سىيلىققا ءوتىنىمدى قالاي ۇسىنۋعا بولاتىنى تۋرالى اقپارات مادەنيەت جانە اقپارات مينيسترلىگىنىڭ رەسمي سايتىندا جاريالاندى. سونىمەن قاتار سايتتا سىيلىققا ۇسىنۋدىڭ تالاپتارى مەن قاجەتتى قۇجاتتار ءتىزىمى دە كورسەتىلگەن. تالاپ بويىنشا جۇمىس اباي اتىنداعى مەملەكەتتىك سىيلىققا ءبىر رەت قانا ۇسىنىلادى. بۇرىن سىيلىققا يە بولعان جۇمىستار كونكۋرسقا جىبەرىلمەيدى.
سونداي-اق ءبىر اۆتور نەمەسە اۆتورلار ۇجىمى اباي اتىنداعى مەملەكەتتىك سىيلىققا قاتارىنان ەكى رەت ۇسىنىلا المايدى. اۆتورلار ۇجىمى سىيلىققا ۇسىنىلعان جاعدايدا ۇمىتكەرلەر سانى 5 ادامنان اسپاۋعا ءتيىس. سىيلىققا جۇمىستاردى مەملەكەتتىك ورگانداردىڭ القالارى, شىعارماشىلىق وداقتار مەن ۇجىمدار ۇسىنادى. سىيلىققا قاتىستىرىلاتىن شىعارما بەس جىلدان اسپايتىن ۋاقىتتا جانە كەمىندە ءبىر جىل بۇرىن كوپتىڭ ىقىلاسىنا بولەنگەن تۋىندى بولۋى كەرەك. وتىنىمدەر مەن جۇمىستار 2026 جىلدىڭ 1 ناۋرىزىنا دەيىن قابىلدانادى.
ايتا كەتەيىك, اباي اتىنداعى مەملەكەتتىك سىيلىق ەكى جىل سايىن بەرىلىپ كەلەدى. 2024 جىلى مەملەكەتتىك سىيلىققا ادەبيەت بويىنشا «كوكىرەگىم كونە كىتاپ» جىر كىتابى ءۇشىن اقىن سۆەتقالي نۇرجان مەن «ادامنىڭ ءبىر قىزىعى بالا دەگەن» كىتابى ءۇشىن جازۋشى قۇلبەك ەرگوبەك يە بولدى. ال ونەر سالاسى بويىنشا «كوشپەندى فرەسكالار» كيىزدەن باستىرىلعان پاننولارى مەن «الەم ورنەكتەرى» گوبەلەندەر توپتاماسى ءۇشىن ءالىباي باپانوۆ پەن ساۋلە باپانوۆا (اۆتورلىق ۇجىم), «بالالىقتان دانالىققا جول» توپتامالار جيناعى ءۇشىن سۋرەتشى جانۇزاق ءمۇساپىر يەلەندى.
