كوپبالالى, قاراپايىم جۇمىسشى وتباسىندا دۇنيەگە كەلگەن ءادىل شاياحمەت ۇلى ەڭبەك پەن بىرلىكتى, سىيلاستىق پەن جاۋاپكەرشىلىكتى ومىرلىك قاعيدا ەتكەن ورتادا ءوسىپ-جەتىلدى. ءوز سالاسىن, كاسىبىن ىقىلاسپەن تاڭداعان ءادىل اۋىلداعى اتا-اناسىنىڭ مەيىرىمگە تولى, جىلى قۇشاعىنان ۇزاپ, الماتىداعى قازىرگى اباي اتىنداعى رەسپۋبليكالىق مامانداندىرىلعان دارىندى بالالارعا ارنالعان قازاق ءتىلى مەن ادەبيەتىن تەرەڭدەتە وقىتاتىن مەكتەپ-ينتەرناتىنا قابىلداندى. سول كەزدەگى ەلىمىزدىڭ استاناسىنا جىبەرە وتىرىپ اكەسى قايسار, بىلىمگە قۇشتار ۇلىنىڭ كەيىن ەلىنە قىزمەت ەتەتىن, تۇتقا ۇستار ازامات بولاتىنىنا سەنىم ارتقان-دى.
ادەكەڭنىڭ تۇلعا بولىپ قالىپتاسۋىنا تاربيەشى ءشاربانۋ اناپيەۆا نەگىز قالاسا, ۇلاعاتتى ۇستاز, تاريحشى ورىنشا قارابالينا-قازىباەۆا, سونداي-اق سارا ماسينا, سامات ابدىرازاقوۆ, جادىگەر امانجولوۆ, تاعى باسقا دا مۇعالىمدەر ولشەۋسىز ەڭبەك ءسىڭىردى. ءادىل شاياحمەت ۇلىنىڭ شاكىرت رەتىندە ءوزى وقىعان ءبىلىم شاڭىراعىن, ونداعى مۇعالىمدەردى قالاي قۇرمەتتەيتىنىن كورگەندە, ەرەكشە تاڭعالدىم. مەكتەپتە كىم وقىمادى؟ بارلىق ادام ۇستاز الدىنان ءوتتى. بىراق ۇستازىن ەسكە الىپ, تۋعان كۇنىندە كىم قۇتتىقتاپ جاتىر؟ ونى ايتپاعاننىڭ وزىندە ادەكەڭنىڭ ۇستازدارىن ۇيىنە شاقىرىپ, داستارقان جايىپ, سىي-قۇرمەت كورسەتۋىنىڭ ءوزى قانداي عانيبەت! ولاردىڭ ءسونىمبۇبى انانىڭ قولىنان ءدام تاتىپ, ادىلدەي بالا تاربيەلەگەن شاڭىراققا ىقىلاستارىن ءبىلدىرۋى – ءبىر اڭگىمەگە ارقاۋ بولارلىق دۇنيە.
اباي اتىنداعى قازاق ۇلتتىق پەداگوگيكالىق ۋنيۆەرسيتەتى كاسىپوداق كوميتەتىنىڭ توراعاسى مۇقتار يبرايموۆ گەنەرال-لەيتەنانت ءادىل شاياحمەتوۆتىڭ قازاق ءتىلىن تەرەڭدەتە وقىتاتىن اباي اتىنداعى دارىندى بالالارعا ارنالعان مەكتەپ-ينتەرناتتىڭ تۇلەگى ەكەنىن ءاردايىم ماقتانىشپەن ايتاتىنىن تىلگە تيەك ەتەدى. «بۇرىنعى شاكىرت, قازىرگى گەنەرالدىڭ دەمەۋشىلىگىمەن ءوزى ءبىلىم العان مەكتەپ-ينتەرناتقا 2012 جىلى ۇلى ابايدىڭ ەسكەرتكىشىن ورناتىپ, ونىڭ اشىلۋ سالتاناتىنا جان-جاقتان مەكتەپ تۇلەكتەرى كەلگەن ءساتتى ۇستازدارى ءاردايىم ايتىپ ءجۇر. جاستاردىڭ بويىنا ەلجاندىلىق قاسيەتتى قالىپتاستىرۋ قاشاندا ماڭىزدى. مەكتەپتە اسكەري-پاتريوتتىق تاربيەگە ەرەكشە ءمان بەرىلىپ, ءار ساباق شىنايىلىعىمەن ەرەكشەلەنۋگە ءتيىس. وسىعان بايلانىستى مەكتەپتىڭ ۇستازدار ۇجىمىنىڭ ۇيعارىمىمەن اباي مەكتەبىندەگى العاشقى اسكەري دايىندىق كابينەتى مەكتەپ تۇلەگى, ۇلت جاناشىرى گەنەرال-لەيتەنانت ءادىل شاياحمەت ۇلىنىڭ ەسىمىمەن اتالعان. وسى ورايدا شاكىرتتەر باتىر اتالارىمەن ءجيى كەزدەسۋ وتكىزىپ, ۇلتىق رۋح, پاتريوتتىق تاربيە نەگىزدەرىن بويلارىنا ءسىڭىرىپ كەلەدى», دەيدى بۇرىنعى مەكتەپ ديرەكتورى مۇقتار يبرايموۆ.
