121 جىلدىق تاريحى بار ءداستۇرلى تۋرنيردە ەسىمدەرى اڭىزعا اينالعان تالاي ساڭلاقتىڭ توپ جارعانىن كوزىقاراقتى كورەرمەن جاقسى بىلەدى. 1905 جىلى تۇساۋى كەسىلگەن جارىستا جەرگىلىكتى تەننيسشى رودني ءحيتتىڭ مەرەيى ۇستەم بولدى. فينالدا ول ءوزىنىڭ وتانداسى ارتۋر كەرتيستى قاپى قالدىردى. ول كەزدەگى تۋرنير «اۋسترالازيا» دەپ اتالاتىن. 1927–1968 جىلدار ارالىعىندا اتالعان دودا «اۋستراليا بىرىنشىلىگى» دەگەن اتاۋعا يە بولدى. سول كەزدەرى روي ەمەرسوننىڭ جۇلدىزى جارقىراي جاندى. كۆينسلەند شتاتىنىڭ تۋماسى التى مارتە الدىنا جان سالمادى.
«جاڭا ءداۋىردىڭ» (1969–1980) العاشقى جىلدارى جاسىل قۇرلىقتىڭ وكىلى كەن روزۋولل ءتورت مارتە جەڭىمپاز اتانسا, رود لەيۆەر ءۇش رەت دارا شىقتى. حح عاسىردىڭ 80-جىلدارى شۆەتسيالىق ماتس ۆيلاندەر دە ءدال سونداي ناتيجەگە قول جەتكىزدى. عاسىرلار توعىسىندا امەريكالىق اندرە اگاسسي ءتورت تۋرنيردە الدىڭعى لەكتەن كورىندى. ودان كەيىن شۆەيتساريانىڭ ماقتانىشى رودجەر فەدەرەر مەن سەربيانىڭ ساڭلاعى نوۆاك دجوكوۆيچتىڭ ءوزارا تارتىسى باستالدى. ۇزاق ۋاقىت بويى ەكەۋى ەشكىمگە دەس بەرگەن جوق. 2004–2023 جىلدار ارالىعىندا رەسەيلىك مارات سافين, يسپانيالىق رافاەل نادال, شۆەيتساريالىق ستەن ۆاۆرينكانىڭ ارا-تۇرا باقتارى جانعانى بولماسا, باس جۇلدە نەگىزىنەن جوعارىدا ەسىمدەرى اتالعان قوس دۇلدۇلگە بۇيىردى. اتاپ ايتساق, فەدەرەر التى ءتۋرنيردىڭ جەڭىمپازى اتانسا, دجوكوۆيچ ودان اسىپ ءتۇستى. ول نورمان برۋكس كۋبوگىن 10 رەت توبەسىنە كوتەردى. اۋستراليانىڭ اشىق بىرىنشىلىگىنىڭ رەكوردى ءدال وسى سەربيالىق سپورتشىعا تيەسىلى.
كەيىنگى ەكى جارىستا ياننيك سيننەر جەڭىس تويىن تويلادى. 24 جاستاعى يتاليانىڭ مىقتىسى 2024 جىلعى جارىستىڭ فينالىندا رەسەيلىك دانيل مەدۆەدەۆتەن باسىم تۇسسە, 2025 جىلى گەرمانيالىق الەكساندر زۆەرەۆتەن ايلاسىن اسىردى.
ايەلدەر اراسىنداعى تۇڭعىش تۋرنير 1922 جىلى ۇيىمداستىرىلدى. وتكەن عاسىردىڭ العاشقى جارتىسىندا جەرگىلىكتى ويىنشىلار دافنا اكحەرست پەن نەنسي ۋينن-بولتوننىڭ قارقىنى كۇشتى بولدى. العاشقىسى – بەس, ەكىنشىسى – التى مارتە توپ جاردى. كوپ ۇزاماي مارگارەت سميت-كورتتىڭ جۇلدىزى جارقىراي جاندى. ولبەريدە دۇنيەگە كەلگەن بۇرىمدىنىڭ 11 مارتە مەرەيى ۇستەم بولدى. بۇل رەكوردتىڭ كۇنى بۇگىنگە دەيىن مۇرتى بۇزىلماي تۇر. بەرتىن كەلە اۋەلى چەحوسلوۆاكيانىڭ, ودان كەيىن اقش-تىڭ تۋى استىندا ونەر كورسەتكەن مونيكا سەلەش پەن گەرمانيالىق شتەففي گرافف – ءتورت, تاعى ءبىر اتاقتى امەريكالىق تەننيسشى سەرەنا ۋيليامس جەتى جارىستا قارسىلاس شاق كەلتىرمەدى. كەيىنگى ءۇش تۋرنيرگە توقتالاتىن بولساق, 2023, 2024 جىلدارى بەلارۋستىك ارينا سوبولەنكو شاشاسىنا شاڭ جۇقتىرمادى. بىلتىر مەديسون كيزدىڭ قارقىنىنا ەشكىم شىدامادى. 30 جاستاعى اقش وكىلى فينالدا سول سوبولەنكوعا سان سوقتىردى.
