سۋرەتتەردى تۇسىرگەن – جانگەلدى ابدىعالىم
جوبا 2023 جىلى باستالدى. ۇتىمدى جوبانىڭ ۇيىتقىلارى قوعامدىق كولىكتى تەك قاتىناۋ قۇرالى عانا ەمەس, رۋحاني ءارى زياتكەرلىك ورتاعا اينالدىرۋدى كوزدەگەن. اۆتوبۋستاعى جولاۋشىلارعا ۋاقىتتىڭ تيىمدىلىگىن ۇسىنىپ, كىتاپ وقۋعا مۇمكىندىك بەرۋ – باستامانىڭ نەگىزگى وزەگى.
اۆتوبۋستارداعى ەلەكتروندىق كىتاپ قورى ءۇش نەگىزگى بولىمنەن تۇرادى: قازاق ادەبيەتى جانە شەتەل ادەبيەتى. ۇيىمداستىرۋشىلار كىتاپتاردى ىرىكتەۋ كەزىندە ءارتۇرلى جاستاعى ءارى ءارتۇرلى كاسىبي ورتاداعى وقىرمانداردىڭ تالعامىن ەسكەرۋگە تىرىسقان. سول سەبەپتى, ەلەكتروندىق كىتاپ سورەسىندە كلاسسيكالىق تۋىندىلارمەن قاتار, شىتىرمان وقيعالى جانە تانىمدىق شىعارمالار دا بار. جالپى العاندا, QR-كودتار ارقىلى قازاق ادەبيەتىنىڭ 21 شىعارماسى, شەتەل اۆتورلارىنىڭ 14 ەڭبەگى, ورىس جازۋشىلارىنىڭ 6 كىتابى قولجەتىمدى.
قازىرگى ۋاقىتتا كىتاپتاردىڭ QR-كودتارى قاراعاندى قالاسىنىڭ 13 باعىتىندا قاتىنايتىن 60 اۆتوبۋسقا ەنگىزىلگەن. اتاپ ايتقاندا, №1, 5, 19, 33, 40, 41, 43, 53, 56, 65, 70, 118ە جانە 146ە باعىتتارى. اۆتوبۋس سالونىندا ورنالاستىرىلعان كودتى سمارتفون ارقىلى سكانەرلەگەن كەز كەلگەن جولاۋشى ەلەكتروندىق كىتاپحاناعا ءوتىپ, وزىنە ۇناعان شىعارمانى تەگىن وقي الادى. ارنايى تىركەلۋ نەمەسە قوسىمشا تولەم تالاپ ەتىلمەيدى, بۇل جوباعا دەگەن قىزىعۋشىلىقتى ودان ءارى ارتتىرا تۇسكەن. قالا اكىمدىگىنىڭ مالىمەتىنشە, مۇنداي فورمات, اسىرەسە جاستاردى كىتاپ وقۋعا ىنتاندىرىپ, كۇشەيتىپ وتىرعان كورىنەدى.
ەلىمىزدەگى ۇلتتىق كىتاپحانانىڭ ەلەكتروندىق كىتاپحاناسى – كازنەب دەرەكتەرىنە سايكەس, جوبا ىسكە اسقان ۋاقىتتان بەرى شىعارمالاردى قاراۋ سانى 30 915-كە جەتكەن. كەيىنگى جاڭارتىلعان مالىمەتتە جاۋىنگەر جازۋشى باۋىرجان مومىش ۇلىنىڭ «ۇشقان ۇيا» شىعارماسى ەڭ كوپ وقىلعان شىعارمالاردىڭ كوش باسىندا تۇر. بۇل كىتاپتى 20 916 ادام وقىعان. ودان كەيىن مۇحتار اۋەزوۆتىڭ «كوكسەرەك» شىعارماسى 5 343 قارالىممەن, عابيت مۇسىرەپوۆتىڭ «ۇلپان» رومانى 3 591 قارالىممەن العا شىعىپ وتىر. بۇل كورسەتكىشتەر كلاسسيكالىق قازاق ادەبيەتىنە دەگەن قىزىعۋشىلىقتىڭ جوعارى ەكەنىن اڭعارتادى. ءسويتىپ, قاراعاندىلىق جولاۋشىلار دىتتەگەن جەرىنە رۋحاني ساپارلايدى.
30 مىڭنان استام وقىرمان, جالپى اتالعان كورسەتكىش جوبانىڭ كەلەشەكتە دە كەرەگىن كورسەتەدى. سول سەبەپتى, جوبا جەتەكشىلەرى «جول ۇستىندەگى كىتاپحانانىڭ» سانىن كوبەيتۋدى كوزدەپ وتىر.
قاراعاندى وبلىسى
