كوميسسيا توراعاسى دجۋلي ينمان-گرانتتىڭ ايتۋىنشا, جەتەكشى پلاتفورمالار 16 جاسقا تولماعانداردىڭ اككاۋنت اشۋىنا جول بەرمەۋ ءۇشىن ناقتى قادامدار جاساپ جاتىر. ول العاشقى ناتيجەلەردى وڭ باعالاپ, بۇل باعىتتاعى جۇمىس جالعاساتىنىن جەتكىزدى. سونىمەن بىرگە بالالاردىڭ جاسىن انىقتاۋ تەتىكتەرىن جەتىلدىرۋ جانە زاڭدى اينالىپ ءوتۋ ارەكەتتەرىن بولدىرماۋ ءۇشىن تەحنولوگيالىق كومپانيالارمەن بىرلەسكەن شارالار كۇشەيتىلمەك.
بۇعان قوسا كوميسسيا كەيبىر بالالاردىڭ تىيىمدى اينالىپ ءوتۋدىڭ جولىن تابۋى مۇمكىن ەكەنىن جوققا شىعارمايدى. دەگەنمەن نەگىزگى ماقسات – جاستارعا كەلەتىن زياندى ازايتۋ جانە قوعامداعى قالىپتى ءتارتىپتى قالپىنا كەلتىرۋ.
اۋستراليا پرەمەر-ءمينيسترى ەنتوني البانەزە دە بۇل قادامدارعا تۇسىنىستىكپەن قارايتىنىن ايتتى.
الايدا قۇقىق قورعاۋ ۇيىمدارى بۇل ماسەلەگە ساقتىقپەن قاراپ وتىر. Digital Rights Watch ۇيىمىنىڭ توراعاسى ليززي و’شي اككاۋنتتاردىڭ كوپتەپ ءوشىرىلۋىن تابىستىڭ باستى ولشەمى دەۋگە بولمايتىنىن ايتتى.
«كەيبىر جاسوسپىرىمدەر وزدەرىن قولدايتىن ورتاسىنان ايىرىلدى. ال كەيبىرىنە بۇل شەكتەۋ كەرىسىنشە زيان تيگىزدى», دەدى ول.
ەسكە سالساق, اۋستراليادا 16 جاسقا تولماعاندارعا الەۋمەتتىك جەلىلەردى پايدالانۋعا تىيىم سالاتىن زاڭ 2025 جىلعى 10 جەلتوقساندا كۇشىنە ەندى.
شەكتەۋ Facebook, Instagram, Kick, Reddit, Snapchat, Threads, TikTok, Twitch, X جانە YouTube پلاتفورمالارىنا قاتىستى. زاڭ تالاپتارىن ورىنداۋ تولىقتاي تەحنولوگيالىق كومپانيالاردىڭ موينىنا جۇكتەلگەن. ەگەر ولار بارلىق قاجەتتى شارانى قابىلداماسا, 49,5 ملن اۋستراليالىق دوللارعا دەيىن ايىپپۇل سالىنۋى مۇمكىن.
