ەكى كۇنگە سوزىلعان جيىنعا ەلىمىزدەگى جوعارى وقۋ ورىندارىنىڭ رەكتورلارى مەن پرورەكتورلارى, مەملەكەتتىك ورگانداردىڭ وكىلدەرى قاتىستى.
فورۋمنىڭ العاشقى كۇنى «QAA», «ASIIN» جانە «IAAR» حالىقارالىق اككرەديتتەۋ اگەنتتىك ساراپشىلارىنىڭ قاتىسۋىمەن شەبەرلىك ساعاتتارى ۇيىمداستىرىلدى. وندا قاتىسۋشىلار ۋنيۆەرسيتەتتەردى حالىقارالىق اككرەديتتەۋگە دايىنداۋ, cاپا مادەنيەتىن قالىپتاستىرۋ جانە ءبىلىم قىزمەتىنىڭ ەكسپورتىن دامىتۋ ماسەلەلەرىن تالقىلادى.
ال ەكىنشى كۇنى – دوكتورانتتاردىڭ زەرتتەۋ قىزمەتى ناتيجەسىنىڭ ساپاسىن باعالاۋدىڭ جاڭا ءتاسىلى مەن جوعارى جانە جوعارى وقۋ ورنىنان كەيىنگى ءبىلىم بەرۋ ۇيىمدارىندا ساپانى قامتاماسىز ەتۋدىڭ ىشكى جۇيەلەرىن دامىتۋ ءسوز بولدى. سونىمەن قاتار قاتىسۋشىلار تاقىرىپتىق سەسسيالارعا ءبولىنىپ, جوعارى جانە جوعارى وقۋ ورنىنان كەيىنگى ءبىلىم سالاسىن رەتتەۋ جانە رۇقسات بەرۋ ساياساتىن ساراپتادى.
فورۋمنىڭ باستى وقيعاسى – جوعارى ءبىلىم مەن عىلىمنىڭ ساپاسىن قامتاماسىز ەتۋ جۇيەسىنىڭ قازىرگى جاعدايى مەن دامۋ كەلەشەگىنە, سونداي-اق زاماناۋي تەحنولوگيالىق جانە نورماتيۆتىك وزگەرىستەردىڭ جوعارى جانە جوعارى وقۋ ورنىنان كەيىنگى ءبىلىم سالاسىنا ارنالعان پلەنارلىق وتىرىس بولدى. بۇعان عىلىم جانە جوعارى ءبىلىم ءمينيسترى ساياسات نۇربەك قاتىسىپ, وتاندىق جوعارى ءبىلىمنىڭ ساپاسى مەن دامۋى جايىندا سالماقتى ءسوز ءوربىتتى.
جيىن بارىسىندا جوعارى بىلىمدەگى ساپانى قامتاماسىز ەتۋ بويىنشا الەمدەگى جەتەكشى ورگاننىڭ ءبىرى – «Quality Assurance Agency for Higher Education» اگەنتتىگىنىڭ (QAA) وكىلى Nazarbayev University-ءدىڭ جوعارى ءبىلىم مەكتەبىنە QAA-ءدىڭ حالىقارالىق باعدارلاماسىن اككرەديتتەۋ سەرتيفيكاتىن تابىس ەتتى. بۇل جوعارى ءبىلىم مەكتەبىنىڭ ءۇش اكادەميالىق باعدارلامانىڭ ءساتتى ءوتۋى ناتيجەسىندە بەرىلدى. دالىرەك ايتقاندا, ءبىرىنشى – كوپتىلدى ءبىلىم بويىنشا ماگيسترلىك باعدارلاما (MA), ەكىنشى – بىلىمدەگى كوشباسشىلىعى بويىنشا ماگيسترلىك باعدارلاما (MSc), ءۇشىنشىسى ءبىلىم سالاسى بويىنشا PhD حالىقارالىق تالاپتارعا ساي دەپ تانىلدى.
وسى رەتتە NU پرەزيدەنتى, پروفەسسور ۆاكار احماد اتالعان جوعارى وقۋ ورنى ءبىلىم ساپاسىن قامتاماسىز ەتۋ مادەنيەتىن دامىتۋدا قوزعاۋشى كۇش رەتىندەگى ءرولىن بەرىك ۇستاناتىنىن جەتكىزدى.
«اكادەميالىق ادالدىق پەن اكادەميالىق ەركىندىك ۋنيۆەرسيتەت ماقساتىنىڭ نەگىزى وزەگى بولىپ قالادى. سونداي-اق جاساندى ينتەللەكت پەن تسيفرلىق تەحنولوگيانىڭ ماڭىزى الداعى ۋاقىتتا ارتا تۇسەدى. ال عىلىمي زەرتتەۋلەر وقۋ ۇدەرىسىمەن بۇرىنعىدان دا تىعىز ىقپالداسادى. «Times Higher Education» (THE) 2025 جاھاندىق رەيتينگىندە ء«بىلىم» باعىتى بويىنشا الەمنىڭ ۇزدىك 200 جوعارى وقۋ ورنى قاتارىنا ەنگەن NU جوعارى ءبىلىم مەكتەبى ەلىمىزدەگى ۋنيۆەرسيتەتتەرمەن بىرلەسىپ, ءبىلىم مەن عىلىمي زەرتتەۋلەردىڭ ساپا ستاندارتىن كوتەرۋ باعىتىندا جۇمىس ىستەپ كەلەدى», دەدى ول.
جيىن قورىتىندىسىندا قاتىسۋشىلار ساپانى قامتاماسىز ەتۋ تەتىگىن ودان ءارى دامىتىپ, حالىقارالىق ىنتىماقتاستىقتى كەڭەيتىپ, جوعارى جانە جوعارى وقۋ ورنىنان كەيىنگى ءبىلىمنىڭ ۇلتتىق جۇيەسىنە ۇزدىك شەتەلدىك تاجىريبەلەردى ەنگىزۋ قاجەتتىگىن ايتتى.