ەلىمىزدىڭ تەننيسشىلەر اراسىندا ەڭ ۇزدىك كورسەتكىش ەلەنا رىباكيناعا تيەسىلى. 2023 جىلى مەلبۋرندەگى دودانىڭ باستاپقى باسەكەلەرىندە ەليزابەتتا كوچچارەتتو (يتاليا), كايا يۋۆان (سلوۆەنيا), دانيەل كوللينز (اقش), يگا شۆەنتەكتى (پولشا) ۇتقان لەنا شيرەك فينالدا ەلەنا وستاپەنكونى (لاتۆيا) ەڭسەردى. جارتىلاي فينالدا ۆيكتوريا ازارەنكونى (بەلارۋس) جولىنان ىعىستىردى. الايدا ەلەنانىڭ فينالدا ارينا سوبولەنكوعا (بەلارۋس) ءالى جەتپەدى. ءۇش سەتتىك باسەكە 6:4, 3:6, 4:6 ەسەبىمەن اياقتالدى.
بىلتىرعى جارىستا رىباكينا ءتورتىنشى كەزەڭگە دەيىن جەتىپ, سول مەجەدە مەديسون كيزگە (اقش) ەسە جىبەردى. يۋليا پۋتينتسەۆا ءۇشىنشى اينالىمدا داريا كاساتكينادان (رەسەي) جەڭىلدى. جىگىتتەرىمىزدىڭ قارقىنى تىم باسەڭ. الەكساندر بۋبليك پەن الەكساندر شەۆچەنكو تۇساۋكەسەر كەزدەسۋلەرىندە جەڭىلىستىڭ كەرمەك ءدامىن تاتتى. جاسىل قۇرلىقتا بۋبليك ويدا-جوقتا فەدەريك سەرەندولودان (ارگەنتينا) ۇتىلسا, شەۆچەنكو سول كەزدە الەمدىك رەيتينگتە ءۇشىنشى ورىندا تۇرعان كارلوس الكاراسقا (يسپانيا) لايىقتى قارسىلىق كورسەتە المادى.
ساناۋلى كۇندەردەن كەيىن جالاۋى جەلبىرەيتىن اۋستراليانىڭ اشىق بىرىنشىلىگى 1 اقپاندا مارەگە جەتەدى. باسەكەلەر ياررا وزەنىنىڭ بويىنداعى «مەلبۋرن پاركتا» وتەدى. بۇل جەردە نەگىزى ءۇش كورت بار. ولار – «رود لەيۆەر ارەناسى» (16 820 كورەرمەنگە ەسەپتەلگەن), «مەلبۋرن ارەنا» (10 500), «مارگارەت كورت ارەنا» (6 000).
مەلبۋرندە ەلىمىزدىڭ ءتورت تەننيسشىسى باق سىنايتىنى ءاۋ باستان بەلگىلى بولعان. ولار – ەلەنا رىباكينا (WTA №5), الەكساندر بۋبليك (اتر №10), الەكساندر شەۆچەنكو (اتر №104), يۋليا پۋتينتسەۆا (WTA №106). كوپ كەشىكپەي ۇيىمداستىرۋشىلار تاراپىنان زارينا دياسقا (WTA №285) Wild Card بەرىلگەنى بەلگىلى بولدى. ءسويتىپ, جارىسقا قاتىساتىن جەرلەستەرىمىزدىڭ سانى بەسەۋگە جەتتى.
مەلبۋرندەگى جارىستىڭ جۇلدە قورى بيىل 74,9 ملن اقش دوللارىن قۇراپ وتىر. بىلتىرعى جىلمەن سالىستىرعاندا 16%-عا ارتقان. جەكەلەگەن سايىستاعى جارىس جەڭىمپازدارى 2,79 ملن السا, فينالعا شىققاندارعا سول سومانىڭ تەڭ جارتىسى بەرىلەدى.
