پرەزيدەنتتىڭ ايتۋىنشا, تەكسەرىس بارىسىندا قور قىزمەتىنەن مەملەكەت قاراجاتىن وراسان زور كولەمدە جىمقىرۋ ماقساتىندا جاسالعان قۇجاتتاردى قولدان جاساۋ جانە وتىرىك مالىمەت قوسۋ سياقتى فاكتىلەر انىقتالعان. مەملەكەت باسشىسى بۇكىل ەل ەكونوميكالىق ءوسىم مەن ينفراقۇرىلىمدىق جوبالاردى دامىتۋعا كۇش سالىپ جاتقاندا, الەۋمەتتىك سالاعا بولىنگەن قارجىنىڭ تالان-تاراجعا تۇسۋىنە جول بەرىلمەيتىنىن قاداپ ايتتى.
«مىندەتتى مەديتسينالىق ساقتاندىرۋ قورىن قارجى مينيسترلىگىنىڭ قاراماعىنا بەرۋ تۋرالى ۇكىمەتتىڭ شەشىمىن قولدايمىن», دەدى قاسىم-جومارت توقاەۆ.
مەملەكەت باسشىسى 2024–2025 جىلدارى دەنساۋلىق ساقتاۋ سالاسىن دامىتۋعا مەملەكەت تاراپىنان 7,8 ترلن تەڭگە بولىنگەنىن ەسكە سالدى. بۇل شىعىندار ەڭ الدىمەن ازاماتتاردىڭ ءومىر ءسۇرۋ ساپاسىن جاقسارتۋعا جانە «ادىلەتتى قازاقستان» قۇرۋ ستراتەگياسىنا نەگىزدەلگەن. وسىعان بايلانىستى پرەزيدەنت قۇقىق قورعاۋ ورگاندارىنا جەمقورلىق سحەمالارىنان پايدا كورگەن بارلىق تۇلعالاردى انىقتاۋدى تاپسىردى.
قاسىم-جومارت توقاەۆ قوردا انىقتالعان كەمشىلىكتەردى الەۋمەتتىك سالا باسشىلارىنىڭ كاسىبيلىگىنىڭ تومەندىگىنەن جانە ولاردىڭ مەملەكەت مۇددەسىنە دەگەن بەيجايلىعىنان دەپ باعالادى. ەندى بۇل سالاداعى قارجىنىڭ جۇمسالۋى قارجى مينيسترلىگىنىڭ تىكەلەي باقىلاۋىندا بولادى.
ەسكە سالايىق, مەملەكەت باسشىسى جاڭا پارلامەنتتىڭ اتاۋىن «قۇرىلتاي» دەپ اتاۋدى ۇسىندى.
