قارالى حاباردى ءماجىلىس دەپۋتاتى باقىتجان بازاربەك ەستىرتتى.
«بۇگىن 91 جاسىنا قاراعان شاعىندا جۇبايىمنىڭ اپكەسى, ديماش احمەت ۇلى قوناەۆتىڭ تۋعان قارىنداسى, كورنەكتى زيالى تۇلعا, عىلىم دوكتورى, پروفەسسور راۋزا احمەتقىزى ومىردەن وزدى», دەپ جازدى دەپۋتات.
ر. احمەتقىزى 1934 جىلى 10 ساۋىردە الماتى وبلىسىنىڭ شىلىك اۋىلىندا تۋعان. ول مەڭلىاحمەت پەن زاۋرە قوناەۆتاردىڭ ون ءبىر بالاسىنىڭ ىشىندەگى ەڭ كىشىسى بولدى. ۇلكەن اپكەسى ءامينادان 27 جاس كىشى بولسا, ءوزىنىڭ الدىنداعى اعاسى اسقاردان 5 جاس ايىرماشىلىعى بار.
مارقۇم 1952 جىلى م.ۆ. لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنىڭ بيولوگيا-توپىراقتانۋ فاكۋلتەتىنە وقۋعا ءتۇسىپ, ونى 1956 جىلى ءساتتى اياقتاعان.
عالىم بۇكىل سانالى عۇمىرىن عىلىمعا ارنادى. 1957 جىلدان باستاپ 2016 جىلعا دەيىن قازاقستان عىلىم اكادەمياسىنىڭ جۇيەسىندە تاپجىلماي ەڭبەك ەتتى. ول بيوحيميا جانە مولەكۋلالىق بيولوگيا ينستيتۋتتارىندا قىزمەت اتقارىپ, بيولوگيا سالاسىنداعى ءىرى مامان رەتىندە تانىلدى.
ر. قوناەۆا رەسپۋبليكانىڭ بەلگىلى قۇقىقتانۋشىسى مۇرات بايماحانوۆتىڭ جارى بولعان. ولاردىڭ قىزى دينا بايماحانوۆا دا اتا-انا جولىن قۋىپ, عىلىممەن اينالىسقان, قازىرگى تاڭدا زاڭ عىلىمدارىنىڭ دوكتورى.
