فوتو: استانا اكىمدىگى
ەسىل اۋدانىنداعى ءبىلىم ورداسى 2024 جىلى اشىلعان. مۇنداعى 847 وقۋشىعا 63 پەداگوگ ءبىلىم بەرەدى. مەكتەپ تولىقتاي تسيفرلىق جۇيەگە كوشكەن.
«قىركۇيەك ايىنان باستاپ ءبىز جي نەگىزىندەگى مەكتەپ مودەلىن جۇزەگە اسىرۋدى باستادىق. جوبا شەڭبەرىندە بەينەكامەرالارىنا جي مۇمكىندىكتەرى ەنگىزىلدى. ول ءۇشىن ءبىز «Protector AI» كومپانياسىمەن كەلىسىمشارت جاساستىق. ناتيجەسىندە ولار بىزگە جاڭا قۇرىلعىلاردى ەكسپەريمەنت رەتىندە ورناتتى», دەدى مەكتەپ ديرەكتورى ايگۇل بەيسەنبينا.
ەلوردا اكىمدىگىنىڭ رەسمي سايتىنىڭ مالىمەتىنشە, مەكتەپتە بالالاردىڭ ءتارتىبى مەن قاۋىپسىزدىگىن جي جۇيەسى ورناتىلعان بەينەباقىلاۋ كامەرالارى ءجىتى نازاردا ۇستايدى.
«بۇل مەكتەپ قابىرعاسىندا وقۋشىلاردىڭ اگرەسسيۆتى ارەكەتتەرىن بىردەن بايقايدى. ماسەلەن ەگەر بالاعا وزگە قاتارلاسى كۇش كورسەتسە, بولماسا ول مەكتەپتە ەرەجە بۇزسا, جي كامەرالارى بىردەن جازبانى مەكتەپ ديرەكتورىنا, ياعني ماعان جولدايدى. كەيىن ءبىز وقيعاعا قاتىستى بالالاردىڭ اتا-انالارىن مەكتەپكە شاقىرتىپ, ءتۇسىندىرۋ جۇرگىزەمىز», دەدى مەكتەپ باسشىسى.
سونداي-اق, بۇل كامەرالار وقۋشىنىڭ كوڭىل-كۇيىن انىقتاپ وتىرادى.
«ەگەر وقۋشى 5 رەتتەن ارتىق اشۋلى بولىپ جۇرسە, وندا پەداگوگ قوسىمشا جۇمىستار جۇرگىزەدى. ماسەلەن وقۋشىعا ترەنينگتەر وتكىزەدى. بۇل جۇيە كومەكشى قۇرال رەتىندە قىركۇيەك ايىندا ىسكە قوسىلدى. مۇنداعى ماقسات – كەز كەلگەن وقيعانىڭ سالدارىمەن كۇرەسۋ ەمەس, كەرىسىنشە ولاردىڭ الدىن الۋ. مەكتەپتە جىل سايىن بالا سانى ارتىپ جاتىر. وقۋ ورداسى اشىلعان ۋاقىتتا 242 وقۋشى بولسا, قازىر ولاردىڭ سانى 847-گە جەتتى. الداعى ۋاقىتتا 1 200-گە دەيىن ارتادى دەگەن جوسپار بار. البەتتە, مەكتەپتە بارلىق جەردە بەينەباقىلاۋ كامەراسى ورناتىلعان. الايدا ولاردىڭ بارلىعىن قاراپ وتىرۋ مۇمكىن ەمەس. ال جي نەگىزىندەگى بەينەباقىلاۋ كامەرالارى بىردەن وقيعا تۋرالى ەسكەرتىپ وتىرادى», دەدى ديرەكتور.
ا.بەيسەنبينانىڭ ايتۋىنشا, جاساندى ينتەللەكت ءبىلىم ساپاسىن ارتتىرۋدا دا كوپ سەپتىگىن تيگىزىپ وتىر.
«جاساندى ينتەللەكت نەگىزىندەگى مەكتەپ مودەلىنىڭ ماقساتى – وقۋشىلاردىڭ قاۋىپسىزدىگىن عانا قامتاماسىز ەتۋ عانا ەمەس, ءبىلىم بەرۋ ساپاسىن ارتتىرۋ. سول باعىتتا پەداگوگتەر بىلتىر مامىر-قىركۇيەك ايلارىندا جي مۇمكىندىكتەرىن مەڭگەرۋ كۋرستارىنان ءوتتى. ناتيجەسىندە مۇعالىمدەر ساباقتارىن قىزىقتى ءارى ءتيىمدى, پايدالى وتكىزۋ ءۇشىن جاساندى ينتەللەكت مۇمكىندىكتەرىن قولدانىپ ءجۇر. ءتىپتى بۇگىندە ءار پەداگوگتىڭ جەكە جيناقتارى بار. وندا ءپان ساباقتارى بويىنشا ۆيرتۋالدى زەرتحانالار, تاپسىرمالار, تەستتەر ەنگىزىلگەن. ساباق بارىسىندا وقۋشى تەوريالىق ءبىلىمدى پراكتيكامەن ۇشتاستىرادى. جاڭا تاقىرىپتاردى سوڭىندا تەست تاپسىرمالارىمەن بەكىتەدى. تەست تاپسىرمالارىن دا ۇستازدار جي ارقىلى جاسايدى. كەيىن ونى وقۋشىلار ونلاين ورىندايدى. وسىلايشا مۇعالىم تەست قۇراستىرۋ, ونى تەكسەرۋ بويىنشا ءبىراز ۋاقىتىن ۇنەمدەيدى, كەيىن جي بالانىڭ ءپان بويىنشا ءبىلىمىن ارتتىرۋ تۋرالى مۇعالىمگە باعىت-باعدار بەرەدى.
تاعى ءبىر ايتا كەتەرلىگى, ۇستازدار قاۋىمى وسىنداي ءتۇرلى كونكۋرسقا قاتىسىپ, جۇلدەلى ورىندار يەلەنىپ جاتىر. باستىسى ولار بۇل باعىتتا زەرتتەۋشىلىك جۇمىستارىمەن اينالىسادى», دەدى ايگۇل بازاربايقىزى.
تاعى ءبىر ايتا كەتەرلىگى, مەكتەپتىڭ ءبىرىنشى قاباتىنداعى كىرەبەرىسىندە ۇلكەن LED-ەكران ورنالاسقان. مۇندا جي-گيدى كەلۋشىلەرگە ءبىلىم ورداسى تۋرالى بارلىق اقپاراتتى ايتىپ بەرەدى.
