سۋرەت: kaz.inform.kz
مەملەكەتتىك كەڭەسشى ەرلان قارين Telegram ارناسىنداعى جازباسىندا ۇلتتىق قۇرىلتاي وسى ۋاقىت ىشىندە ەل قوعامىن ورتاق ماقساتقا جۇمىلدىرۋعا ارنالعان بىرەگەي يدەيالار مەن ستراتەگيالىق قادامدار ۇسىناتىن ەڭ باستى ينستيتۋتقا اينالعانىن اتاپ ءوتتى. ونىڭ ايتۋىنشا, قۇرىلتاي مۇشەلەرى وسى قۇرىلىمنىڭ بۇعان دەيىنگى ءتورت وتىرىسى مەن جۇمىس كەزدەسۋلەرىندە كوپتەگەن باستاما كوتەرىپ, ونىڭ باسىم بولىگى ورىندالدى.
تۇركىستانداعى ەكىنشى وتىرىستىڭ ناتيجەلەرى اناعۇرلىم اۋقىمدىراق بولدى. ۇلتتىق قۇرىلتاي ەلىمىزدىڭ قوعامدىق-ساياسي ومىرىنە تىكەلەي سەپتىگىن تيگىزەتىن 11 زاڭنىڭ قابىلدانۋىنا جول اشتى. اسىرەسە «قازاقستاننىڭ حالىق جازۋشىسى» اتاعىن قايتارۋ تۋرالى», «ونوماستيكا جۇمىسىن جۇيەلەۋ تۋرالى», «ۆەيپتەرگە, شەگۋگە كەلمەيتىن تەمەكى ونىمدەرىنە تىيىم سالۋ تۋرالى تۇزەتۋلەر»; «قۇمار ويىن بيزنەسى, لوتەرەيالار جانە لوتەرەيا قىزمەتى ماسەلەلەرى تۋرالى», «مەملەكەتتىك ناگرادالارعا ۇقساس قوعامدىق ناگرادالاردى دايىنداۋعا جانە ماراپاتتاۋعا تىيىم سالۋ تۋرالى» زاڭدار كوپتىڭ ويىندا جۇرگەن كوكەيكەستى ماسەلەلەرگە نۇكتەسىن قويدى.
بۇل رەتتە ايرانداي ۇيىپ وتىرعان تالاي وتباسىعا تاجالداي تيگەن قۇمار ويىنداردىڭ ناعىز ۇلتتىق قاسىرەتكە اينالىپ بارا جاتقانى بەلگىلى. ۇلتتىق قۇرىلتايدىڭ ءۇشىنشى وتىرىسىندا پرەزيدەنت قاسىم-جومارت توقاەۆ 400 مىڭعا تارتا ازاماتتىڭ بۋكمەكەرلىك كەڭسەلەر مەن كازينولاردىڭ تۇراقتى كليەنتى بولعانىن, بۇل تۇتاس ءبىر قالا حالقىنىڭ سانىنا تەڭ تسيفر ەكەنىن ايتتى.
«شىن مانىندە, لۋدومانيا – بەيبىت كۇندە ەلدىڭ شىرقىن بۇزىپ جاتقان قاتەر. سونىڭ كەسىرىنەن تالاي شاڭىراق شايقالدى. تالاي ازامات زاڭ بۇزىپ, قىلمىسقا ۇرىندى. قۇمار ويىن ءۇشىن قارىزعا باتىپ, وزىنە قول جۇمساعان جاندار تۋرالى حابارلار, وكىنىشكە قاراي, كۇن سايىن تاراپ جاتادى. بۇل دەرت جاس ۇرپاققا وتە ۇلكەن زيان كەلتىرەدى», دەگەن پرەزيدەنت ءسوزىن رەسمي رەيتينگ مالىمەتتەرى دە راستايدى.
لۋدومانيانىڭ كەسىرىنەن قوعامعا تاۋقىمەت تارتقىزعان تاعى ءبىر كەسەل – ءسۋيتسيدتىڭ دە ستاتيستيكاسى وسە باستاعان-دى. ەلىمىز وسى ءبىر دەرتتىڭ جاھاندىق ءتىزىمىنىڭ كوش باسىنداعىلاردى وكشەلەپ كەلەدى. الەمدىك رەيتينگ جاريالاناتىن StatRanker.org سايتىنىڭ بيىلعى 11 قاڭتارداعى مالىمەتىنە سۇيەنسەك, ەلىمىز بۇل تىزىمدە 19-ورىندا تۇر.
وسىلايشا, ادىلەتتى قازاقستان قاعيداتتارى مەن قۇندىلىقتارىن ورنىقتىرۋعا باعىتتالعان پرەزيدەنت باستامالارىن ناقتى جۇزەگە اسىرۋدىڭ «زاڭ جانە ءتارتىپ» قاعيداسى اياسىندا زاڭسىز ويىن بيزنەسى مەن لۋدومانياعا قارسى ءىس-قيمىل جونىندەگى 2024–2026 جىلدارعا ارنالعان كەشەندى جوسپار ىسكە اسىرىلىپ, وسى باعىتتاعى زاڭنامانىڭ كۇشەيتىلۋىنىڭ ارقاسىندا كوپتەگەن شەكتەۋ شارالارى ەنگىزىلدى. قۇمار ويىندارعا قۇنىققانداردىڭ قاتارى سيرەدى. اسىرەسە اسكەريلەردى وسى جاققا تارتىپ تۇراتىن بارلىق جول جابىلدى. بۇل ۇلكەن ستراتەگيالىق شەشىم بولدى.
