ۋكراينالىق دەپۋتات قازاقستاندىق ارداگەرگە العىس ءبىلدىردى

استانا. 13 مامىر. ۋكراينانىڭ حالىق دەپۋتاتى ۆالەنتين ديدىچ الماتى وبلىسىنىڭ ارداگەرى, كەڭەس وداعىنىڭ باتىرى يۆان ۆاسيلەۆيچ كوسەنكوۆقا دنەپردەن ءوتۋ كەزىندە ەرلىك كورسەتكەنى ءۇشىن العىسىن ءبىلدىردى. بۇل تۋرالى «قازاقپارات» حابارلادى. «قازاقستان رەسپۋبليكاسىنداعى ۋكراينا ەلشىلىگىنە ۋكراينانىڭ حالىق دەپۋتاتى ۆ.ۆ.ديدىچتەن جانە دنەپروپەتروۆسك وبلىسىنىڭ سولونيانسك اۋداندىق مەملەكەتتىك اكىمشىلىگى توراعاسىنىڭ مىندەتىن اتقارۋشى ت.م.چەركاسسكيدەن حات كەلىپ ءتۇستى. وندا الماتى وبلىسىنىڭ تۇرعىنى, كەڭەس وداعىنىڭ باتىرى يۆان ۆاسيلەۆيچ كوسەنكوۆتى جەڭىستىڭ 70 جىلدىعىمەن قۇتتىقتاعان. باتىردىڭ 1943 جىلى دنەپردەن ءوتۋ جانە اتالعان اۋداننىڭ ۆويسكوۆوە اۋىلىنىڭ ماڭىندا پلاتسدارمدى ۇستاپ تۇرۋ كەزىندە ەرلىك تانىتقانى اتالىپ ءوتىلدى», – دەپ مالىمدەدى قازاقستانداعى ۋكراينا ەلشىلىگىنىڭ ءبىرىنشى حاتشىسى لەونيد ياسينسكي. يۆان كوسەنكوۆ 1941 جىلى جەلتوقساندا قىزىل اسكەر قاتارىنا شاقىرتىلدى. 1943 جىلى 25 قىركۇيەكتەن 26 قىركۇيەككە قاراعان ءتۇنى ول ءوزىنىڭ جاۋىنگەرلەرىمەن ۋكراينانىڭ دنەپروپەتروۆسك وبلىسىنىڭ سولونيانسك اۋدانىنا قارايتىن ۆويسكوۆوە سەلوسى ماڭىندا دنەپر وزەنىنىڭ باتىس جاعاسىنداعى پلاتسدارمعا باسىپ كىرىپ, ونى باقىلاۋعا الادى. ودان سوڭ ۆويسكوۆوە سەلوسىنىڭ وڭتۇستىك شەتىنەن بۇزىپ كىرگەن قۇرام ەكى مارتە نەمىستىڭ شابۋىلىن تويتارىپ, ەكى ارتيللەريالىق قارۋىن, ەكى اۆتوكولىگىن جويىپ, جاۋ اسكەرىنىڭ ءبىر توپ سولداتى مەن وفيتسەرىن جەر جاستاندىردى. سەرجانت يۆان كوسەنكوۆقا وسى جانقيارلىعى ءۇشىن كسرو جوعارعى كەڭەسى پرەزيديۋمىنىڭ 1944 جىلعى 22 اقپانداعى جارلىعىمەن «كەڭەس وداعىنىڭ باتىرى» دەگەن جوعارى اتاق پەن لەنين وردەنى جانە «التىن جۇلدىز» مەدالى تابىستالدى. ەستەرىڭىزگە سالا كەتەيىك, «نۇر وتان» پارتياسىنىڭ جەڭىستىڭ 70 جىلدىعىنا بايلانىستى جۇرگىزگەن جۇمىستارىنىڭ ناتيجەسىندە ۇلى وتان سوعىسىندا قازاقستاننان 580 كەڭەس وداعىنىڭ باتىرى شىققانى بەلگىلى بولدى. سولاردان بۇگىندە كوزى ءتىرى وسى يۆان ۆاسيلەۆيچ كوسەنكوۆ قانا قالدى. ايدار ورىسباەۆ. دەرەك: «قازاقپارات». سۋرەت: time.kz.