فوتو: پاۆلودار وبلىسىنىڭ ادىلەت دەپارتامەنتى (ارحيۆ)
2022 جىلعى 1 شىلدەدەن باستاپ ىسكە قوسىلعان eOtinish جۇيەسى وتىنىشتەردى قابىلداۋ, وڭدەۋ جانە ورىندالۋىن باقىلاۋ ۇدەرىستەرىن تولىق اۆتوماتتاندىردى. بۇگىندە پايدالانۋشىلار ونلاين رەجيمدە ءوتىنىش مارتەبەسىن قاداعالاپ, مەملەكەتتىك ورگاندارمەن ءوزارا ارەكەتتەسۋ تاريحىن كورەدى, جاۋاپتاردىڭ ساپاسىن باعالايدى, ورىندالۋىنا شاعىم جولدايدى, سونداي-اق سوتقا ارىز بەرە الادى. مۇنىڭ ءبارى ازامات ءۇشىن اشىق ءارى تۇسىنىكتى ورتا قالىپتاستىردى.
«تىڭدايتىن مەملەكەت» قاعيداتىن ەنگىزۋ مەملەكەت باسشىسىنىڭ 2021 جىلعى 26 قاڭتاردا ۇكىمەتتىڭ كەڭەيتىلگەن وتىرىسىندا بەرگەن تاپسىرماسىنان كەيىن جۇيەلى سيپات الدى. سونىڭ ناتيجەسىندە eOtinish.kz بىرىڭعاي اقپاراتتىق پلاتفورماسىن ەنگىزۋ بويىنشا اۋقىمدى جۇمىستار جۇرگىزىلدى. ال 2020 جىلعى 29 ماۋسىمدا قابىلدانعان №350-VI اكىمشىلىك راسىمدىك-پروتسەستىك كودەكستىڭ كۇشىنە ەنۋى وتىنىشتەرمەن جۇمىس ىستەۋ ءتاسىلىن تۇبەگەيلى جاڭارتتى.
«بۇگىندە eOtinish مەملەكەت پەن حالىق اراسىنداعى تسيفرلىق ءوزارا ءىس-قيمىلدا ماڭىزدى ءرول اتقارىپ, ازاماتتاردىڭ جوعارى سەنىمىنە يە بولىپ وتىر. «ۇات» اق كومانداسى جۇيەنى ودان ءارى ىڭعايلى ءارى ءتيىمدى ەتۋ باعىتىندا جۇيەلى تۇردە دامىتىپ كەلەدى. قازىرگى تاڭدا ءبىز جەدەل ارەكەت ەتۋ مەن دەرەكتەردى تالداۋعا ارنالعان جاساندى ينتەللەكت كومەكشىلەرىن ەنگىزۋ جانە جەتىلدىرۋ جۇمىستارىن جۇرگىزىپ جاتىرمىز», دەدى ۇات اق باسقارما توراعاسىنىڭ ورىنباسارى گۇلميرا يسابەكوۆا.
بىرىڭعاي تسيفرلىق پلاتفورماعا دەيىن وتىنىشتەر ءار ۆەدومستۆونىڭ ءوز ارنالارىمەن قابىلدانىپ, تىركەلەتىن. بۇل ازاماتتار ءۇشىن قولايسىزدىق تۋعىزىپ, اشىقتىقتى تومەندەتىپ, ۆەدومستۆوارالىق باقىلاۋدى السىرەتەتىن, eOtinish وسى ولقىلىقتاردىڭ ورنىن تولتىرىپ, وتىنىشتەردى ءبىر جۇيەگە بىرىكتىردى, ورىنداۋ مەرزىمىن ناقتى باقىلاۋعا مۇمكىندىك بەردى.
وقي وتىرىڭىز: پارلامەنتتىك رەفورما بويىنشا ۇسىنىستار eGov جانە e-Otinish ارقىلى قابىلدانادى
ستاتيستيكا دا جۇيەنىڭ ماڭىزىن ايقىن كورسەتەدى. 2025 جىلى پلاتفورما ارقىلى جەكە تۇلعالاردان 4 ميلليوننان استام, زاڭدى تۇلعالاردان 1 ميلليونعا جۋىق ءوتىنىش كەلىپ ءتۇستى. بۇل 2024 جىلمەن سالىستىرعاندا شامامەن 1 ميلليونعا كوپ. دەمەك, eOtinish ازامات پەن مەملەكەتتىڭ اراسىنا كوپىر بولىپ قانا قويماي, تسيفرلىق سەنىمنىڭ دە بەرىك تەتىگىنە اينالىپ كەلەدى.
