ءىس-شاراعا عالىمدار, ەتنوگرافتار, مادەنيەتتانۋشىلار, كرەاتيۆتى يندۋستريا وكىلدەرى, قوعام جانە مەملەكەت قايراتكەرلەرى, سونداي-اق جاستار جانە ۆولونتەرلىك ۇيىمداردىڭ, بۇقارالىق اقپارات قۇرالدارى مەن مەديا-ساراپشىلار قاتىستى.
سەمينار بارىسىندا پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى ايدا بالاەۆانىڭ قۇتتىقتاۋ ءسوزىن مادەنيەت جانە اقپارات ۆيتسە-ءمينيسترى ەۆگەني كوچەتوۆ وقىپ بەردى. قۇتتىقتاۋ حاتتا مەملەكەت باسشىسىنىڭ ۇلتتىق قۇرىلتايدا ونەر مەن مادەنيەتتى مەملەكەتتىڭ ستراتەگيالىق باعىتى رەتىندە اتاپ وتكەنى ايتىلدى.
«جاڭا تەحنولوگيالار, تسيفرلىق ورتا جانە جاساندى ينتەللەكت مەملەكەتتەردىڭ, ەكونوميكالاردىڭ جانە قوعامداردىڭ دامۋ باعىتىن بارعان سايىن ايقىنداي تۇسۋدە. وسىنداي تەحنولوگيالىق سەرپىلىس جاعدايىندا ۇلتتىق مادەني كودتى جوعالتپاۋ, ءتول بولمىسىمىزدى ساقتاۋ – اسا ماڭىزدى مىندەت», دەلىنگەن قۇتتىقتاۋ حاتتا.
سەمينار اياسىندا تاريح عىلىمدارىنىڭ دوكتورى جامبىل ارتىقباەۆ, سۋرەتشى, ديزاينەر, «قازاق ويۋلارى» كىتابىنىڭ اۆتورى ەرلان قوجاباەۆ, ديزاينەر فاريدا مەرحاميتقىزى بايانداما جاسادى. ساراپشىلار سوڭعى جىلدارى قازاق دۇنيەتانىمىنا ءتان ەمەس, ۇلتتىق بولمىستان الشاق كەيبىر قۇبىلىستاردىڭ ء«داستۇر» رەتىندە ناسيحاتتالىپ جۇرگەنىنە نازار اۋداردى. اسىرەسە ۇلتتىق ويۋ-ورنەكتەردى ورىندى ءارى ماعىنالىق تۇرعىدا دۇرىس قولدانۋ ماسەلەسى كوتەرىلىپ, ايەلدەرگە ءتان ويۋ-موتيۆتەردىڭ ەرلەر كيىمىندە ءجيى پايدالانىلۋى سىنعا الىندى. سونىمەن قاتار قازاق مادەنيەتىنە جات ەلەمەنتتەردىڭ ۇلتتىق مۇرا رەتىندە ۇسىنىلۋى دا تالقىلاندى.
بۇدان بولەك, الەۋمەتتىك جەلىلەر ارقىلى كەڭىنەن تارالىپ جۇرگەن, الايدا تاريحي نەگىزى جوق «جاڭا داستۇرلەردىڭ» قوعام ساناسىنا اسەرى ءسوز بولدى. ماماندار مۇنداي ۇردىستەر قالىپتاسقان مادەني نورمالار مەن قۇندىلىقتارعا كەرى ىقپال ەتىپ, ءتول سالت-ءداستۇردىڭ ءمانىن بۇرمالايتىنىن اتاپ ءوتتى. ءىس-شارا بارىسىندا داستۇرلەردى كوممەرتسيالاۋ ماسەلەسى دە كوتەرىلدى
سەميناردى قورىتىندىلاي كەلە قاتىسۋشىلار ۇلتتىق مادەني مۇرانى ساقتاۋ مەن دامىتۋدا عىلىمي نەگىزگە سۇيەنۋ, جاۋاپتى كوزقاراس قالىپتاستىرۋ, سونداي-اق ءداستۇر مەن زاماناۋيلىقتىڭ ۇيلەسىمىن قامتاماسىز ەتۋ قاجەتتىگىن اتاپ ءوتتى.