وتباسىنداعى تاربيەنىڭ ورنى ايرىقشا بولدى. مايدانگەر اكەسى شاياحمەت عاينانوۆتىڭ سابىرلى مىنەزى مەن ومىرلىك دانالىعى, كوپبالانى تاربيەلەگەن «التىن القا» يەگەرى, ەل قۇرمەتىنە بولەنگەن اناسى ءسونىمبۇبى قۇدانالىقىزىنىڭ مەيىرىمى مەن ونەگەسى ونىڭ تۇلعا رەتىندە قالىپتاسۋىنا بەرىك نەگىز قالادى. وسى ءتالىم-تاربيە ادال ەڭبەك پەن ادامدىق ۇستانىمدى ومىرلىك مۇراتقا اينالدىردى.
تۋعان اپكەسى بەكتۇرسىن – اباي اتىنداعى پەداگوگيكالىق ينستيتۋتىن (قازىرگى قازۇپۋ) بىتىرگەن, ماتەماتيك, اعاسى ادىلبەك حالىقارالىق دارەجەدەگى سپورت شەبەرى, مارافوندا قازاقستاننىڭ ابىرويىن اسقاقتاتىپ, ەل نامىسىن قورعادى. قالعان باۋىرلارى دا ارقايسىسى ءوز سالاسىنان ورىن تاۋىپ, ءبىلىمدى دە بىلىكتى ازاماتتار بولىپ قالىپتاستى. وسىنداي تەكتى اۋلەتتەن تاراعان تاربيە مەن وتباسىلىق ءداستۇر ءادىل شاياحمەت ۇلىنىڭ ازاماتتىق بولمىسىن ايقىندادى.
«1963–1966 جىلدارى ءادىل ساۋرىق باتىر اۋىلىنداعى مەكتەپتىڭ باستاۋىش سىنىبىندا ءبىلىم الدى. العاش قالام ۇستاتقان بۇل التىن ۇيانى دا استە ەستەن شىعارعان ەمەس. ۇلتتىق قاۋىپسىزدىك كوميتەتىنىڭ الماتى وبلىسى بويىنشا دەپارتامەنتىنىڭ باستىعى بولىپ تۇرعان كەزدە ونىڭ ۇسىنىسىمەن, قاداعالاۋىمەن 2008 جىلى اۋىل مەكتەبىنىڭ جاڭا عيماراتى بوي كوتەردى. اۋىلعا جينالعان زيالى قاۋىم, سىيلى قوناقتاردىڭ, مۇعالىمدەر مەن وقۋشىلاردىڭ, اۋىل, اۋدان ازاماتتارىنىڭ قۋانىشتارىن كورىپ, ءتانتى بولدىم. سول جىلدارى ول اۋىلىنىڭ جولىن جاڭادان جاساتتى, گاز قۇبىرىن تارتۋعا ىقپال ەتتى, جاڭا تۇرعىداعى ەلەكتر شامدارىن ورناتتى. وسىنداي كورىكتى اۋىلدى بايقاعان «Qazaqstan» تەلەارناسىنىڭ جۋرناليستەرى «ىنتىماق اۋىلى» اتتى كوپسەريالى فيلم ءتۇسىردى. ونىڭ دا باسى-قاسىندا ءادىل ءىنىم تىنىم تاپپاي ءجۇردى», دەيدى اپكەسى بەكتۇرسىن.
