ورتالىق COVID-19 پاندەمياسى كەزىندە تۋىنداعان سىن-قاتەرلەردى ەسكەرە وتىرىپ سالىندى. ونىڭ باستى ماقساتى – دەنساۋلىق ساقتاۋ جۇيەسىنىڭ توتەنشە جاعدايلارعا دايىندىق دەڭگەيىن ارتتىرۋ, عىلىمي الەۋەتتى دامىتۋ, زاماناۋي تسيفرلىق شەشىمدەردى ەنگىزۋ جانە بىلىكتى كادرلار دايارلاۋ. 350 توسەكتىك ورىنعا ەسەپتەلگەن جاڭا مەديتسينالىق مەكەمە جىل سايىن ەلىمىزدىڭ تۇكپىر-تۇكپىرىنەن تۋبەركۋلەزگە شالدىققان 2,5 مىڭ ناۋقاسقا ەمدەۋ-دياگنوستيكالىق قىزمەت كورسەتۋگە مۇمكىندىك بەرەدى.
«بۇل ورتالىق پرەزيدەنت تاپسىرماسىمەن ۇلت دەنساۋلىعىن نىعايتۋ جانە بيولوگيالىق قاۋىپسىزدىكتى قامتاماسىز ەتۋ ماقساتىندا بوي كوتەردى. بۇگىندە مۇندا عىلىمي زەرتتەۋلەر, وزىق تەحنولوگيا, بولاشاق مامانداردى تاربيەلەۋ باعىتتارى ءوزارا ساباقتاسىپ, ءبىرتۇتاس جۇيەگە اينالىپ وتىر. ينفەكتسيالىق اۋرۋلاردىڭ ۇلتتىق عىلىمي ورتالىعى وسكەلەڭ ۇرپاقتىڭ دەنساۋلىعىن ساقتاۋعا, ۇلتتىق قاۋىپسىزدىكتى نىعايتۋعا, وتاندىق مەديتسينالىق عىلىمدى دامىتۋعا زور ۇلەس قوسادى دەپ سەنەمىن», دەدى ايدا بالاەۆا.
پرەمەر-ءمينيستردىڭ ورىنباسارى مەملەكەت باسشىسىنىڭ تاپسىرماسىنا سايكەس ەلىمىزدە دەنساۋلىق ساقتاۋ نىساندارىمەن قاتار الەۋمەتتىك ينفراقۇرىلىم دا قارقىندى دامىپ جاتقانىن اتاپ ءوتتى.
«كەيىنگى ەكى جىلدا ەلىمىزدە 695 جاڭا مەديتسينالىق نىسان, 614 مىڭ ورىنعا ارنالعان 419 جاڭا مەكتەپ سالىندى. بۇل 19 اپاتتى مەكتەپتى جويۋعا, 58 مەكتەپتەگى ءۇش اۋىسىمدى وقىتۋ ماسەلەسىن شەشۋگە, 190 مەكتەپتەگى وقۋشى ورىندارىنىڭ تاپشىلىعىن ازايتۋعا مۇمكىندىك بەردى. سونىمەن قاتار 237 سپورت نىسانى پايدالانۋعا بەرىلدى, ونىڭ ىشىندە 69-ى قالالاردا, 168-ءى اۋىلدىق جەرلەردە ورنالاسقان. 2025 جىلى 61 مادەنيەت نىسانىنىڭ قۇرىلىسى اياقتالدى. وڭىرلەردە 251 نىساندا جوندەۋ جۇمىسى جۇرگىزىلىپ جاتىر. بۇل وزگەرىستەر, ەڭ الدىمەن, حالىقتىڭ ءومىر ساپاسىن ارتتىرۋعا, الەۋمەتتىك قورعاۋدى نىعايتۋعا باعىتتالعان», دەپ اتاپ ءوتتى ا.بالاەۆا.
ءىس-شارا بارىسىندا جينالعاندار ورتالىق بولىمشەلەرىن ارالاپ كورىپ, مەكەمەنىڭ ينفراقۇرىلىمىمەن, جابدىقتالۋىمەن تانىستى. سونىمەن قاتار مەكەمە ۇجىمىمەن دە كەزدەسۋ ءوتتى.
ايتا كەتەيىك, ينفەكتسيالىق اۋرۋلاردىڭ ۇلتتىق عىلىمي ورتالىعى قىسقا مەرزىمدە سالىنعان. مۇندا كلينيكالىق كومەك كورسەتۋ, عىلىمي جۇمىس جۇرگىزۋ, ءبىلىم بەرۋ, تسيفرلىق تەحنولوگيالاردى پايدالانۋ سەكىلدى مۇمكىندىكتەر بار. ورتالىق بالالار مەن جۇكتى ايەلدەرگە دە مەديتسينالىق كومەك كورسەتەدى. توتەنشە جاعدايلار كەزىندە جەدەل تۇردە 500 توسەكتىك ورىنعا دەيىن كەڭەيتىلۋى مۇمكىن.
ياۇعو – دياگنوستيكا مەن ەمدەۋدى عانا ەمەس, ينفەكتسيالىق جانە پارازيتتىك اۋرۋلار, سونىڭ ىشىندە دارىگە ءتوزىمدى تۋبەركۋلەز تۇرلەرى بويىنشا كۇردەلى زەرتحانالىق زەرتتەۋلەر جۇرگىزۋگە قابىلەتتى تولىققاندى مەديتسينالىق مەكەمە. ورتالىق ۇلتتىق دەڭگەيدەگى ينفەكتسيالىق قاۋىپ-قاتەرلەرگە جۇيەلى تۇردە جاۋاپ بەرەتىن, سونداي-اق عىلىمي جاڭالىقتاردى دامىتىپ, ينفەكتسيالىق اۋرۋلار سالاسىندا مامانداردى كاسىبي دايارلايتىن جەتەكشى بازاعا اينالۋدى كوزدەيدى.
الماتى
