 34 سپورتشى (17 ەر, 17 ايەل) قاتىستى. بۇعان دەيىنگى سولت-لەيك-سيتي (اقش) جانە تۋرين (يتاليا) وليمپيادالارى سەكىلدى, بۇل باسەكەدە دە وتانداستارىمىز جۇلدەسىز قالدى. دەگەنمەن, شورت-ترەكشى ابزال اجعاليەۆ ءتورتىنشى ساتىعا تابان تىرەپ, جۇلدەگە ءبىر قادام جەتپەي توقتادى. سونداي-اق ارالاس ەستافەتاداعى وتاندىق شورت-ترەك كومانداسى ابزال اجعاليەۆ, دەنيس نيكيشا, ولگا تيحونوۆا, يانا حان بەسىنشى ورىننان كورىندى.
بۇگىندە قازاقستاندا قىسقى وليمپيادالىق سپورتتىڭ 13 ءتۇرى دامىپ كەلەدى. ەلدە قىسقى سپورتپەن 139 مىڭعا جۋىق ادام شۇعىلدانادى. 1 838 جاتتىقتىرۋشى جۇمىس ىستەيدى. قىسقى سپورت ينفراقۇرىلىمىن دامىتۋ جانە كادر دايارلاۋ جۇمىستارى جامبىل وبلىسىنان باسقا بارلىق وڭىردە جۇرگىزىلىپ وتىر.
ميلان جانە كورتينا-د'امپەتستسو – 2026: ەل قۇراماسىنىڭ ەرەكشەلىگى قانداي؟
بيىلعى وليمپيادانىڭ باستى ەرەكشەلىگى – گەندەرلىك تەڭگەرىمنىڭ ساقتالۋى. ۇلتتىق قۇراما ساپىندا تاجىريبەلى سپورتشىلارمەن قاتار, وليمپيادادا العاش رەت باق سىنايتىن دەبيۋتانتتار دا بار. اتاپ ايتقاندا, 18 سپورتشى ميلان جانە كورتينا-د'امپەتستسوداعى وليمپيادا ويىندارىندا تۇڭعىش رەت باق سىنايدى. جالپى 36 وتانداسىمىز سپورتتىڭ 10 تۇرىنەن جۇلدەگە تالاسادى.
ەل سپورتشىلارى قىسقى وليمپيادا ويىندارىندا قانداي كيىم ۇلگىسىمەن ونەر كورسەتەدى؟
ال 2018 جىلعى وليمپيادانىڭ جۇلدەگەرى يۋليا گالىشەۆا سپورتتىق مانسابىنداعى بەسىنشى وليمپياداسىن وتكىزەدى. ال شورت-ترەك شەبەرلەرى ابزال اجعاليەۆ پەن دەنيس نيكيشا وليمپيادا ويىندارىنا ءتورتىنشى رەت قاتىسادى. سونداي-اق كوماندا قۇرامىندا الەم چەمپيوناتتارىنىڭ جۇلدەگەرلەرى ميحايل شايدوروۆ پەن اناستاسيا گورودكو بار.
ۇلتتىق قۇرامانىڭ ەڭ جاس مۇشەسى – 16 جاستاعى اسان اسىلحان. ول 15 جاسىندا فريستايل-اكروباتيكادان حاربيندە وتكەن ازيا ويىندارىندا كۇمىس مەدال ەنشىلەدى. وليمپياداعا دەيىنگى ىرىكتەۋ تۋرنيرلەرىندە ءساتتى ونەر كورسەتىپ, مانسابىنداعى العاشقى اق وليمپيادادا جۇلدەگە تالاسادى.