«ۇستاز ءسوزى – شاكىرت جۇرەگىنە جول تابۋدا تەڭدەسى جوق قۇرال» دەپ سۋحوملينسكي ايتقانداي, مەكتەپتەگى, ومىردەگى, قىزمەتتەگى ۇستازدارىنىڭ ادامگەرشىلىك تۋرالى ايتقان ءار ءسوزىن ءادىل شاياحمەت ۇلى جۇرەگىنە جازا بەرگەن, ايتقان اقىلدارىن قۇلاعىنا قۇيا بىلگەن. ادەكەڭنىڭ ۇستازى سانالاتىن تاعى ءبىر ازامات بار. ول – مەملەكەت جانە قوعام قايراتكەرى, قاۋىپسىزدىك ورگاندارىنىڭ قۇرمەتتى قىزمەتكەرى, حالىق قاھارمانى, وتستاۆكاداعى گەنەرال-پولكوۆنيك ءسات توقپاقباەۆ. ءسات اعامىز: «ويىما وتكەن شاقتىڭ ەستەن كەتپەس كورىنىستەرى ورالدى. 1999 جىل بولاتىن. ورلەۋ باسپالداقتارىنان تۇراتىن ەلىمىزدەگى ءارتۇرلى قۋاتتى قۇرىلىمدارداعى باسشىلىق قىزمەتتەردى اتقارىپ جۇرگەن مەن قورعانىس ءمينيسترى لاۋازىمىندا ەدىم. ول كەزدە ارمياداعى كادرلار جەتىسپەۋشىلىگى ايقىن سەزىلەتىن. قۇرىلىمداعى مامانداردىڭ جەكە قىزمەتتىك ءىس-قاعازدارىن ارنايى سۇراۋمەن الدىرتىپ, ارقايسىسىمەن مۇقيات تانىستىم. بارلىق ىقىلاسىممەن سارالاعاندا تاڭداۋىم ۇلتتىق قاۋىپسىزدىك كوميتەتىنىڭ جەدەل تەحنيكا دەپارتامەنتى باستىعىنىڭ ءبىرىنشى ورىنباسارى قىزمەتىندەگى پولكوۆنيك ءادىل شاياحمەت ۇلىنا ءتۇستى. ول كەزدە ءادىلدى تانىمايتىنمىن. تەك قىزمەتىن ادال ءارى تىڭعىلىقتى اتقاراتىنىن عانا بىلەتىنمىن. وسىلايشا, بۇرىنعى قىزمەتىنەن اۋىسىپ, قازاقستان قارۋلى كۇشتەرىنىڭ كادرلار جانە اسكەري جوعارى ءبىلىم بەرۋ دەپارتامەنتىنىڭ باستىعى بولىپ تاعايىندالدى. تۋرا سول كەزدەن باستالعان ءبىزدىڭ تىعىز قارىم-قاتىناسىمىز كۇنى بۇگىنگە دەيىن جالعاسىن تاۋىپ كەلەدى», دەدى. گەنەرال-پولكوۆنيك اعامىزدىڭ پىكىرىنشە, ءادىلدىڭ تابيعاتى – اينالاسىنداعىلاردى باۋراپ اكەتەتىن قۇندى قاسيەتتەرگە باي. بۇل – كوپتى كورگەن, ءوز سالاسىنىڭ «مايىن ىشكەن» ارداقتى ارداگەردىڭ شىن پەيىلىنەن شىققان ءسوز.
ادەكەڭنىڭ ەڭبەكتە عانا ەمەس, ومىردە دە جاقسى قارىم-قاتىناستا بولعان ازاماتتاردى ەرەكشە قۇرمەتتەيتىن قاسيەتىن بايقادىق. ماسەلەن, ءادىل شاياحمەت ۇلى ءوزى دەمەۋشى بولىپ, گەنەرالدار كەڭەسى باسشىلىعىنىڭ وتىنىشىمەن حالىق قاھارمانى ساعادات نۇرماعامبەتوۆتىڭ قولادان قۇيىلعان ءمۇسىنىن جاساتىپ, ماسكەۋدەگى «تاعزىم تاۋىنداعى» مۇراجايعا ورناتىپ, ازاماتتىق تانىتتى. سول سەكىلدى ۇلتتىق قاۋىپسىزدىك كوميتەتىنىڭ بىرنەشە گەنەرالىنىڭ, وفيتسەرلەردىڭ مەرەيتويلارىن ۇيىمداستىردى. سول ءۇشىن ولاردىڭ ايتقان ىستىق لەبىزىنە دە كۋا بولدىق.
