اكتسيانىڭ اشىلۋ راسىمىنە قوستاناي اۋدانىنىڭ پروكۋرورى قايرات ءابدىروۆ, اۋدان اكىمى ولجاس نۇرعاليەۆ, اۋداندىق مۇگەدەكتەر قوعامىنىڭ توراعاسى قونىسباي سادىربەكوۆ, اۋدان كولەمىندەگى كاسىپورىندار مەن شارۋاشىلىق وكىلدەرى, قوعامدىق, مەملەكەتتىك مەكەمەلەردىڭ ماماندارى, زاڭ ورىندارىنىڭ قىزمەتكەرلەرى قاتىستى.
ءىس-شارا بارىسىندا مۇمكىندىگى شەكتەۋلى ازاماتتارعا لايىقتى بوس جۇمىس ورىندارى, جالپى جانە كاسىبي ءبىلىم بەرۋ باعدارلامالارى تۋرالى اقپارات بەرىلدى. سونداي-اق زاعيپ جانداردىڭ قۇقىقتارى, مەملەكەتتىك قولداۋ شارالارى جانە ۋاكىلەتتى مەملەكەتتىك ورگانداردىڭ بايلانىس دەرەكتەرى تۋرالى بروشيۋرا, جادىنامالار تاراتىلدى.
اتالعان اكتسيا اياسىندا پروكۋراتۋرا قىزمەتكەرلەرى مەن اۋداندىق جۇمىسپەن قامتاماسىز ەتۋ ءبولىمىنىڭ ماماندارىنان قۇرالعان ءموبيلدى توپ ءجۇرىپ-تۇرۋى قيىن 5 تۇرعىننىڭ ۇيىنە بارىپ, جاي-كۇيىمەن تانىسىپ, الەۋمەتتىك قولداۋ شارالارى تۋرالى اقپارات بەردى.
جارمەڭكەگە 70-تەن اسا مۇمكىندىگى شەكتەۋلى ادام كەلدى. ءبىرازى دەنساۋلىعىنا, الەۋمەتتىك جاردەماقىعا, باسپانا ماسەلەسىنە قاتىستى قۇقىقتىق كەڭەس السا, ون شاقتى ادام مەحانيك, تىگىنشى, كۇزەتشى بولىپ جۇمىسقا ورنالاساتىن بولىپ كەلىستى.
