جيىندى جۇرگىزگەن ايدوس سارىم اۋەكومپانيالارى مەن اۋەجايلاردىڭ قىزمەتى بويىنشا تۇتىنۋشىلاردان كوپتەگەن شاعىم تۇسكەنىن اتاپ ءوتتى. ولار رەيستەردىڭ سەبەپسىز كەشىگۋى, قولجەتىمدى ورىندارعا قاراعاندا بيلەتتەردىڭ كوپ ساتىلۋى, ارتىق برونداۋ (وۆەربۋكينگ) ماسەلەلەرىنە بايلانىستى.
وتىرىستا بايانداما جاساعان كولىك مينيسترلىگى ازاماتتىق اۆياتسيا كوميتەتىنىڭ توراعاسى سالتانات تومپيەۆا وتكەن جىلدىڭ قورىتىندىسىندا ەلىمىزدىڭ اۋەجايلارى 31,8 ملن جولاۋشىعا قىزمەت كورسەتكەنىن, ونىڭ ىشىندە 15,4 ملن جولاۋشىنى وتاندىق اۋە كومپانيالارى تاسىمالداعانىن حابارلادى. قازىرگى تاڭدا ىشكى اۋە تاسىمالدارى 42 باعىت بويىنشا جۇزەگە اسىرىلىپ, اپتاسىنا 643 رەيستى قامتيدى. حالىقارالىق اۋە قاتىناسىندا 30 ەل مەن 135 باعىتتا اپتاسىنا 626 رەيس جاسالادى.
«م. قوزىباەۆ اتىنداعى سولتۇستىك قازاقستان ۋنيۆەرسيتەتى» كاق ديرەكتورلار كەڭەسىنىڭ توراعاسى, قوعامدىق پالاتا توراعاسىنىڭ ورىنباسارى عالىم بايتوق تا ءوز ۇستانىمىن ايتتى. ول ىشكى رەيستەردە قايتارىمسىز بيلەتتەرگە تىيىم سالۋدى نەمەسە ولاردى كەپىلدى قايتارۋدى, نە بولماسا ۇشۋ كۇنىن تەگىن وزگەرتۋ تەتىكتەرىمەن الماستىرۋدى ۇسىندى. سونداي-اق ەل ىشىندەگى لوۋكوستەرلەردى, از جولاۋشىلى جانە جەڭىل كوممەرتسيالىق اۆياتسيانى دامىتۋ, سونداي-اق مارشرۋتتىق جەلىنى تەك ءىرى حابتار مەن وبلىس ورتالىقتارىنا عانا تاۋەلدى بولمايتىنداي ەتىپ قالىپتاستىرۋ قاجەتتىگىن اتاپ ءوتتى.
ەۋرازيالىق تۇتىنۋشىلار وداعى باسقارماسىنىڭ توراعاسى, قوعامدىق پالاتا توراعاسىنىڭ ورىنباسارى سۆەتلانا رومانوۆسكايا دا بىرقاتار ۇسىنىسىن ورتاعا سالدى. ول «تۇتىنۋشىلاردىڭ قۇقىقتارىن قورعاۋ تۋرالى» زاڭ تولىق اقپارات الۋ جانە شىعىنداردى وتەۋ قۇقىعىن ناقتى بەكىتەتىنىن اتاپ ءوتتى. الايدا ازاماتتىق اۆياتسيا سالاسىندا بۇل نورمالار كوبىنە تەك قاعاز جۇزىندە قالادى دا, سالالىق ەرەجەلەردىڭ ىقپالى كۇشتىرەك بولىپ كەتەدى. ونىڭ ايتۋىنشا, وسىعان بايلانىستى اينالىمدىق ايىپپۇلدارعا كوشۋ, ءۇش ساعاتتان استام كەشىگۋ كەزىندە وتەماقىنى اۆتوماتتاندىرۋ جانە تاعى باسقا جۇيەلى شارالاردى ەنگىزۋ قاجەت.
ۆيتسە-مينيستر: اۋە بيلەتتەرىن تولىق قايتارۋ – باعانى شارىقتاتادى
جاۋاپ رەتىندە اۋە كومپانيالارىنىڭ وكىلدەرى – «Air Astana» اق اعا ۆيتسە-پرەزيدەنتى ەربولات بايسالىقوۆ پەن «QAZAQ AIR» اق باسقارما توراعاسى ادىلبەك ومىراليەۆ ءسوز سويلەدى. سونىمەن قاتار, ازاماتتىق اۆياتسيا جۇيەسىن جانە سالالىق زاڭنامانى جەتىلدىرۋ بويىنشا ءۇسىنىستارىن ماجىلىس دەپۋتاتتارى مۇرات ابەنوۆ, اناس باكقوجاەۆ جانە يرينا سميرنوۆا, ساراپشى ناتاليا موليارچۋك, «قازاقستانداعى پارلامەنتاريزمدى دامىتۋ قورى» قق پرەزيدەنتى زاۋرەش باتتالوۆا, سونداي-اق قوعامدىق پالاتا مۇشەلەرى مەن وتىرىسقا قاتىسۋشىلار ايتتى.
ۇسىنىستار مەن ساراپتامالىق پىكىرلەر جۇيەلەندىرىلىپ, «تۇتىنۋشىلاردىڭ قۇقىقتارىن قورعاۋ تۋرالى» جاڭارتىلعان زاڭ جوباسى بويىنشا جۇمىس توبىنا جولداناتىن قوعامدىق پالاتانىڭ قورىتىندى ۇسىنىمدارىنا ەنگىزىلەتىن بولادى.