ساۋرىق باتىر اۋىلىنا ادەكەڭ ءجيى ات باسىن بۇرادى. سونداي ءساتتىڭ بىرىندە: «اعا, اۋىلعا كەلدىم. اۋىل – التىن بەسىك. اۋاسى قانداي جۇپار! اكەم مەن انامنىڭ وتىرعان ورنىن, اياعى باسقان جەرلەرىنە ءتاۋ ەتىپ, كۇش جينايمىن. قيماس جانداردىڭ كوزىن كورگەن قاريالارعا, انالارعا سالەم بەردىم. جىل وتكەن سايىن ولاردىڭ قاتارى سيرەپ بارادى. ءجيى كەلەتىنىم سوندىقتان», دەگەنى بار. ءاردايىم بالاسىنىڭ جولىن توسىپ جۇرەتىن اناسى بىردە: ء«ادىلجان, اۋىلعا كەلەتىنىڭدى ەشكىمگە ايتپاشى. ءتىپتى وزىڭمەن سويلەسۋگە ۋاقىت تاپپايتىن بولدىق قوي», دەگەن ەكەن. ويتكەنى ۇلتتىق قاۋىپسىزدىك كوميتەتىنىڭ باسشىلىعىنداعى ازاماتتىڭ جولىن توسىپ, ءوتىنىش-تىلەكتەرىن ايتاتىن جاندار از ەمەس ەدى. ەل قامىن ويلايتىن ءادىل شاياحمەت ۇلى وسىلايشا اناسىمەن شۇيىركەلەسىپ وتىرۋعا ۋاقىت تاپپايتىن ەدى-اۋ.
اتپال ازاماتتىڭ باتىر بابالارعا دەگەن قۇرمەتى دە ەرەكشە. ەل باسىنا كۇن تۋعان جوڭعار شاپقىنشىلىعى كەزىندە, ابىلاي حاننىڭ تۇسىنداعى داڭقتى باتىر قۇدايبەردى ءبيدىڭ باسىنا قۇلپىتاس قويسا, قوقان حاندىعىنا قارسى ۇرىستا ەرلىك كورسەتكەن مەدەتبەك باتىردىڭ كەسەنەسىن كوتەرىپ, ەسكەرتكىشىن ورناتتى. سول جيىندارعا جينالعان ءدۇيىم جۇرت ازاماتقا العىسىن جاۋدىردى.
ءبىر بايقاعانىم ادەكەڭ كوپشىل, ادامدارعا جاقسىلىق جاساۋعا اسىعىپ تۇرادى, پەندەنىڭ بەتىن قايتارماۋعا تىرىسادى. وسىعان وراي مىنا ءبىر جايدى قالامگەر كۇمىسجان بايجان ايتقان ەدى. «ادەتتەگى كۇزدىڭ كۇرەڭ ءبىر كۇنى بولاتىن. الاتاۋدىڭ ەتەگىندەگى اسەم عيمارات «حاما پارك» مەيرامحاناسىندا باسقوسۋ ءوتتى. وندا ومىردەن وتكەن, ەل قۇرمەتتەپ, قادىرلەگەن ازاماتتى ەسكە الىپ, ونىڭ اعايىن-تۋىس, اينالاسىنا جاساعان قامقورلىعى مەن ەڭبەگى تۋرالى ايتىلدى. بۇل شاراعا ۇيىتقى بولعان دا ادەكەڭ ەدى. جۇرەگى كەڭ, حالقىمىزدىڭ سالت-ءداستۇرىن قۇرمەتتەۋمەن ەرەكشەلەنگەن ءادىل باۋىرىم جاس كەزىندە بىرگە ىستەگەن, وزىنە اقىلشى بولعان ازاماتتىڭ رۋحىنا تاعزىم ەتۋدى ماقسات تۇتتى. جيىندا قازاقتىڭ تۇلعالى ازاماتى, مارقۇم حاميت راقىشەۆتىڭ ءومىرى مەن ەڭبەك جولى تۋرالى اڭگىمە ءوربىدى. كوپ جىل ونىمەن قىزمەتتەس بولعان, اعالىق قامقورلىعىنا بولەنگەن, ءبىراۋىز جىلى ءسوزىن, اقىل-كەڭەسىن ەستىگەندەر دە وسى ورتادان تابىلدى. جالپى, وتكەنگە اسا زور ىلتيپاتپەن, ىزگىلىكپەن كوز جۇگىرتىپ, اسىل ازامات جايىندا پىكىر ءبىلدىرۋ – تىرىلەرگە پارىز. ونى ءتۇسىنۋ مەن ءتۇيسىنۋ جاقسى ازاماتتارعا ءتان بولعاندىقتان, ءادىل حاميت قوشان ۇلىنىڭ جارى بالجان انامەن اقىلداسىپ, جاقسى ءىستى وسىلاي قولعا الدى.
