- ارالاس جەكپە-جەكتەن بانگكوكتە وتكەن ONE FC تۋرنيرىندەگى تۇساۋكەسەر كەزدەسۋىندە 80 كگ سالماقتاعى دياس وتەگەن (2-0) رەسەيلىك احمەد رابادانوۆتى (3-0) تورەشىلەر شەشىمىمەن ۇتتى. كراسنوداردا ۇيىمداستىرىلعان اسا جارىسىندا باعدوس ولجاباي (21-17) 16 Eagle FC ليگاسىنىڭ ەكس-چەمپيونى, ارمەنيالىق جورا ايۆازياننان (17-1) ايلاسىن اسىرا المادى.
- قاتاردىڭ استاناسىندا شىمىلدىعى تۇرىلگەن WTT Star Contender Doha دوداسىندا ەلىمىزدىڭ ۇستەل تەننيسشىلەرى سۇرەڭسىز ونەر كورسەتتى. ەسكەندىر حاركي ىرىكتەۋ سىنىندا ساۋد ارابياسىنىڭ وكىلى ءالي الحادراۆيگە (2:3) ەسە جىبەرسە, قاتارلىق ماريام ءالىنىڭ تاس-تالقانىن شىعارعان سارۆينوز مىرقادىروۆا (3:0) ەكىنشى كەزەڭدە تايپەيلىك حۋان يۋ-تسزەگە (0:3) جول بەردى. سونداي-اق ولار جۇپتىق, ارالاس جۇپتار سايىستارىندا دا العاشقى اينالىمنان اسا المادى.
- ەلىمىزدىڭ ارداگەر تەننيسشىسى ميحايل كۋكۋشكين شوتلانديانىڭ گلازگوسىنداعى «چەللەندجەر» تۋرنيردە ءتاۋىر ناتيجەگە قول جەتكىزدى. باستاپقى باسەكەلەردە كولۋمبيالىق ادريا سوريانو باررەرا, شۆەيتساريالىق رەمي بەرتولا, گەرمانيالىق توم گەنچتى جولىنان ىعىستىرعان ول جارتىلاي فينالدا چەحيالىق گينەك بارتوننان باسىم ءتۇستى. فينالدا كۋكۋشكين فرانتسيالىق كلەمان شيدەگە جول بەردى.
- «Golden Boy» پروموۋتەرلىك كومپانياسىنىڭ ۇيىمداستىرۋىمەن اقش-تىڭ كاليفورنيا شتاتىندا وتكەن كاسىپقوي بوكس كەشىندە وزبەكستاننىڭ تۋى استىندا ونەر كورسەتەتىن 23 جاستاعى قانداسىمىز رۋسلان ابدۋللاەۆ ۋرۋگۆايلىق ەدۋاردو حاۆەر ابرەۋدى بەسىنشى راۋندتا اۋىر سوققىلاردىڭ استىنا الىپ, ايقىن باسىمدىقپەن جەڭدى. بۇل – رۋسلاننىڭ كاسىپقوي رينگتەگى ءتورىنشى جەڭىسى. اۋەسقويلار اراسىندا قازاق جىگىتىنىڭ الەم, ازيا چەمپيونى دەگەن اتاقتارى بار.
- تۇركيانىڭ ىستانبۇل قالاسىندا شايبالى حوككەيدەن جاسوسپىرىمدەر اراسىنداعى IIA ديۆيزيونىنداعى الەم بىرىنشىلىگى باستالدى. ەلىمىزدىڭ قۇراماسى تۇركيا, وڭتۇستىك كورەيا, نيدەرلاند, لاتۆيا, جاڭا زەلانديامەن ءبىر توپتا ونەر كورسەتەدى.
- 6–7 اقپان ارالىعىندا استانادا دەۆيس كۋبوگىنىڭ الەمدىك توبىنىڭ پلەي-وففىندا ەلىمىزدىڭ قۇراماسى موناكوعا قارسى وينايدى. وسى اسا جاۋاپتى جارىستا ەل نامىسىن الەكساندر بۋبليك, الەكساندر شەۆچەنكو, تيموفەي سكاتوۆ, بەيبىت جۇقاەۆ, دەنيس ەۆسەەۆ, ءامىر ومارحانوۆ سىندى تەننيسشىلەر قورعايدى.
