ۇكىمەت فارماتسەۆتيكالىق وندىرىستەردى لوكاليزاتسيالاۋ بويىنشا دەنساۋلىق ساقتاۋ مينيسترلىگى مەن «التينفارم» جشس, «مسپ-رومفارم» جشس, «ابدي يبراگيم گلوبال فارم» جشس جانە «نوبەل الماتى فارماتسەۆتيكا فابريكاسى» اق اراسىندا ينۆەستيتسيالار تۋرالى كەلىسىمدەر جاساسۋدى ماقۇلدادى. بەكىتىلگەن جوبالارعا تارتىلعان ينۆەستيتسيالاردىڭ جالپى كولەمى – 173 ملرد تەڭگە. پرەمەر-مينيستر ولجاس بەكتەنوۆ ءتيىستى قاۋلىلارعا قول قويدى.
جوبالاردى جۇزەگە اسىرۋ ارقىلى الەۋمەتتىك ماڭىزى بار دارىلىك زاتتاردى قوسا العاندا, 356 ءدارى-دارمەك ءتۇرىنىڭ ءوندىرىسىن لوكاليزاتسيالاۋ كوزدەلگەن. وندىرىستىك جەلى ونكولوگيالىق اۋرۋلار مەن قانت ديابەتىن ەمدەۋگە ارنالعان دارىلەردى, سونداي-اق يممۋنوبيولوگيالىق, ۆيرۋسقا قارسى, انتيانەميالىق, اۋىرسىنۋدى باساتىن, قابىنۋعا قارسى, سۋىق تيۋگە قارسى, سونداي-اق ميكروبتارعا قارسى پرەپاراتتاردى قامتيدى. جاڭا كاسىپورىندار الماتى قالاسىندا, تۇركىستان مەن الماتى وبلىستارىندا ورنالاسادى.
اتاپ ايتقاندا, «التينفارم» جشس جوباسى بويىنشا فارماتسەۆتيكالىق زاۋىتتى الماتى قالاسىنداعى «يننوۆاتسيالىق تەحنولوگيالار پاركى» ارنايى ەكونوميكالىق ايماعىندا سالۋ كوزدەلىپ وتىر. ينۆەستيتسيا كولەمى – 58,5 ملرد تەڭگە. جوبا اياسىندا 54 دارىلىك زات ءتۇرىن شىعارۋ جوسپارلانعان, ونىڭ 35-ءى – الەۋمەتتىك ماڭىزى بار پرەپاراتتار. وندىرىستىك پورتفەلگە يممۋنوبيولوگيالىق پرەپاراتتار, سونداي-اق ونكولوگيالىق اۋرۋلار مەن قانت ديابەتىن ەمدەۋگە ارنالعان ءدارى-دارمەكتەر كىرەدى. جوبا اياسىندا 60 جاڭا جۇمىس ورنىن اشۋ كوزدەلگەن. ستراتەگيالىق سەرىكتەستەر رەتىندە «Sinopharm», «Sinovac» جانە «Kangtai Biological Technology» كومپانيالارى قاتىسادى.
«نوبەل الماتى فارماتسەۆتيكا فابريكاسى» اق جوباسى سونداي-اق الماتىدا حالىقارالىق GMP ستاندارتتارىنا سايكەس بەلسەندى فارماتسەۆتيكالىق ينگرەديەنتتەردى, دارىلىك زاتتار مەن بيوپرەپاراتتار وندىرۋگە ارنالعان فارماتسەۆتيكالىق كەشەن سالۋدى كوزدەپ وتىر. ينۆەستيتسيا كولەمى – 39,2 ملرد تەڭگە. 53 دارىلىك زات شىعارۋ جوسپارلانعان, ونىڭ ىشىندە 17-ءسى – الەۋمەتتىك ماڭىزى بار. جوبا اياسىندا كەمىندە 200 جۇمىس ورنىن اشۋ كوزدەلگەن. ستراتەگيالىق سەرىكتەس – «Nobel İlaç».
«ابدي يبراگيم گلوبال فارم» جشس جوباسى اياسىندا الماتى وبلىسىندا كوپسالالى وندىرىستىك جەلىلەرى بار فارماتسەۆتيكالىق كەشەن قۇرۋ كوزدەلگەن. ينۆەستيتسيا كولەمى – 39 ملرد تەڭگە. 76 دارىلىك زات شىعارۋ جوسپارلانعان, ونىڭ ىشىندە ۆيرۋسقا قارسى پرەپاراتتار, II ءتيپتى قانت ديابەتىن ەمدەۋگە ارنالعان ءدارى-دارمەكتەر جانە انتيانەميالىق پرەپاراتتار بار. جوبا اياسىندا كەمىندە 150 جۇمىس ورنى اشىلادى. ستراتەگيالىق سەرىكتەس – «Abdi Ibrahim».
«مسپ-رومفارم» جشس جوباسى بويىنشا ينۆەستيتسيالاردىڭ جالپى كولەمى 36,7 ملرد تەڭگە بولاتىن جوعارى تەحنولوگيالى فارماتسەۆتيكالىق زاۋىتتى تۇركىستان وبلىسىنداعى TURAN ارنايى ەكونوميكالىق ايماعىندا, الماتى وبلىسىنداعى وندىرىستىك الاڭداردا سالۋ كوزدەلگەن. جوبا اياسىندا 101 دارىلىك زات, ونىڭ ىشىندە اۋىرسىنۋدى باساتىن, قابىنۋعا قارسى, سۋىق تيۋگە قارسى, سونىمەن قاتار, ميكروبتارعا قارسى پرەپاراتتار ءوندىرۋ جوسپارلانعان. شامامەن 265 جۇمىس ورنى اشىلادى. جوبانىڭ سەرىكتەستەرى – «World Medicine» جانە «Rompharm» كومپانيالارى.
ينۆەستيتسيالىق جوبالاردى جۇزەگە اسىرۋ شەڭبەرىندە بارلىعى شامامەن 675 جاڭا جۇمىس ورنى اشىلادى. زاۋىتتار قۇرىلىسى, ولاردى ىسكە قوسۋ وتاندىق دارىلىك زاتتار ءوندىرىسىنىڭ ۇلەسىن ايتارلىقتاي ارتتىرۋعا, فارماتسەۆتيكا نارىعىنداعى يمپورتقا تاۋەلدىلىكتى ازايتۋعا, ءدارى-دارمەكپەن قامتاماسىز ەتۋ جۇيەسىنىڭ تۇراقتىلىعىن نىعايتۋعا, حالىقتى وتاندىق ءوندىرىستىڭ ساپالى ءارى قولجەتىمدى ءدارى-دارمەكتەرىمەن قامتۋعا مۇمكىندىك بەرەدى. بۇل ءدارى-دارمەك قاۋىپسىزدىگىن ارتتىرۋ مەن دەنساۋلىق ساقتاۋ جۇيەسىنىڭ تۇراقتىلىعىن كۇشەيتۋدىڭ ماڭىزدى ەلەمەنتتەرىنىڭ بىرىنە اينالادى.
