وتكەن اپتادا ايماق اكىمى بەرىك ءۋالي سەمەي قالاسىنداعى وبلىستىق جەدەل مەديتسينالىق جاردەم ستانتسياسىنا سول تەحنيكالاردىڭ العاشقى لەگىن – 10 سانيتارلىق اۆتوكولىكتىڭ كىلتىن سالتاناتتى تۇردە تابىستادى.
«بۇل نىسان قازىر سانيتارلىق اۆتوكولىكتەرمەن تولىق قامتاماسىز ەتىلگەن. الايدا تەحنيكالاردىڭ جالپى توزۋ دەڭگەيى 90 پايىزدان اسادى. وسى ماسەلەنى شەشۋ ءۇشىن بىلتىر «اباي وبلىسى مەديتسينالىق ۇيىمدارى ءۇشىن سانيتارلىق اۆتوكولىك ساتىپ الۋ» جوباسى شەڭبەرىندە «ونەركاسىپتى دامىتۋ قورى» اق-مەن بىرلەسىپ, وبلىستىق بيۋدجەت قاراجاتى ەسەبىنەن ليزينگتىك قارجىلاندىرۋ ارقىلى Hyundai, JAC جانە «گازەل» ماركالى 100 سانيتارلىق اۆتوكولىكتەر ساتىپ الىندى. ونىڭ ىشىندە 67 اۆتوكولىك وبلىستىق جەدەل مەديتسينالىق جاردەم ستانتسياسىنا, 33 اۆتوكولىك اۋدانداعى مەديتسينالىق ۇيىمدارعا بەرىلەدى. بارلىق اۆتوكولىكتەر GPS-ناۆيگاتسيامەن جانە حالىققا مەديتسينالىق كومەك كورسەتۋگە قاجەتتى مەديتسينالىق جابدىقتارمەن تولىق جابدىقتالعان», دەيدى وبلىستىق دەنساۋلىق باسقارماسى.
سالتاناتتى ءىس-شارا بارىسىندا ايماق باسشىسى دەنساۋلىق ساقتاۋ سالاسىن دامىتۋ ءوڭىر ءۇشىن باسىم باعىتتاردىڭ ءبىرى ەكەنىن, جاڭا اۆتوكولىكتەر جەدەل مەديتسينالىق كومەكتىڭ ساپاسى مەن تيىمدىلىگىن ارتتىرۋعا مۇمكىندىك بەرەتىنىن ايتتى.
«مەملەكەت باسشىسى قاسىم-جومارت توقاەۆ قىزىلوردادا وتكەن ۇلتتىق قۇرىلتايدىڭ بەسىنشى وتىرىسىندا سويلەگەن سوزىندە: «مەملەكەتتىڭ ءبىلىم بەرۋ جانە دەنساۋلىق ساقتاۋ سالاسىنا جۇمساپ جاتقان قارجىسى, ەڭ الدىمەن, ازاماتتارىمىزدىڭ تۇرمىس ساپاسىن ارتتىرۋعا ارنالاتىنىن جانە ادىلەتتى قازاقستاندى قۇرۋ ستراتەگياسىمەن ۇشتاسىپ جاتقانىن تۇسىنگەن ابزال» دەگەن بولاتىن. بۇگىن حالىق يگىلىگىنە بەرىلگەن جەدەل جاردەم كولىكتەرى وسى باعىتتاعى وڭىرلىك جۇمىستىڭ ءبىر پاراسى. مۇنداي جاڭا كولىكتەر وبلىسىمىزعا 2020 جىلى الىنعان ەكەن. ياعني, بەس جارىم جىلدان بەرى وسى سالاعا جاڭا كولىكتەر الىنباعان. بۇگىنگى وقيعا اباي وبلىسىنىڭ دەنساۋلىق ساقتاۋ جۇيەسى ءۇشىن ەرەكشە ماڭىزعا يە. سانيتارلىق اۆتوكولىكتىڭ جاڭا اۆتوموبيلدەرىن جەدەل مەديتسينالىق جاردەم قىزمەتىنە تابىستاۋ – حالىققا كورسەتىلەتىن شۇعىل مەديتسينالىق كومەكتىڭ قولجەتىمدىلىگى مەن دەڭگەيىن ارتتىرۋعا مۇمكىندىك بەرىپ, ءوڭىر تۇرعىندارىنىڭ ءومىر ساپاسىن جاقسارتۋعا ۇلكەن ۇلەس قوسارى ءسوزسىز», دەدى وبلىس اكىمى.
اقتوبەلىكتەر جەدەل جاردەمنىڭ قوزعالىسىن ياندەكس Go قوسىمشاسىنان كورە الادى
بۇگىندە وبلىستىق جەدەل مەديتسينالىق جاردەم ستانتسياسىندا 872 ادام ەڭبەك ەتەدى. مەكەمە ءوڭىردىڭ 620 مىڭنان استام تۇرعىنىنا كۇن سايىن قىزمەت كورسەتىپ كەلەدى. ولار جىلىنا 250 مىڭنان استام شاقىرتۋعا شىعادى.
«ءوڭىردىڭ دەنساۋلىق ساقتاۋ سالاسىنىڭ ينفراقۇرىلىمىن دامىتۋ ماقساتىندا جۇيەلى جۇمىس جۇرگىزىلىپ جاتىر. بىلتىر العاشقى مەديتسينالىق-سانيتاريالىق كومەك كورسەتەتىن 60-تان استام جاڭا نىسان سالىندى. ماقانشى اۋىلىندا كۇندىزگى ستاتسيونارى, زەرتحاناسى جانە ايەلدەر كونسۋلتاتسياسى بار دارىگەرلىك امبۋلاتوريا اشىلدى. اياگوز اۋدانىنىڭ كوپسالالى ورتالىق اۋداندىق اۋرۋحاناسىنىڭ 10 توسەكتىك رەانيماتسيالىق بولىمشەسىنىڭ قوسىمشا قۇرىلىسى اياقتالدى. وسى مەديتسينالىق مەكەمەدە ماگنيتتىك-رەزونانستىق توموگرافتى ورنالاستىرۋ ءۇشىن قوسىمشا عيماراتتىڭ جانە ءۇرجار اۋدانىنىڭ كوپسالالى ورتالىق اۋداندىق اۋرۋحاناسى بازاسىندا «تەرى ارقىلى كورونارلىق ارالاسۋ ورتالىعى» عيماراتىنىڭ قوسىمشا قۇرىلىسى باستالدى. ۇكىمەتتىڭ قولداۋىمەن سالىناتىن 300 ورىندىق وبلىستىق كوپبەيىندى اۋرۋحانا مەن 200 ورىندىق وبلىستىق كوپبەيىندى بالالار اۋرۋحاناسىنىڭ جوبالىق سمەتالىق قۇجاتتامالارى جاسالىپ جاتىر», دەيدى وبلىس اكىمىنىڭ ءباسپاسوز قىزمەتى.
ولاردىڭ مالىمەتىنشە, جالپى 2025 جىلى وبلىستىڭ دەنساۋلىق ساقتاۋ سالاسىنىڭ ماتەريالدىق-تەحنيكالىق بازاسىن جاڭعىرتۋعا 6 جارىم ميلليارد تەڭگەدەن استام قارجى ءبولىندى.
