بۇۇ وكىلى فارحان حاك دۇيسەنبى كۇنى تىلشىلەرگە بۇۇ قاۋىپسىزدىك كەڭەسى رۇقسات بەرگەن بەيبىتشىلىك كەڭەسى تەك قانا گازا ماسەلەسى بويىنشا جۇمىس ىستەيتىنىن ايتتى.
ءىس-شارادا وزبەكستان تاراپى: «بەيبىتشىلىك كەڭەسىن قۇرۋ وزبەكستاننىڭ سىرتقى ساياساتىنىڭ باسىمدىقتارىنا سايكەس كەلەدى, ولار بەيبىتشىلىك باستامالارى مەن كوپجاقتى ىنتىماقتاستىقتى قولداۋعا باعىتتالعان», دەپ مالىمدەدى. ال قازاقستانعا كەلەر بولساق, ءىس-شارادا نەگىزىنەن پرەزيدەنت قاسىم-جومارت توقاەۆ پەن دونالد ترامپتىڭ سۋرەتتەرى عانا كورسەتىلدى.
جالپى, اقش-تىڭ ەشبىر پرەزيدەنتى ورتالىق ازياعا ساپار شەككەن ەمەس. ال وتكەن جىلدىڭ قاراشاسىندا ق.توقاەۆ پەن ش.ميرزيوەۆ ەكىنشى اقش-ورتالىق ازيا سامميتىنە قاتىسۋعا ۆاشينگتونعا باردى. C5+1 بيزنەس كونفەرەنتسياسىندا اۆياتسيادان باستاپ ماڭىزدى مينەرالدارعا دەيىنگى كوپتەگەن سالا بويىنشا بىرقاتار كەلىسىمگە قول قويىلدى.
العاشقى بولىپ شاقىرۋ الدى
اقش پرەزيدەنتى دونالد ترامپتىڭ جاڭا كەڭەسكە قوسىلۋعا شاقىرۋ العان العاشقىلاردىڭ ءبىرى – قازاقستان پرەزيدەنتى قاسىم-جومارت توقاەۆ. اقش قازىر ورتالىق ازيامەن بايلانىسىن تەرەڭدەتۋگە تىرىسىپ جاتىر.
ق.توقاەۆتىڭ ءباسپاسوز حاتشىسى رۋسلان جەلدىباي: «مەملەكەت باسشىسى امەريكا قۇراما شتاتتارىنىڭ پرەزيدەنتىنە شىن جۇرەكتەن العىس ءبىلدىرىپ, وسى جاڭا قاۋىمداستىققا قوسىلۋعا كەلىسىمىن راستايتىن حات جولدادى», دەپ مالىمدەدى. سونداي-اق «پرەزيدەنت ق.توقاەۆ قازاقستاننىڭ تاياۋ شىعىستا تۇراقتى بەيبىتشىلىككە قول جەتكىزۋگە, مەملەكەتارالىق سەنىمدى جانە جاھاندىق تۇراقتىلىقتى نىعايتۋعا ۇلەس قوسۋعا دەگەن مىندەتتەمەسىن راستادى», دەپ قوستى ول.
ايتا كەتسەك, د.ترامپ 60 ەلدى بەيبىتشىلىك كەڭەسىنە قوسىلۋعا شاقىردى.
بەيبىتشىلىك كەڭەسىنە مىندەتتى تولەمسىز قوسىلدى
قازاقستان ۇيىمنىڭ جارعىسىندا كورسەتىلگەن ەرىكتى جارناسىز بەيبىتشىلىك كەڭەسىنە رەسمي تۇردە قوسىلدى.
جارعىعا سايكەس, بەيبىتشىلىك كەڭەسىنە مۇشە بولۋعا تەك مەملەكەتتىڭ تاۋەلسىز شەشىمى قاجەت. 1 ملرد دوللار كولەمىندەگى قارجىلىق جارنا مىندەتتى ەمەس, ەرىكتى جارنا. مۇشەلىك ءۇش جىلدىق مەرزىمگە بەرىلەدى. وسىعان وراي, قازاقستاننىڭ قارجىلىق تولەمسىز كەڭەسكە قوسىلۋى جارعىنىڭ ەرەجەلەرىنە تولىق سايكەس كەلەدى.
حابارلاعانىمىزداي, 22 قاڭتاردا پرەزيدەنت قاسىم-جومارت توقاەۆ اقش پرەزيدەنتى دونالد ترامپ باستاعان بەيبىتشىلىك كەڭەسىنىڭ جارعىسىنا قول قويدى.
