تانىستىرىلىم بارىسىندا مۋزەي زالدارىنا ەكسكۋرسيا جۇرگىزىلدى. جاڭالانعان مۋزەي ەكسپوزيتسيالارىنا ارحيۆتىك دەرەكتەر, وبلىستىق مۋزەي قورىنداعى قۇجاتتار, فوتوسۋرەتتەر مەن تاريحي, مادەني, ارحەولوگيالىق ەكسپوناتتار قوسىلىپ, جالپى مۋزەي زالدارى 60 پايىز جاڭا ەكسپوناتتارمەن تولىقتى. جوندەۋ جۇمىستارى اياسىندا مۋزەي عيماراتىنىڭ قاسبەتى جاڭارتىلدى, اۋماعى اباتتاندىرىلدى. جاساندى ينتەللەكت تەحنولوگياسىنىڭ كومەگىمەن جاڭا ەكسپوزيتسيالىق زالدار زاماناۋي تالاپتارعا ساي قايتا جابدىقتالدى. مۋزەيدىڭ كونفەرەنتس-زالى دا زاماناۋي ۇلگىدە قايتا جابدىقتالدى.
«داۋىرلەر توعىسىنداعى ۇلىتاۋ» دەپ اتالاتىن ءبىرىنشى زالدا ۇلىتاۋ وبلىسى ءوڭىرىنىڭ تاريحي, تابيعي دامۋ كەزەڭدەرىنەن باستاپ ءتۇرلى مادەنيەتكە دەيىنگى ەكسپوزيتسيالاردى قامتيدى. پالەونتولوگيا بولىمىندە الىپ مۇيىزتۇمسىقتىڭ رەكونسترۋكتسياسى, جەراستى پەشتىڭ ميلتيمەديالىق ديوراماسى كورسەتىلگەن. ەكىنشى زال – « ۇلىتاۋ عاسىرلار شەجىرەسى». ول ۇلىتاۋدىڭ دالا وركەنيەتى مەن قازاق مەملەكەتىنىڭ تاريحي وزەگى بولعاندىعىن ايعاقتايتىن ەكسپوزيتسيادان قۇرالعان. تالماس اتا كەسەنەسىنەن تابىلعان ەر ادامنىڭ گيپەررەاليستىك ءمۇسىنى, «بۇلانتى شايقاسى» مۋلتيمەديالىق ديوراماسى قويىلعان. بۇل زالدا ساقتار كەزەڭىنەن حIX عاسىردىڭ ارحەولوگيالىق قۇندى جادىگەرلەرمەن تاريحي ساباقتاستىق كورسەتىلگەن. ءۇشىنشى زالعا XX عاسىرداعى قوعامدىق − ساياسي تاريح ارقاۋ بولعان. الاش زيالىلارى, ستەپلاگ, ەكىنشى دۇنيەجۇزىلىك سوعىس, اۋىلشارۋاشىلىقتىڭ دامۋى كورسەتىلگەن.
ءتورتىنشى «قازىنالى ولكە تاريحى» زالى. ولكە ءوندىرىسىنىڭ دامۋى, العاشقى گەولوگتار, ق.ساتباەۆتىڭ گولوگرامماسى, جەزقازعان قالاسىنىڭ تاريحى, عارىش ايلاعى, چەرنوبىل, اۋعان سوعىسى, تاجىك-اۋعان شەكاراسىنداعى ۇرىس قيمىلدارىنا قاتىسقان جاۋىنگەرلەردىڭ ەرلىك تاريحى, جەلتوقسان وقيعاسى, «20-شى وبلىستىڭ 20 ەلەۋلى وقيعاسى» كونتسەپتسياسى نەگىزىندە ۇلىتاۋ وبلىسىنىڭ جەتىستىكتەرى, حالىقارالىق فەستيۆالدەرى, رەكوردقا ەنگەن جەرگىلىكتى ازاماتتار تۋرالى فوتوسۋرەتتەر مەن ەكسپوناتتار ارقىلى بەرىلگەن. مەملەكەت باسشىسىنىڭ ۇلىتاۋ وبلىسىندا تۋريزم كلاستەرىن دامىتۋ ماقساتىندا وبلىس بويىنشا توعىز تۋريستىك مارشرۋت تۋروپەراتورلار كورسەتىلگەن تۋريستىك كارتامەن اياقتالادى.
«وبلىسىمىزداعى 48 جىل تاريحى بار مۋزەيدىڭ جاڭا زامانعا ساي جاڭارتىلۋى ۇلكەن قۋانىش. 27 جاسىمدا مۋزەيگە ەكسكۋرسيا جۇرگىزۋشى بولىپ كەلىپ, 20 جىلعا جۋىق تابان اۋدارماي عىلىمي قىزمەتكەردەن مۋزەي باسشىسىنا دەيىنگى قىزمەت اتقاردىم. سوندىقتان مۋزەيدىڭ ءاربىر قىزمەتكەرى مەن ەكسپوناتى مەن ءۇشىن ىستىق. بۇگىنگى جاڭعىرتىلعان مۋزەيدى ارالاۋ بارىسىندا ماعان مۋزەي زالدارىنىڭ كەڭەيىپ, جادىگەرلەر ساقتايتىن قور ساقتاۋ قويماسىنىڭ جاڭارتىلۋى, ەكسپوزيتسيا زالدارىنىڭ تاقىرىپتىق تۇجىرىمداماسىندا وبلىستىڭ تاريحى جان-جاقتى قامتىلۋى, مۋزەي قورىنداعى جادىگەرلەرگە جان ءبىتىرىپ, ۇتىمدى پايدالانۋى ۇنادى. بىلىكتى باسشى زاعيرا قالمەنوۆا باستاعان مۋزەيلىك ارىپتەستەرىمنىڭ اتقارعان وراسان زور ەڭبەگىنە العىس بىلدىرەمىن», دەيدى جەزقازعان قالالىق ءماسليحاتىنىڭ توراعاسى راۋشان قاپاروۆا.
ۇلىتاۋ وبلىسىنىڭ اكىمى داستان اداي ۇلى مۋزەي ۇجىمىنا كوشپەلى ءىس-شارالاردى وتكىزۋگە زور مۇمكىندىك بەرەتىن گازەل اۆتوكولىگىنىڭ كىلتىن سالتاناتتى تۇردە تابىس ەتتى.
ايتا كەتەيىك, بۇگىن ۇلتتىق قۇرىلتايدا پرەزيدەنت ەكى جىلدىڭ ىشىندە ەلىمىزدە 100-دەن استام مادەنيەت وشاعى جوندەلەتىنىن ايتتى.
