رەسپۋبليكالىق تاسجولداردا «كاجسەرۆيس» شقوف جشس قاردان ارشىپ الەك. ولاردىڭ 103 تەحنيكاسىنىڭ 96 پايىزى كەز كەلگەن ۋاقىتتا جولعا شىعۋعا دايىن. ال, وبلىستىق باعىتتاردا «وبلشىعىسجول» جشس-ءنىڭ 119 تەحنيكاسى تىنىمسىز قىزمەت اتقارىپ جاتىر. اۋداندىق جولدار مەن اۋىل كوشەلەرىندە 584 تەحنيكا تۇرعىنداردىڭ قاۋىپسىز قوزعالىسىن قامتاماسىز ەتكەن.
بوران كۇشەيىپ, جاعداي كۇردەلەنە قالسا, ىسكە قوسىلاتىن 185 بىرلىك قوسىمشا تەحنيكا, سونداي-اق اۋىر بۋلدوزەرلەر مەن اۆتوگرەيدەرلەردەن قۇرالعان جەدەل جاساق بار. جول ۇستىندە قالعان جۇرگىزۋشىلەر دە نازاردان تىس قالمايدى. كليماتتىق جاعدايى قيىن اۋماقتاردا جول پايدالانۋ پۋنكتتەرى مەن جىلىتۋ ورىندارى جۇمىس ىستەپ تۇر. مۇندا جولاۋشىلار جىلىنىپ, دەمالىپ, قاجەتتى كومەك الا الادى.
قىسقا دايىندىق الدىن الا باستالعان. جولدارعا كوكتايعاققا قارسى ماتەريالدار سەبىلىپ, 100 توننا تەحنيكالىق تۇز, مىڭداعان سيگنالدىق باعانالار مەن جول بەلگىلەرى ازىرلەندى. قار ءجيى باساتىن جانە كوشكىن قاۋپى بار ۋچاسكەلەردە ارنايى قالقاندار ورناتىلىپ, الدىن الۋ جۇمىستارى جۇرگىزىلدى.
«بيىل قاتتى قار مەن كورىنۋدىڭ تومەندەۋىنە بايلانىستى جولدار ۋاقىتشا جابىلعان ساتتەر دە بولدى. الايدا, بارلىق جاعداي باقىلاۋدا ۇستالىپ, ورتاشا جابىلۋ ۋاقىتى 10 ساعاتتان اسپادى, كوبىنە تۇنگى مەزگىلدە جاپتىق», دەدى جولاۋشىلار كولىگى جانە اۆتوموبيل جولدارى باسقارماسى باسشىسىنىڭ مىندەتىن اتقارۋشى ەرنار ماۋلەتحانوۆ.
ايتقانداي, 1 قاراشادان باستاپ وبلىس جولدارى تاۋلىك بويى باقىلاۋدا. جول قىزمەتتەرى, پوليتسيا جانە توتەنشە جاعدايلار ورگاندارى بىرلەسىپ, جولداعى احۋالدى باق پەن مەسسەندجەرلەر ارقىلى حالىققا جەدەل جەتكىزىپ وتىر.
استاناعا قالىڭ قار ءتۇستى: تازالاۋ جۇمىستارىنا 3 مىڭ ادام جۇمىلدىرىلدى