ومىردەن مول تاجىريبە جيناپ, ادالدىقتىڭ تۋىن كوتەرە بىلگەن, ەڭبەكپەن ەسەيگەن جان تۋرالى جينالعان قاۋىم جاقسى لەبىزدەر ايتتى. وسى باسقوسۋدا ءادىلدىڭ باستاماسىمەن مارقۇم حاميت راقىشەۆ تۋرالى «حاما-عيبرات» ەستەلىك كىتابىن شىعارۋ جايى ءسوز بولدى. حالقىنىڭ قالاۋلىسى, ەلىنىڭ ەلەۋلىسىنە اينالعان ازاماتقا ريزا بولعاندا كوپشىلىك «جاقسىنىڭ جاقسىلىعىن ايت, نۇرى تاسىسىن» دەگەن. «تۇلپاردىڭ تۇياعى, اسىلدىڭ سىنىعى, تەكتى جەردىڭ ورەنى» دەپ تاڭداي قاققان. وسى كۇنى ءادىل ءىنىمىزدىڭ باستاماسىمەن كىتاپتىڭ العاشقى سىزباسى, نۇسقاسى قولعا الىناتىن بولىپ تۇيىندەلگەن-ءدى. مىنە, سول باستاما ناتيجەسىندە سياسى كەپپەگەن «حاما-عيبرات» كىتابىنىڭ تۇساۋى كەسىلىپ, وقىرمانعا جول تارتتى», دەدى كۇمىسجان بايجان.
وتاندىق وزىق نەيروحيرۋرگ, مەملەكەتتىك سىيلىقتىڭ لاۋرەاتى, قازاقستاننىڭ ەڭبەك ەرى, مەديتسينا عىلىمدارىنىڭ دوكتورى, پروفەسسور, ۇعا اكادەميگى سەرىك اقشولاقوۆتىڭ مىنا ءبىر ءسوزى دە قايران قالدىردى. «بىردە ءبىزدىڭ ەمدەۋ ورتالىعىنا ءبىر جاس جىگىت قاتتى اۋىرىپ ءتۇستى. مەن ول كەزدە الماتى قالاسىندا جۇمىس ىستەپ جۇرگەنمىن. وعان كۇردەلى وپەراتسيا جاساۋ كەرەك بولدى. ناۋقاس ادەكەڭنىڭ ءىنىسى مۇرات شاياحمەت ۇلى بولاتىن. ونىڭ جانىندا اعاسى ناۋقاستىڭ استى-ۇستىنە ءتۇسىپ, جانىن شۇبەرەككە ءتۇيىپ, جۇگىرىپ ءجۇردى. ارينە, ءىنىسى ءۇشىن كىم قىسىلتاياڭ ساتتە بايەك بولمايدى دەيسىز. بىراق كەز كەلگەن ناۋقاس بىزگە, ياعني دارىگەرلەرگە ول سەنىڭ تۋىسىڭ, تانىسىڭ بولسىن ءبارىبىر, ەڭ الدىمەن, ەمدەلۋشى رەتىندە قابىلدانادى. دەسەك تە باۋىرعا دەگەن اسقان جاناشىرلىقتى مەن سوندا ەرەكشە بايقادىم. ول دارىگەرلەردەن وزا قيمىل تانىتىپ, ىنىسىنە دەگەن مەيىرىمى ارقىلى اينالاسىنداعى ءبىزدى دە باۋراپ الدى. ادەكەڭمەن تانىستىعىمىز سول كەزدەن باستالدى. ونىڭ تاعى ءبىر ايرىقشا قاسيەتى – ۇلكەن ۇيىمداستىرۋشىلىق قابىلەتى. ءبىزدى سپورتپەن تۇراقتى شۇعىلدانۋعا جەتەلەدى, ءوزى دە تەننيستى جاقسى وينايدى. ايتەۋىر, ءادىل ءوزىنىڭ كىشىپەيىلدىگىمەن, ادامگەرشىلىگىمەن, ەشكىمدى الالامايتىندىعىمەن, دوسقا دەگەن شەكسىز ادالدىعىمەن ءتانتى ەتتى», دەپ شەشىلە سىر اقتاردى اتاقتى نەيروحيرۋرگ دوسى.
