كەشە استانا قالاسىنىڭ جانىنداعى 68665-اسكەري بولىمىندە ءباسپاسوز قىزمەتكەرلەرىنىڭ ءتول مەرەكەسىنە ارنالعان ءىس-شارا جانە ۇلى جەڭىستىڭ 70 جىلدىعىنا وراي, قورعانىس مينيسترلىگى ۇيىمداستىرعان «ماڭگى ەسىمىزدە» اتتى رەسپۋبليكالىق شىعارماشىلىق بايقاۋدىڭ جەڭىمپازدارىن ماراپاتتاۋ ءراسىمى بولىپ ءوتتى.
سالتاناتتى شارانى ەلىمىزدىڭ قورعانىس ءمينيسترىنىڭ ورىنباسارى, گەنەرال-مايور تالعات مۇحتاروۆ اشىپ, جۋرناليستەردى كاسىبي مەرەكەسىمەن قۇتتىقتاپ, رەسپۋبليكالىق بايقاۋدىڭ جەڭىمپازدارىنا ديپلومدار مەن باعالى سىيلىقتار تاپسىردى. ۇيىمداستىرۋ كوميتەتىنە قازاقستاننىڭ بارلىق وڭىرلەرىنەن شىعارماشىلىق بايقاۋعا 70 ءوتىنىم كەلىپ تۇسكەن ەكەن. بايقاۋعا رەسپۋبليكالىق گازەت, راديو, تەلەۆيدەنيە جانە اقپاراتتىق اگەنتتىكتەردىڭ جۋرناليستەرىنىڭ قولىنان شىققان تۋىندىلار قاتىستىرىلدى. اتاپ ايتقاندا, ۇلى وتان سوعىسىنىڭ 70 جىلدىعىنا بايلانىستى جازىلعان ەكىنشى دۇنيەجۇزىلىك سوعىستىڭ تاريحىنا قاتىستى تىڭ دەرەكتەر, مايدانگەرلەر مەن تىل ەڭبەككەرلەرىنىڭ جانقيارلىق ەرلىك شەجىرەسى, ۇرىس الاڭىندا قازا بولعانداردى ىزدەۋ تۋرالى ماتەريالدار سارالاندى. مەملەكەتتىك جانە ورىس تىلدەرىندە كەلىپ تۇسكەن شىعارمالاردىڭ جەڭىمپازدارى 5 نوميناتسيا بويىنشا انىقتالدى.
ءسويتىپ, «ءباسپاسوز باسىلىمدارىنداعى ۇزدىك شىعارما» نوميناتسياسى بويىنشا رەسپۋبليكالىق «ەگەمەن قازاقستان» گازەتىنىڭ شولۋشىسى جىلقىباي جاعىپار ۇلى جانە «ەكىباستۇز جارشىسى» گازەتىنىڭ ءجۋرناليسى قانات الداباەۆ جەڭىمپاز دەپ تانىلدى. «ۇزدىك تەلەسيۋجەت/تەلەباعدارلاما» نوميناتسياسى بويىنشا «24.kz» تەلەارناسىنىڭ ءجۋرناليسى جاسىن بىركەنوۆ پەن «مير» تەلەارناسىنىڭ ءجۋرناليسى تاتيانا جيگۋنوۆا, «ۇزدىك راديوسيۋجەت/راديوباعدارلاما» نوميناتسياسى بويىنشا «قازاق راديوسىنىڭ» ءتىلشىسى ءمادينا يشانوۆا جانە «تەنگري Fم» راديوسىنىڭ ءتىلشىسى يرينا لەلياۆسكايا جەڭىپ شىقتى. «ينتەرنەت-باسىلىمدارداعى ۇزدىك جاريالانىم» نوميناتسياسىندا «كازينفورم» اقپارات اگەنتتىگىنىڭ ءجۋرناليسى مۇرات جاكەەۆ پەن «Tengrinews.kz» ينتەرنەت-پورتالىنىڭ ءجۋرناليسى باتىر قازىباەۆ, ال «ۇزدىك فوتووچەرك/فوتورەپورتاج» نوميناتسياسى بويىنشا «كازاحستانسكايا پراۆدا» گازەتىنىڭ ءفوتوتىلشىسى يۋري بەككەر جەڭىمپاز اتاندى.
سونىمەن بىرگە, «ماڭگى ەسىمىزدە» رەسپۋبليكالىق شىعارماشىلىق بايقاۋىنىڭ قورىتىندىسىن شىعارۋ كوميسسياسى ازاماتتىق بەلسەندىلىگى ءۇشىن جەكە شىعارمالارعا ارناۋلى نوميناتسيا تاعايىندادى. وسى نوميناتسيا بويىنشا قورعانىس ءمينيسترىنىڭ ارنايى ديپلومدارىمەن جانە باعالى سىيلىقتارىمەن «ەگەمەن قازاقستان» گازەتىنىڭ ارداگەر جۋرناليسى ەرجۇمان سمايىل, اقتوبە وبلىستىق گازەتىنىڭ ءتىلشىسى وتەمىس اكىموۆ, «24.kz» تەلەارناسىنىڭ ءجۋرناليسى دميتري ولەينيكوۆ جانە «قازاقستان» تەلەارناسىنىڭ ءجۋرناليسى ەرنۇر نۇرعاليەۆ ماراپاتتالدى.
68665-اسكەري بولىمىندە ءوتكەن سالتاناتتى ءراسىم قورعانىس مينيسترلىگى ورتالىق انسامبلى ارتىستەرىنىڭ مەرەكەلىك كونتسەرتىنە ۇلاستى. سونىمەن بىرگە, مەرەكەلىك شاراعا جينالعان جۋرناليستەر دالا اسحاناسىندا ساربازدار داستارقانىنان ءدام ءتاتتى.
«ەگەمەن-اقپارات».
