كورمەنىڭ اشىلۋ سالتاناتىنا مادەنيەت جانە اقپارات مينيسترلىگى مادەنيەت كوميتەتىنىڭ توراعاسى ەرلان داكەنوۆ, ۇلتتىق مۋزەي ديرەكتورىنىڭ مىندەتىن اتقارۋشى سايران دۇيسەنوۆ, تۇركيا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى مۇستافا كاپۋدجۋ, ىستانبۇل ۋنيۆەرسيتەتىنىڭ تاريحقا دەيىنگى ارحەولوگيا كافەدراسىنىڭ مەڭگەرۋشىسى نەجمي كارۋل, پارلامەنت دەپۋتاتتارى مەن زيالى قاۋىم وكىلدەرى قاتىستى.
كورمەدە تۇركيانىڭ وڭتۇستىك-شىعىس انادولى ايماعىنا جاسالعان زەرتتەۋ ساپارى اياسىندا جينالعان بىرقاتار ماتەريال ۇسىنىلدى. سونداي-اق سۋرەتشىنىڭ وتكەن مەن بۇگىنگى اراسىنداعى رۋحاني بايلانىستى بەينەلەيتىن «Kokonja» سەرياسىنداعى تۋىندىلارى قويىلدى.
سالتاناتتى راسىمدە ءسوز العان مادەنيەت جانە اقپارات مينيسترلىگى مادەنيەت كوميتەتىنىڭ توراعاسى ەرلان داكەنوۆ تاريح پەن مادەنيەتتىڭ ساباقتاستىعىن نەگىزگە العان حالىقارالىق جوبانىڭ ماڭىزدىلىعىنا توقتالدى. ول سۋرەتشى داريا نۇرتازانىڭ شىعارماشىلىعى باي تاريحي-مادەني مۇرامەن تىعىز بايلانىستا ەكەنىن اتاپ ءوتىپ, شىعارماشىلىعىنا ساتتىلىك تىلەدى.
ەكسپوزيتسيا اياسىندا ءبىر ينستاللياتسيالىق كيىز ءۇي, ءتورت كوركەم پاننو, سونداي-اق كورمەنىڭ مازمۇنىن تەرەڭدەتە تۇسەتىن مۋلتيمەديالىق ماتەريالدار – بەينەجازبالار, فوتوسۋرەتتەر, وزگە دە زاماناۋي ۆيزۋالدى فورماتتارعا كۋا بولدىق. جوبانىڭ كونتسەپتسيالىق نەگىزىندە shaft («شۋرف») ۇعىمى جاتىر. بۇل ارحەولوگيادا مادەني قاباتتاردى زەرتتەۋگە ارنالعان ارنايى تەرمين.
ايتا كەتەيىك, جوبانىڭ جەتەكشىلەرى – ءمادينا سەرعازينا مەن باۋىرجان ساعيەۆ. حالىقارالىق كورمە ەكى ايعا جالعاسادى.
