فوتو: gov.kz
عىلىم جانە جوعارى ءبىلىم مينيسترلىگىنىڭ مالىمەتىنشە, تالاپكەرلەردىڭ 72%-ى تەستىلەۋدى قازاق تىلىندە, 28%-ى ورىس تىلىندە جانە 71 ادام اعىلشىن تىلىندە تاپسىرعان.
بەس ءپان بويىنشا ورتاشا كورسەتكىش 61 بالدى قۇراپ, ەڭ جوعارى ناتيجە رەتىندە 138 بالل تىركەلگەن.
ەرەكشە ءبىلىم بەرۋ قاجەتتىلىكتەرى بار وقۋعا تۇسۋشىلەر ءۇشىن قولايلى جاعداي جاساۋدىڭ ارقاسىندا ۇبت-عا 260 تالاپكەر قاتىسقان.
تالاپكەرلەر تەست تاپسىرمالارىنىڭ مازمۇنى بويىنشا تەستىلەۋ اياقتالعاننان كەيىن 30 مينۋت ىشىندە اپەللياتسياعا بەرە الادى. تەحنيكالىق سەبەپتەر بويىنشا اپەللياتسيا تەستىلەۋ كەزىندە قابىلدانادى. تەست ناتيجەسى بەلگىلەنگەن سەرتيفيكاتتار اپەللياتسيا قاراستىرىلعاننان كەيىن جەكە كابينەتتەردە قولجەتىمدى بولادى.
«ۇبت ءوتىپ جاتقان ەكى اپتادا 173 ەرەجە بۇزۋشىلىق انىقتالدى. 108 تالاپكەر سمارتفون, شپارگالكا جانە باسقا دا تىيىم سالىنعان زاتتاردى الىپ كىرمەك بولعانى ءۇشىن تەستىلەۋدەن شەتتەتىلدى. تاعى 65 ادام تەستىلەۋ كەزىندە ەرەجەلەردى بۇزعانى ءۇشىن اۋديتوريادان شىعارىلدى, ولاردىڭ ناتيجەلەرى جويىلدى. وزگە ادامداردىڭ ورنىنا كىرۋ فاكتىلەرى انىقتالعان جوق», دەلىنگەن مينيسترلىك تاراتقان حابارلامادا.
ايتا كەتەيىك, ۇبت اياقتالعاننان كەيىن وسى جىلدىڭ 31 قازانىنا دەيىن بەينەجازبالارعا تالداۋ جۇرگىزىلەدى. تىيىم سالىنعان زاتتاردى پايدالانۋ نەمەسە ەرەجەلەردى بۇزۋ فاكتىلەرى انىقتالعان جاعدايدا ۇبت ناتيجەلەرى جويىلادى.
جالپى قاڭتاردا وتەتىن ۇبت-نى تاپسىرۋعا 187 مىڭ ادام ءوتىنىش بەرگەن.
