يۋنەسكو-مەن بىرلەسكەن جوبا ىسكە قوسىلدى

يۋنەسكو-نىڭ اتالعان جوباسى جاساندى ينتەللەكتىنىڭ ۇلتتىق ەكوجۇيەسىنە جان-جاقتى تالداۋ جۇرگىزۋگە باعىتتالعان. باعالاۋ ەلىمىزدەگى جي دامۋىنىڭ نەگىزگى ولشەمدەرىن, ونىڭ ىشىندە قۇقىقتىق جانە نورماتيۆتىك-قۇقىقتىق بازانى, سونداي-اق الەۋمەتتىك جانە گۋمانيتارلىق, ەكونوميكالىق, عىلىمي-ءبىلىم جانە تەحنولوگيالىق اسپەكتىلەردى قامتيدى.

جوبا شەڭبەرىندە جاساندى ينتەللەكت سالاسىندا تەڭگەرىمدى ءارى ينكليۋزيۆتى ساياسات قالىپتاستىرۋدىڭ شەشۋشى شارتى رەتىندە ءتيىمدى سەكتورارالىق جانە ۆەدومستۆوارالىق ءوزارا ءىس-قيمىلدى قامتاماسىز ەتۋگە ەرەكشە باسىمدىق بەرىلىپ وتىر.

بۇگىندە يۋنەسكو-نىڭ ۇلتتىق دايىندىقتى باعالاۋ ءادىسناماسىن (Readiness Assessment Methodology, RAM) ىسكە اسىرۋ بويىنشا مۇددەلى تاراپتاردىڭ ۇلتتىق جۇمىس توبى (National Stakeholder Team) قۇرىلدى. ونىڭ قۇرامىنا ەلىمىزدىڭ جاساندى ينتەللەكت جانە تسيفرلىق دامۋ, عىلىم جانە جوعارى ءبىلىم, مادەنيەت جانە اقپارات, قارجى, ەڭبەك جانە حالىقتى الەۋمەتتىك قورعاۋ مينيسترلىكتەرى, ۇلتتىق عىلىم اكادەمياسى, «اتامەكەن» ۇكپ, Astana IT University, Ozim Academy, قازاقستانداعى جاساندى ينتەللەكتىنى دامىتۋ قاۋىمداستىعى, «Technowomen» ۇەۇ, يۋنەسكو-نىڭ وڭىرلىك بيۋروسى, قر يۋنەسكو جانە يسەسكو ىستەرى جونىندەگى ۇلتتىق كوميسسياسى, سونداي-اق جوبانى ىسكە اسىرۋعا تىكەلەي تارتىلاتىن ازاماتتىق قوعام ۇيىمدارىنىڭ وكىلدەرى كىردى.

زەرتتەۋ قورىتىندىلارى بويىنشا ەلىمىزدە ادامعا باعدارلانعان جاساندى ينتەللەكت ەكوجۇيەسىن قالىپتاستىرۋعا باعىتتالعان پراكتيكالىق ۇسىنىمدار ازىرلەنەدى.

يۋنەسكو-نىڭ وسى جوباسىن ىسكە اسىرۋ حالىقارالىق ىنتىماقتاستىققا جانە ادامنىڭ امبەباپ قۇندىلىقتارىن, قۇقىقتارى مەن بوستاندىقتارىن ساقتاۋعا نەگىزدەلگەن مەملەكەتىمىزدىڭ جاساندى ينتەللەكتىنى دامىتۋ جونىندەگى ستراتەگيالىق باعىتىن جۇزەگە اسىرۋداعى ماڭىزدى قادام سانالادى.