سۋرەت: shakarim.university
بۇل – جەكەلەگەن باستامالار جيىنتىعى ەمەس, مەملەكەتتىڭ الداعى دامۋىن ايقىندايتىن تۇتاس لوگيكا: ينستيتۋتتاردىڭ ساپاسى, جاۋاپكەرشىلىك پەن تۇراقتىلىق. ەلىمىزدىڭ ورنىقتىلىعى ورتالىقتا عانا ەمەس, ەڭ الدىمەن وڭىرلەردە قالىپتاسادى. تابيعي رەسۋرستاردى باسقارۋ, سۋ قاۋىپسىزدىگى, ينفراقۇرىلىم, الەۋمەتتىك سالا مەن ادام كاپيتالى ماسەلەلەرى ءدال وسى جەردە توعىسادى. رەفورمالاردىڭ شىنايى تيىمدىلىگى دە ەڭ الدىمەن وڭىرلەردە سىنالادى.
پرەزيدەنت سۋ رەسۋرستارى, ەكولوگيا, ەنەرگەتيكا, اۋىل شارۋاشىلىعى مەن ينفراقۇرىلىم ماسەلەلەرىنە ەرەكشە نازار اۋداردى. بۇل باعىتتار بۇگىندە سالالىق شەڭبەردەن شىعىپ, ۇلتتىق قاۋىپسىزدىك پەن ازاماتتاردىڭ ءومىر ساپاسىنا تىكەلەي اسەر ەتەتىن فاكتورلارعا اينالدى. ولاردى ءتيىمدى شەشۋ جەرگىلىكتى دەڭگەيدە كاسىبي كادرلار, ساپالى دەرەكتەر جانە عىلىمي ساراپتاما بولعان جاعدايدا عانا مۇمكىن بولادى. وسى تۇرعىدا وڭىرلىك ۋنيۆەرسيتەتتەردىڭ ءرولى تۇبەگەيلى ارتادى.
قازىرگى ۋنيۆەرسيتەت – قىزمەت كورسەتۋشى قۇرىلىم ەمەس, اۋماقتىڭ زياتكەرلىك ورتالىعى. ول قولدانبالى شەشىمدەر كوزىنە, ناقتى ەكونوميكاعا قاجەتتى كادرلاردى دايارلايتىن جانە جاۋاپتى ازاماتتىق سانانى قالىپتاستىراتىن ينستيتۋتقا اينالۋعا ءتيىس. عىلىم ءوڭىردىڭ ناقتى مىندەتتەرىن شەشۋگە باعىتتالىپ, ءبىلىم دامۋ ۇدەرىستەرىمەن تىكەلەي بايلانىستا بولۋى كەرەك.
پرەزيدەنت اتاپ وتكەن ينستيتۋتسيونالدىق باستامالار – كونستيتۋتسيالىق كوميسسيا قۇرۋ, ساياسي جۇيەنى جاڭعىرتۋ – ءبىرتۇتاس باسقارۋ ارحيتەكتۋراسىن قالىپتاستىرۋعا باعىتتالعان. مۇندا قۇقىق, جاۋاپكەرشىلىك پەن تيىمدىلىك مەملەكەتتىك باسقارۋدىڭ نەگىزگى قاعيداتتارىنا اينالادى.
الدىمىزداعى مىندەت – مەملەكەتتىك باسىمدىقتاردى, وڭىرلىك سىن-قاتەرلەردى, عىلىم مەن ءبىلىمدى ءبىر جۇيەگە بىرىكتىرە وتىرىپ, تۇراقتى شەشىمدەر قالىپتاستىرۋ, ەل بولاشاعىنا قاجەتتى كادرلاردى دايارلاۋ. كەلەسى كەزەڭدە – جاريالانعان ستراتەگيالىق باعىتتاردى جاۋاپكەرشىلىكپەن ىسكە اسىرىپ, ياعني ولاردىڭ زاڭداردا, ينستيتۋتتاردا, ۋنيۆەرسيتەتتەردە, سونداي-اق ەلىمىزدىڭ ءاربىر وڭىرىندە ناقتى ناتيجەلەر ارقىلى كورىنۋى كەرەك.
دۋمان ورىنبەكوۆ,
شاكارىم ۋنيۆەرسيتەتىنىڭ رەكتورى
