ايەل ءۇشىن ەڭ جامانى – جالعىزدىق

جاقىندا الەۋمەتتىك جە­لى­لەردە قىتاي ەلىندە ءبىلىم الىپ جۇرگەن قازاق قىزدارىنىڭ كو­بىسىنىڭ ىشىمدىككە قۇمار ەكەنى, اراققا سىلقيا تويىپ الىپ, جا­تاقحانالاردا جىن-ويناق جاسايتىنى تۋرالى اقپاراتتار ەلدى ءدۇر سىلكىندىرگەن-ءدى. ابىروي بولعاندا ارتىنشا ولاردىڭ جالعان ەكەنى, الدەكىمدەردىڭ قى­ساستىقپەن جاريا ەتىپ جىبەرگەنى ءمالىم بولدى. ايتسە دە, سوڭعى جىلدارى ايەلدەردىڭ الكوگولدى ىشىمدىككە قۇمارتىپ بارا جاتقانى توسىن جاڭالىق بولماي قالدى. «اۋرۋىن جاسىرعان ولەدى» دەگەن. وتباسىنىڭ بەرەكەسى بولۋى ءتيىس انالاردىڭ اراققا سالىنىپ كە­تۋىنىڭ سەبەبى نەدە؟ – بۇگىنگى تاڭدا ديسپانسەرلىك ەسەپتە 8620 ادام تىركەلگەن بولسا, ونىڭ 1011-ءى ايەلدەر, – دەيدى بۇل جونىندە جامبىل وبلىستىق ناركولوگيالىق ديسپانسەرىنىڭ باس دارىگەرى جاقىپ جەكسەمبيەۆ. – شىنىن ايتۋ كەرەك, كۇندەلىكتى ومىردە ايەلدەردىڭ ماسكۇنەمدىگى جايىندا كوپشىلىك جاقسى بىلە بەرمەيدى. ماسەلەن, اششى سۋمەن دوس بولعان ايەلدەردىڭ سانى ەرلەرگە قاراعاندا, الدە­قايدا از دەيدى. بىراق بۇل – قاتە. شىندىعىندا, ەرلەردىڭ ىشىمدىككە سالىنۋى بىردەن كوزگە ءتۇسىپ قالادى. ال ايەلدەر بولسا مۇنداي جامان ادەتتەن ۇيالادى, كوپ رەتتە ونداي قىلىقتارىن جا­سىرىپ جۇرەدى. اسىرەسە, ەت جا­قىن­دارىنا بىلدىرمەۋگە تىرىسادى. ءبىزدىڭ ديسپانسەردە ەمدەلىپ جۇرگەن ايەلدەردىڭ ءبىرى جۇمىس ساتىسى بويىنشا العا باسۋدىڭ ورنىنا بوس ۋاقىتىن بالا ءتار­بيەلەۋگە ارنايدى. بىلايشا قاراساڭىز, ەشقانداي سوكەتتىك جوق. ايتسە دە, قىرىق جاسقا اياق باسقان كەزدە ەرلى-زايىپتىلار اراسىنداعى اراقاتىناس ءوز­گەرگەن. جۇبايلاردىڭ ورتاق اڭگى­مەسى ازايىپ, ءبىر-بىرىنە دەگەن قىزى­عۋشىلىقتارى جوعالادى. مۇن­داي كورىنىستەردىڭ سوڭى كوبىنە شاڭى­راقتىڭ شايقالۋىنا اكەلىپ سوعادى. – ءبىزدىڭ تۇسىنىگىمىزدە ايەلدىڭ اراققا سالىنۋىنا نەگىزىنەن تۇر­مىستىڭ تومەندىگى, كۇنكورىستىڭ قيىندىعى سەبەپ بولاتىن سياقتى ەدى... – ارينە, ايەل كۇيزەلىسكە ۇشىراعان كەزدە ءىشىپ كە­تۋى مۇمكىن. بىراق, قازىر مۇن­داي­لاردىڭ قاتارىندا داۋلەتتى وت­باسىلاردىڭ ايەلدەرى دە بار. ولاردا ءبارى بار. كۇيەۋ, بالا, ءۇي, بايلىق. بىراق كۇيەۋى تەك ءوز جۇمىسىمەن عانا اينالىسادى, بالالارى مەكتەپتە نەمەسە بالاباقشادا. كوردىڭىز بە, ايەل تاعى دا جالعىز قالدى. وتباسى, جۇمىسى بار, بىراق, ومىردەن ءلاززات المايدى. وسىدان كەيىن الدىمەن قىمبات ىشىمدىك ءىشىپ, كەيىننەن ەسىرتكى پايدالانۋعا بەيىمدەلىپ كەتكەن ايەلدەر دە جەتەرلىك. ءتىپتى, ۇيىقتاۋ ءۇشىن نەمەسە اشۋىن باسىپ, ءوزىن تىنىشتاندىرۋ ءۇشىن ءجيى-ءجيى اششى سۋدان ۇرتتاپ, التى اي نەمەسە ءبىر جىلداي ۋاقىت وتكەندە سول «دارىسىنەن» باس تارتا المايتىن جاعدايعا جەتكەندەر دە بار. وكىنىشكە قاراي, ءبىزدىڭ قوعامدا ءالى دە سالاماتتى ءومىر سالتىن ۇستانىپ, باسسەينگە, فيتنەس-ورتالىققا بارۋ دەگەن جۇزەگە اسپاي وتىر. ورالحان ءداۋىت, «ەگەمەن قازاقستان». جامبىل وبلىسى.