سۋرەت: baq.kz
مەرزىمى وتكەن نەسيەلەرى بار ازاماتتاردىڭ بانكتىك شوتتارىن بۇعاتتاۋ تاجىريبەسىن قايتا قاراۋدى ۇسىندىم. ويتكەنى بۇل ادامنىڭ جۇمىس ىستەۋىنە, ءارتۇرلى تولەم جاساۋىنا كەدەرگى كەلتىرەدى. ءبىر سوزبەن ايتقاندا, ادام قۇقىعىن شەكتەۋمەن بىردەي. مۇنى تولىعىمەن توقتاتۋ نەمەسە جارتىلاي عانا بۇعاتتاپ, قاراجاتتىڭ قالعان بولىگىن ادام ءوزى پايدالانا الاتىنداي مۇمكىندىك جاسالۋى كەرەك. حالىقتىڭ تالاپ-تىلەگىنەن تۋعان ۇسىنىسىما سايكەس بانك قىزمەتىنە قاتىستى شەشىم قابىلداندى. قاتاڭ شارالار جۇزەگە اسىرىلاتىن بولدى. ونلاين نەسيە بەرىلمەيتىن بولدى. نەسيە العىسى كەلگەن ادام بانككە ءوزى بارىپ, تىركەلۋى كەرەك.
ءجيى سىنعا ىلىگەتىن ءبىلىم مەن مەديتسينا سالاسى بويىنشا دا كەيبىر تۇيتكىلدىڭ ءتۇيىنى وسى جيىندا تارقاتىلعانداي. مەن بۇعان دەيىن قۇر قاڭقاسى عانا بار, بىراق قۇرال-جابدىعى جوق جەكە مەكتەپتەردەگى ءبىلىم ساپاسى تۋرالى ايتقان ەدىم. مۇنداي ءبىلىم وردالارى ادامدى جۇمىسقا قابىلداردا كوبىنە ەڭبەك شارتىن جاسامايدى. ۋاقىتشا الادى, وندا دا ايلىق جالاقىسىن دۇرىس تولەمەيدى, زەينەتاقى جارناسىن اۋدارمايدى. پرەزيدەنت قۇرىلتايدا كەيىنگى كەزدە وزىنە جەكەمەنشىك مەكتەپتەردى قارجىلاندىرۋ تەتىگىنە قاتىستى ازاماتتاردان كەلىپ تۇسەتىن ساۋالدار جيىلەپ كەتكەنىن ايتتى. ءبىلىم بەرۋ سالاسىندا مەملەكەتتىك قارجىلاندىرۋدىڭ قولدانىستاعى ءتارتىبى بۇرمالانىپ وتىرعانىن اتاپ ءوتىپ, ونى شۇعىل تۇردە تۇزەتۋ قاجەتتىگىن مالىمدەدى. وسىعان بايلانىستى ۇكىمەتكە ءبىلىم بەرۋ سالاسىن مەملەكەتتىك قارجىلاندىرۋ مەحانيزمىن جەدەل رەفورمالاۋدى مىندەتتەدى. ءجيى سىنعا ىلىگەتىن مەديتسينالىق ساقتاندىرۋ جۇيەسىنىڭ اشىقتىعى تۋرالى ماسەلە دە كوتەرىلدى. مەملەكەت باسشىسى الەۋمەتتىك مەديتسينالىق ساقتاندىرۋ ء(مامس) قورىنداعى كەشەندى تەكسەرىس ناتيجەسىندە كوپتەگەن زاڭبۇزۋشىلىق دەرەكتەرى انىقتالعانىن جەتكىزدى. ۇكىمەتتىڭ اتالعان ساقتاندىرۋ قورىن قارجى مينيسترلىگىنىڭ قاراۋىنا بەرۋ تۋرالى شەشىمىن قۇپتادى.
مۇرات ابەنوۆ,
ءماجىلىس دەپۋتاتى
