فوتو: primeminister.kz
جوبالىق كەڭسە سالىق كودەكسىنىڭ جانە كاسىپكەرلىكتى رەتتەۋشىنىڭ جاڭا نورمالارىن قولدانۋعا بايلانىستى بيزنەس وتىنىشتەرىن جۇيەلەۋ جانە جەدەل قاراۋ ءۇشىن بىرىڭعاي ۇيلەستىرۋ ورتالىعى رەتىندە قۇرىلادى. ونىڭ مىندەتى – مەملەكەتتىك ورگانداردىڭ كەلىسىلگەن ءىس-قيمىلىن قامتاماسىز ەتۋ جانە كاسىپكەرلىك قوعامداستىقپەن تۇراقتى كەرى بايلانىس ورناتۋ.
جوبالىق كەڭسەنىڭ ءبىرىنشى وتىرىسىنا «اتامەكەن» ۇكپ باسشىلىعى, كاسىپكەرلەردىڭ قۇقىقتارىن قورعاۋ جونىندەگى ۋاكىل قانات نۇروۆ, ورتالىق مەملەكەتتىك ورگانداردىڭ وكىلدەرى قاتىستى.
جوبالىق كەڭسە جۇمىسىنىڭ نەگىزگى لوگيكاسى – ء«بىر تەرەزە» ءپرينتسيپى. سالىق ورگاندارىنىڭ call-ورتالىعى, SalykBot Telegram-ارناسى, مەملەكەتتىك كىرىستەر كوميتەتىنىڭ بولىمشەلەرى, «اتامەكەن» ۇكپ, الەۋمەتتىك جەلىلەر مەن باسقا دا كوممۋنيكاتسيا ارنالارى ارقىلى تۇسەتىن بيزنەستىڭ بارلىق ءوتىنىشى ءبىر ورتالىقتا جيناقتالادى. وتىنىشتەرگە جاۋاپ بەرۋدىڭ ناقتى مەرزىمدەرى بەلگىلەنەدى. كۇردەلى جانە ۆەدومستۆوارالىق سيپاتتاعى ماسەلەلەر سالالىق مەملەكەتتىك ورگانداردىڭ قاتىسۋىمەن جوبالىق كەڭسەنىڭ وتىرىستارىنا شىعارىلادى.
جوبالىق كەڭسەنىڭ وتىرىسىن اپتا سايىن وتكىزۋ جوسپارلانىپ وتىر. ولار بيزنەستىڭ ەڭ وزەكتى جانە ءجيى كوتەرەتىن ماسەلەلەرىن قاراستىرىپ, شەشىمدەر ازىرلەنەدى, تۇسىنىكتەمەلەر بەرىلەدى. جوبالىق كەڭسە جۇمىسىنىڭ قورىتىندىسى مەملەكەتتىك ورگاندار مەن بۇقارالىق اقپارات قۇرالدارىنىڭ كوممۋنيكاتسيا ارنالارى ارقىلى جالپى جۇرتشىلىققا ۇنەمى جەتكىزىلەدى.
قارجى ۆيتسە-ءمينيسترى ەرجان ءبىرجانوۆتىڭ ايتۋىنشا, 1-20 قاڭتار ارالىعىندا سالىق جۇيەسىندە 22 مىڭ جاڭا سالىق تولەۋشى تىركەلگەن. ونىڭ 20 مىڭنان استامى جەكە كاسىپكەر, 2 مىڭعا جۋىعى زاڭدى تۇلعا. جاڭا ققس تولەۋشىلەردىڭ سانى – 7100.
ء«وزىن-ءوزى جۇمىسپەن قامتۋشىلار رەجيمىن 137 708 سالىق تولەۋشى تاڭدادى. ونىڭ 100 مىڭنان استامى بۇرىن سالىقتىق اكىمشىلەندىرۋ سالاسىندا بولماعان جەكە تۇلعا. جاڭا رەجيم جك تىركەۋسىز جانە كاسسالىق اپپاراتتى قولدانباي, سالىق تولەمەي, تابىستىڭ 4% مولشەرىندە الەۋمەتتىك تولەمدەر بويىنشا عانا مىندەتتەمەمەن جۇمىس ىستەۋگە مۇمكىندىك بەرەدى», دەدى ەرجان ءبىرجانوۆ.
