ۇلتتىق جوبا اياسىندا بوي كوتەرگەن ءبىلىم وردالارىنىڭ ارقايسىسى 900 وقۋشىعا ەسەپتەلىپ وتىر. وبلىس اكىمىنىڭ ورىنباسارى قايرات نۇرتاەۆتىڭ پىكىرىنشە, وسى زامانعى مەكتەپتەر جاس بۋىننىڭ ساپالى ءبىلىم الۋىنا مۇمكىندىك بەرەدى. ويتكەنى مەملەكەتتىڭ باستى ساياساتىنىڭ ءبىرى – وسكەلەڭ ۇرپاقتىڭ سانالى, بىلىكتى بولۋىنا قولداۋ كورسەتۋ.
«جاڭا مەكتەپتەر زاماناۋي ۇلگىدەگى وزىق قۇرال-جابدىقتارمەن تولىق قامتىلدى. ەندى شاعىن اۋدانداعى بالالار قالانىڭ ورتالىعىنداعى وزگە ءبىلىم وردالارىنا شاپقىلاماي, ءوز ءۇيىنىڭ ماڭىنداعى مەكتەپتە وقيتىن بولادى», دەدى ق.نۇرتاەۆ.
قالالىق ءبىلىم ءبولىمىنىڭ باسشىسى ايناگۇل دۇيسەكەنوۆانىڭ مالىمەتىنشە, جاڭا مەكتەپ مەكتەپكە دەيىنگى, باستاۋىش پەن ورتا ءبىلىم بەرۋ باعىتىندا جۇمىس ىستەيدى. وقۋشىلار ءۇش قاباتتى عيماراتتاعى 25 سىنىپتا وقيدى. سونداي-اق STEM-زەرتحانالار, روبوتتەحنيكا مەن ينكليۋزيۆتى ءبىلىم بەرۋگە ارنالعان كابينەتتەر, سپورت زالى, كىتاپحانا, ءماجىلىس زالى, اسحانا بار.
وبلىس اكىمىنىڭ ورىنباسارى دارىن شامۇراتوۆتىڭ ءمالىم ەتۋىنشە, ءبىلىم وردالارىنداعى قاۋىپسىزدىككە باسا كوڭىل ءبولىنىپ وتىر. قازىر وڭىردەگى 520 مەكتەپتە بەينەكامەرا بار. ال اتىراۋ قالاسىندا «Nazar» جوباسى اياسىندا ءبىلىم وردالارىنا ورناتىلعان 2500-گە جۋىق كامەراداعى جازبانى جەدەل باسقارۋ ورتالىعىنان باقىلاۋعا بولادى.
«اتىراۋ قالاسىندا 2024 جىلى «Nazar» جوباسى ىسكە قوسىلدى. بۇل – ەلىمىزدە تەك اتىراۋ قالاسىندا جۇزەگە اسىرىلعان بىرەگەي باعدارلاما. جوبا تەك قاۋىپسىزدىكتى عانا ەمەس, ساباق ءوتۋ ساپاسىن دا باقىلاۋعا مۇمكىندىك بەرەدى. اتالعان جوبا ادىسكەرلەردىڭ جۇمىسىن جەڭىلدەتەدى. ەندى كامەرا فۋنكتسياسىنا جاساندى ينتەللەكت ەنگىزىلىپ, قاۋىپسىزدىكتى كۇشەيتۋ كوزدەلىپ وتىر», دەدى د.شامۇراتوۆ.
اكىم ورىنباسارىنىڭ دەرەگىنە قاراعاندا, وبلىستاعى 495 ءبىلىم بەرۋ نىسانى تۋرنيكەتپەن, 462 مەكەمە ليتسەنزيالانعان كۇزەتپەن, ال 520 نىسان دابىل تۇيمەسىمەن جابدىقتالىپتى. سونداي-اق مەملەكەتتىك بالاباقشالاردىڭ كىرەبەرىسىنە بايلانىس قۇرىلعىلارى ورناتىلىپتى. ال تەرروريستىك تۇرعىدان وسال دەپ تانىلعان 364 نىسان جەدەل باسقارۋ ورتالىعىنا قوسىلىپتى.
اتىراۋ وبلىسى
