بۇعان دەيىن اشىلعان مەكتەپتەردىڭ سوڭىن الا, ياعني ۇلتتىق جوبانى تياناقتاعان اقتاۋ قالاسىنىڭ 16-شاعىن اۋدانىندا اشىلعان №35 جالپى ءبىلىم بەرەتىن مەكتەپ بولدى. بۇل – ماڭعىستاۋ وبلىسىندا اتالعان جوبا بويىنشا ىسكە قوسىلعان ون ءۇشىنشى مەكتەپ.
1 500 وقۋشىعا ەسەپتەلگەن جاڭا فورماتتاعى ءبىلىم بەرۋ ۇيىمىنىڭ جالپى اۋماعى 15 مىڭ شارشى مەتردەن اسادى. وقۋ ورداسىندا 77 ءپان كابينەتى قاراستىرىلعان, ولاردىڭ ىشىندە ديزاين جانە تەحنولوگيا, تاماقتانۋ مادەنيەتى, ۆيزۋالدى ونەر, ءۇي مادەنيەتى, روبوتتەحنيكا, STEM جانە مۋزىكا باعىتىنداعى ارنايى سىنىپتار بار. ءبىلىم ورداسى زاماناۋي وقۋ قۇرال-جابدىقتارىمەن تولىق قامتىلىپ, وقۋشىلاردىڭ شىعارماشىلىق الەۋەتى مەن زياتكەرلىك دامۋىنا قولايلى ورتا قالىپتاستىرىلعان.
جاڭا ءبىلىم ورداسىنىڭ اشىلۋ راسىمىنە ماڭعىستاۋ وبلىسىنىڭ اكىمى نۇرداۋلەت قيلىباي قاتىسىپ, ۇستازدار مەن وقۋشىلاردى جاڭا مەكتەپتىڭ اشىلۋىمەن قۇتتىقتادى.
– مەملەكەت باسشىسىنىڭ تاپسىرماسىنا سايكەس وڭىرىمىزدە زاماناۋي ۇلگىدەگى مەكتەپتەر كەزەڭ-كەزەڭىمەن بوي كوتەرىپ جاتىر. بۇل باستاما بالالاردىڭ ساپالى ءبىلىم الىپ, بولاشاق ماماندىعىن ەرتەرەك تاڭداۋىنا جول اشادى. جاڭا مەكتەپتەر تەك ءبىلىم بەرۋ ورنى ەمەس, وقۋشىلاردىڭ قابىلەتىن اشىپ, ولاردىڭ جان-جاقتى دامۋىنا جاعداي جاسايتىن كەڭىستىككە اينالۋعا ءتيىس, – دەدى ءوڭىر باسشىسى.
مەكتەپ عيماراتىنىڭ تاعى ءبىر ارتىقشىلىعى – ەرەكشە ءبىلىم بەرۋدى قاجەت ەتەتىن بالالارعا دا بەيىمدەلگەن. مۇندا سەنسورلىق بولمە, ينكليۋزيۆتى ءبىلىم بەرۋدى قولداۋ كابينەتى جۇمىس ىستەيدى, سونداي-اق مۇمكىندىگى شەكتەۋلى وقۋشىلارعا ارنايى جەدەلساتى ورناتىلعان. سونداي-اق قاۋىپسىزدىكتى قامتاماسىز ەتۋ ماقساتىندا مەكتەپ ىشىندە 126 بەينەباقىلاۋ كامەراسى ورناتىلىپ, اۋماعىندا بالالارعا ارنالعان ويىن جانە سپورت الاڭدارى سالىنعان.
سونداي-اق «كەلەشەك مەكتەپتەرى» ۇلتتىق جوباسى اياسىندا ءبىر جىل ىشىندە بىرنەشە جاڭا ءبىلىم ورداسى ىسكە قوسىلعان مۇنايلى اۋدانىندا ءۇش اۋىسىمدى وقىتۋ تۇبەگەيلى جويىلدى.
– ءۇش اۋىسىمدى وقىتۋدى جويۋ ماقساتىندا «كەلەشەك مەكتەپتەرى» ۇلتتىق جوباسى اياسىندا بىلتىر بىرنەشە ءبىلىم بەرۋ نىسانى ىسكە قوسىلدى. اتاپ ايتقاندا, باتىر اۋىلدىق وكرۋگى مەن «سامال», «حازار» شاعىن اۋداندارىندا 1200 ورىندىق ەكى مەكتەپ, ماڭعىستاۋ اۋىلىنىڭ «ايراقتى» تۇرعىن ءۇي ماسسيۆىندە 900 ورىندىق مەكتەپ, باسقۇدىق اۋىلدىق وكرۋگىندە 395 ورىندىق «باستاۋ» جەكەمەنشىك باستاۋىش مەكتەبى پايدالانۋعا بەرىلدى. وسى نىسانداردىڭ اشىلۋى ارقىلى اۋدانداعى ءۇش اۋىسىمدى وقۋ ماسەلەسى تولىق شەشىلدى, – دەدى اۋدان باسشىسى قانات قۇلجانوۆ.
زاماناۋي جاڭا مەكتەپ – وقۋشى ءۇشىن جايلى جاعدايدا الاڭسىز ءبىلىم الۋدىڭ كەپىلى. ماڭعىستاۋدا اشىلعان جاڭا مەكتەپتەر وقۋشىلار مەن اتا-انالار ءۇشىن قۋانىش سىيلاپ كەلەدى.
ماڭعىستاۋ وبلىسى
