فوتو: istockphoto.com
كەشەندى شارا ناتيجەسىندە ەلىمىزدىڭ ءىرى اۋەجايلارىندا اۆياتسيالىق كەروسيندى جەتكىزۋ مەن وتكىزۋ جۇيەسى وڭتايلانىپ, حالىقارالىق مارشرۋتتار جەلىسىن كەڭەيتۋگە مۇمكىندىك تۋىندادى.
بيىل ۇلتتىق كومپانيا «قازمۇنايگاز – اەرو» الماتى مەن استانا اۋەجايلارىندا «قاناتقا قۇيۋ» ءتاسىلى بويىنشا اۋە كومپانيالارىن دەلدالسىز تىكەلەي جانارمايمەن قامتۋ ءىسىن باستادى. بۇل شەشىم كولىك جانە ەنەرگەتيكا مينيسترلىكتەرىنىڭ بىرلەسكەن جۇمىسىنىڭ ناتيجەسىندە قابىلدانىپ, اۋە تاسىمالداۋشىلارىنا ينفراقۇرىلىمعا تىكەلەي شىعۋدى قامتاماسىز ەتتى.
قابىلدانعان شارا باعانىڭ تۇراقتانۋىنا ىقپال ەتىپ, بۇگىندە ەلىمىزدەگى اۋەجايلاردا اۋە كەروسينىن وتكىزۋ قۇنى تونناسىنا 1 000 دوللاردان اسپاي وتىر. جاڭارتىلعان تاريفپەن Turkish Airlines, Fly Dubai, Air Cairo, Somon Air, AJet, Pegasus Airlines, Red Sea Airlines, One Air, Hungary Airlines پەن Fly Meta سىندى شەتەلدىك تاسىمالداۋشىلار قامتاماسىز ەتىلدى. كومپانيا الداعى كەزەڭدە تىكەلەي قۇيۋ كولەمىن ۇلعايتىپ, نارىقتاعى باعانىڭ كەزەڭ-كەزەڭىمەن ودان ءارى تومەندەۋىن جوسپارلاپ وتىر. ايتالىق, وتاندىق اۋە كومپانيالارى قىزمەت كورسەتەتىن كورشى ەلدەردە كەروسين قۇنى تونناسىنا 1200-1300 دوللار دەڭگەيىندە.
بۇدان بولەك, «اشىق اسپان» رەجيمىنىڭ كەڭەيتىلۋى دە ءوز ناتيجەسىن بەرىپ وتىر. بۇگىندە ەلىمىزدىڭ 17 اۋەجايىندا پايدالانىلىپ وتىرعان بۇل ىرەجيم شەتەلدىك اۋە كومپانيالارىنا بەسىنشى دارەجەگە دەيىنگى اۋە ەركىندىگىن يەلەنۋگە مۇمكىندىك بەرەدى. مۇنداي تالاپ وڭىرلىك اۆياتسيا نارىعىنداعى باسەكەنى ارتتىرىپ, ەلىمىزدىڭ ترانزيتتىك الەۋەتىن كۇشەيتۋگە جول اشادى.
ازاماتتىق اۆياتسيانى ساپالى ءارى تۇراقتى وتىنمەن قامتاماسىز ەتۋ ىسىندە مەملەكەتتىك ورگاندار دا ماڭىزدى قادام جاسادى. ۇكىمەت باسشىسى ولجاس بەكتەنوۆتىڭ وتكەن جىلعى 13 قاراشاداعى تاپسىرماسىنا سايكەس يمپورتتىق اۆياوتىنعا قاتىستى نورماتيۆتىك-قۇقىقتىق بازا جاڭارتىلدى. سونىڭ اياسىندا جۋىردا كولىك ءمينيسترىنىڭ جاڭا بۇيرىعى قابىلدانىپ, بيىلعى 22 قاڭتاردا ادىلەت مينيسترلىگىندە مەملەكەتتىك تىركەۋدەن ءوتتى. قۇجات 6 اقپاننان باستاپ كۇشىنە ەنەدى.
جاڭا وزگەرىستەر يمپورتتالاتىن اۆياوتىننىڭ ماركالارى مەن ستاندارتتارى تىزبەسىن كەڭەيتۋدى كوزدەيدى. ناتيجەسىندە ەلىمىزدە حالىقارالىق تالاپتارعا ساي Jet A-1 ستاندارتى بويىنشا كەروسين پايدالانۋ مۇمكىندىگى پايدا بولدى. بۇل بالامالى جەتكىزۋ باعىتتارىن اشىپ, نارىقتاعى تاۋەكەلدى تومەندەتەدى. قازىردىڭ وزىندە العاشقى 500 توننا اۆياوتىن جەتكىزىلسە, اقپان ايىندا تاعى 1 000 توننا كەلۋى جوسپارلانىپ وتىر.
جالپى, قابىلدانعان شارالار اۆياوتىن نارىعىندا رەتتەۋدىڭ يكەمدىلىگىن ارتتىرىپ, باسەكەلى ورتانى كۇشەيتۋگە, ەنەرگيا كوزدەرىنىڭ قولجەتىمدىلىگىن كەڭەيتۋگە باعىتتالعان. ينفراقۇرىلىمنىڭ جاڭعىرۋى, باعا ساياساتىنىڭ تۇراقتانۋى مەن ستاندارتتاردىڭ زاماناۋي تالاپتارعا ساي جەتىلدىرىلۋى ەلىمىزدىڭ وڭىرلىك اۆياتسيالىق حابقا اينالۋ مىندەتىنە قىزمەت ەتەدى.
قازاقستان مەن اقش اراسىنداعى اۆياتسيالىق ىنتىماقتاستىق سەرىكتەستىكتىڭ جاڭا دەڭگەيىنە كوتەرىلدى