ءادىل شاياحمەت ۇلى ەڭبەك جولىن تاۋ-كەن ينجەنەرى بولىپ باستادى. بۇل ماماندىقتى ەلىنىڭ قامىن ويلايتىن جاندار عانا تاڭدايدى. بويىنداعى باتىلدىق, قايسارلىق كەيىن ونى ۇلتتىق قاۋىپسىزدىك سالاسىنا الىپ كەلدى. وسى سالادا قاتارداعى لەيتەنانتتان گەنەرال-لەيتەنانت شەنىنە دەيىن كوتەرىلدى. 2002–2007 جىلدارى ۇلتتىق قاۋىپسىزدىك كوميتەتىنىڭ پاۆلودار, الماتى وبلىستارىنداعى دەپارتامەنتتىڭ باستىعى بولدى. قوعام تىنىشتىعىن قامتاماسىز ەتۋدەگى قىزمەتتىڭ جۇگى دە باتپانداي بولاتىنى بەلگىلى. وڭىرلەردەگى زاڭعا قايشى كەلەتىن ءىس-ارەكەتتەردىڭ جولىن كەستى. 2007 جىلى پرەزيدەنت شەشىمىمەن ءادىل شاياحمەتوۆ ۇلتتىق قاۋىپسىزدىك كوميتەتى توراعاسىنىڭ ءبىرىنشى ورىنباسارلىعىنا تاعايىندالدى. ۇلتتىق قاۋىپسىزدىك كوميتەتىنىڭ توراعاسى قىزمەتىندە ەل تاۋەلسىزدىگىنىڭ نىعايۋى مەن قاۋىپسىزدىگىن قامتاماسىز ەتۋ جولىندا تىنىمسىز ەڭبەك ەتىپ, مەملەكەتتىڭ دامۋىنا ولشەۋسىز ۇلەس قوستى.
بۇل كۇندە ارداقتى ازامات وتباسىنداعى ۇل-قىزدارىنا قامقور اكە, نەمەرەلەرىنىڭ سۇيىكتى اتاسى. زايىبى ايسۇلۋ ەكەۋى – شاڭىراقتارىن باقىت باعىنا اينالدىرعان جاندار. ارينە, توككەن تەر, ەسەلى ەڭبەك ەشقاشان زايا كەتپەگەن. ءادىل شاياحمەت ۇلىنىڭ مەملەكەتتەن العان ناگرادالارى, ماراپاتتارى دا جەتكىلىكتى. گەنەرال-لەيتەنانت ءادىل شاياحمەتوۆ 6 وردەنمەن, ونىڭ ىشىندە ءى, ءىى دارەجەلى داڭق, قازاقستان ۇلتتىق وليمپيادا كوميتەتىنىڭ «التىن» وردەنىمەن, رەسەيدىڭ يۋ.اندروپوۆ اتىنداعى وردەنىمەن, ەلۋدەن اسا مەدالمەن ماراپاتتالعان. ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ, قانىش ساتباەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتىنىڭ قۇرمەتتى پروفەسسورى, بىرنەشە وبلىس, قالا, اۋداننىڭ قۇرمەتتى ازاماتى. ەلگە جاساعان جاقسىلىعى ءۇشىن اينالاسىنداعى ادامداردان, تۋعان-تۋىسىنان العان العىس – مۇنىڭ بارىنەن دە بيىك ەكەنى ءسوزسىز.
بۇگىندە گەنەرال-لەيتەنانت ءادىل شاياحمەت ۇلى 70 جاسقا تولىپ وتىر. بۇل – ەلگە سىڭگەن ەڭبەك باعالانىپ, كەيىنگى ۇرپاققا ۇلگى بولار جولدى ايقىندايتىن كەمەل كەزەڭ. ساتباەۆ مەكتەبىنەن ءتالىم الىپ, وندىرىستە شىڭدالىپ تاۋەلسىز ەلدىڭ ۇلتتىق قاۋىپسىزدىگىنە ولشەۋسىز ۇلەس قوسقان تۇلعالى ازامات, مەملەكەت جانە قوعام قايراتكەرى ءادىل شاياحمەت ۇلىنىڭ ءومىر جولى – بۇگىنگى جاس بۋىن ءۇشىن تاعىلىمعا تولى ۇلگى-ونەگە.
ۇلىقپان سىدىقوۆ,
قازاقستاننىڭ ەڭبەك سىڭىرگەن قايراتكەرى, فيلوسوفيا عىلىمدارىنىڭ دوكتورى