يمپلەمەنتاتسيا كەزەڭى وبەكتيۆتى قيىندىقتارمەن بىرگە جۇرەتىنى اتاپ ءوتىلدى. قاڭتاردىڭ باسىندا سالىقتىق اكىمشىلەندىرۋدىڭ ينتەگراتسيالانعان جۇيەسىن ء(سايج) ىسكە قوسۋ كەزىندە تەحنيكالىق ماسەلەلەر تىركەلدى. بۇگىنگى تاڭدا بارلىق ادىستەمەلىك جانە تەحنيكالىق ماسەلەلەر رەتتەلدى. ءسايج ەلدەگى ەڭ ءىرى اقپاراتتىق جۇيە بولىپ سانالادى. ول ءبىر ۋاقىتتا 250 مىڭ سالىق تولەۋشىگە قىزمەت كورسەتەدى.
بۇگىنگى تاڭدا بيزنەستىڭ نەگىزگى وتىنىشتەرى قولدانبالى سيپاتقا يە جانە سالىق سالۋ رەجيمىن تاڭداۋعا, حابارلامالار بەرۋگە, دەرەكتەردى وڭدەۋدىڭ دۇرىستىعىنا, ەقجج تاڭداۋعا, ەلەكتروندىق شوت-فاكتۋرالاردى تولتىرۋعا جانە باسقا دا راسىمدىك ماسەلەلەرگە قاتىستى. سالىق تولەۋشىلەردى جەدەل قولداۋ ءۇشىن مكد جانىنداعى كونسۋلتاتسيا كەڭسەلەرى, call-ورتالىق جانە SalykBot Telegram-ارناسى تۇراقتى جۇمىس ىستەيدى.
5 قاڭتاردان باستاپ بارلىق وبلىس ورتالىعى مەن رەسپۋبليكالىق ماڭىزى بار قالالاردا اپتاسىنا ءۇش رەت «حالىق بۋحگالتەرى» اكتسياسى وتكىزىلىپ جاتىر. وعان جەتى سالالىق قاۋىمداستىقتىڭ اتىنان 100-دەن اسا بۋحگالتەر قاتىسۋدا. 3 مىڭنان استام ادام تەگىن كەڭەس الدى.
وتىرىس سوڭىندا سەرىك جۇمانعارين رەفورما كەزەڭىندە سالىق كودەكسىنىڭ نورمالارىن قالىپتاستىرۋعا جانە تالقىلاۋعا باسا نازار اۋدارىلعانىن, ال يمپلەمەنتاتسيا كەزەڭىندە ولاردى قولدانۋدىڭ ناقتى مەرزىمى, تۇسىنىكتى تەتىكتەرى مەن بولجامدىلىعى ءتۇيىندى مانگە يە بولاتىنىن اتاپ ءوتتى.
«جۇزەگە اسىرۋ بارىسىندا سۇراق ءسوزسىز تۋىندايتىنى بەلگىلى. ەگەر ولارعا تۇسىنىكسىز جاۋاپ بەرىلسە, ۆەدومستۆولاردا كۇردەلى ماسەلەلەر جينالىپ قالادى. جوبالىق كەڭسە بيزنەس ماسەلەلەرىن جەدەل جانە جۇيەلى تۇردە شەشۋ ءۇشىن قۇرىلادى», دەدى ول.
جوبالىق كەڭسەنىڭ قۇرامىنا قارجى مينيسترلىگىنىڭ, مەملەكەتتىك كىرىستەر كوميتەتىنىڭ, ۇلتتىق ەكونوميكا مينيسترلىگىنىڭ, «اتامەكەن» ۇكپ, تسيفرلىق دامۋ مينيسترلىگى مەن ادىلەت مينيسترلىگىنىڭ وكىلدەرى كىردى. جوبالىق كەڭسەنىڭ جۇمىسىنا سالالىق قاۋىمداستىقتار, جەكە سالىق كەڭەسشىلەرى مەن ساراپشىلار قاۋىمداستىعى دا ارالاسادى.