ديپلوماتياعا ساي ارەكەت ەتەدى
قازاقستاننىڭ بەيبىتشىلىك كەڭەسىنە قوسىلۋ تۋرالى شەشىمى ءىرى حالىقارالىق باستامادا ديپلوماتيا مەن ىقپال ەتۋ مۇمكىندىگىن ۇسىناتىنىن, سونىمەن قاتار استانانىڭ ۆاشينگتون, ماسكەۋ, بەيجىڭ مەن ايماقتىق دەرجاۆالارمەن تەڭگەرىمدى قارىم-قاتىناستى ساقتاۋدىڭ ستراتەگياسىنا سايكەس كەلەتىنىن كورسەتەدى.
قازاقستان 1992 جىلدان بەرى يزرايلمەن ديپلوماتيالىق قارىم-قاتىناس ورناتىپ كەلەدى, سونداي-اق ءوزىن تاياۋ شىعىس ىستەرىندە بەيتاراپ قاتىسۋشى رەتىندە
كورسەتتى.
قازاقستان – ترامپ شاقىرتۋىن قابىلداعان العاشقى ەلدىڭ ءبىرى. بەيبىتشىلىك كەڭەسىنىڭ بەرىك ينستيتۋتقا اينالۋى شاقىرىلعان مەملەكەتتەردىڭ مىندەتتەمەسىنە, قارجىلاندىرۋ ەرەجەلەرىنىڭ قالاي جۇزەگە اسىرىلاتىنىنا, سونداي-اق كەڭەستىڭ شەشىمدەرىنە تىكەلەي اسەر ەتەتىن ايماقتىق سۋبەكتىلەردىڭ قولداۋىنا يە بولا الاتىنىنا بايلانىستى بولادى.
ورتا ازيانىڭ ەڭ ىقپالدى ەلى قازاقستاننىڭ بۇل كەڭەسكە قاتىسۋى ايماقتاعى ەلدەردەن تىس جوعارى دەڭگەيلى ديپلوماتيالىق باستامالارعا قاتىسا بەرەتىنىن كورسەتەدى. جالپى, ەلدەردىڭ ىنتاسى اتالعان باستاما تۇجىرىمدامادان تاجىريبەگە كوشكەن كەزدە ايقىنىراق بولادى.
تۇراقتىلىققا باستايتىن قادام
ەۋرازيا كوشباسشىلارى ترامپتىڭ اقش باسقاراتىن گازا بويىنشا بەيبىتشىلىك كەڭەسىنە قوسىلۋعا شاقىرۋىن قۇپتايدى. قازاقستان, وزبەكستان مەن بەلارۋس پرەزيدەنتتەرى اقش پرەزيدەنتى دونالد ترامپتان گازادان باستاپ قاقتىعىستاردى شەشۋگە باعىتتالعان جاڭا حالىقارالىق ورگان – بەيبىتشىلىك كەڭەسىنە قوسىلۋعا رەسمي شاقىرۋ العان العاشقى ەلدەر.
قازاقستان پرەزيدەنتىنىڭ ءباسپاسوز حاتشىسى رۋسلان جەلدىباي قاسىم-جومارت توقاەۆ بەيبىتشىلىك كەڭەسىنە قوسىلۋعا رەسمي شاقىرۋ العان العاشقى الەمدىك كوشباسشىلاردىڭ ءبىرى بولعانىن مالىمدەدى.
وزبەكستان پرەزيدەنتى شاۆكات ميرزيوەۆ تە جاڭا حالىقارالىق ۇيىمعا شاقىرىلدى. ش.ميرزيوەۆ كەڭەستى «تاياۋ شىعىستاعى ۇزاق ۋاقىتقا سوزىلعان قاقتىعىستاردى شەشۋدەگى جانە كەڭ ايماقتا بەيبىتشىلىك پەن تۇراقتىلىقتى قامتاماسىز ەتۋدەگى ماڭىزدى قادام» دەپ اتاپ, نەگىزىن قالاۋشى مۇشە رەتىندە قوسىلۋعا كەلىستى. سونداي-اق بەلارۋس سىرتقى ىستەر مينيسترلىگىنىڭ وكىلى رۋسلان ۆارانكوۆ تا مالىمدەمەسىندە پرەزيدەنت الەكساندر لۋكاشەنكونىڭ كەڭەسكە قوسىلۋعا شاقىرىلعانىن ايتتى. «ۇسىنىس بەلارۋس رەسپۋبليكاسىنىڭ پرەزيدەنتىنە جەتكىزىلدى, مەملەكەت باسشىسى ونى وڭ قابىلداندى», دەدى ول.
